1 Mii gaijiula, ta mai famatu Ezhan Ersa Mexihai xianxin giese kunlade pienxin bu gie. 2 Bilase nie kun antan geizhi zhozhi huaralasan jien musidene tai huitande orowo. Pse nie nanxin kun po jien musidene ye orowo. 3 Ingiese ta hhe huaralasan jien musisan kunde kieliene, "Ene gou wizhi jiere sou." Pse nanxin kunde kieliene, "Chi hhetoro bei, pse mii kon shida sou." 4 Eneshi ta goya kunne pienxin giezhi doghun mujighala pandon gieku pushonu?

5 Bi oresan gaijiula, chenlie. Huda duya jieredu nanxin kunlai sunghudene xinyan jiere ese bayazheghawu? Da Hudade oresan kunlade dain giesan hhe gojiani hhelade ese jienlieghawu? 6 Ta dou nanxin kunlai jiuren gieghazho. Tai qifulazhi fayende lai echisanshi baertu kunla pushonu? 7 Hhelashi ta jienliesan zhiguitu nierei sugiesanla pushonu?

8 Jinwun jiere goyadene mutun giebeidene ore giesan ene nie zui zhunyo guijinni ta zunjizhoshi oluzhoma, 9 kunlade pienxin giese zui fanjizho, guijin ta fanjisande zui jinjine. 10 Kien guijinni man zunjidene niei fanjise soyujilai man fanjizho. 11 "Piofen bu gie." giezhi kieliesan Huda "Kun bu ala." giezhi ye kieliezho. Ingiese piofen ese giedene kun alase guijinni fanjizho. 12 Ingiese ta yan kielie, yan giene giese ziyushighaku guijinghala panjiku mutun gie.

13 Ubali ulie xiichen kunyi ubali ulie xiikughala panjine. Ubali xiiku panjikuse injiwo.

14 Mii gaijiula, kunde xianxin gieku wine giezhi kieliedene yama giekui uwoshi yan zoin wo? Ene xianxin gieku hhei jiui shidanu? 15 Tai dunda gaijiu eghechijiulade niudunie musiku, ijiuni uwokude 16 ta hhelade, "Pinnande echi, musizhi khalun, ijiezhi chudu." giezhi kieliedene beyede injikui ulie ogise yan zoin wo? 17 Niekielien wo. Gieku witu zinie xianxin giekushi fugusei wo.

18 Ingiese niezhan kunla kieliene, "Chade xianxin gieku wine, made gieku wine." Chi gieku witu xianxin giekune made uzhegha. Bi giekughalane xianxin giekune chade uzheghaye! 19 Huda niekozi wo giezhi chi xianxin giese oluzho. Sheitanlaye hhei xianxin giedene ayizhi pugharazho. 20 Chi ene men kun, gieku witu xianxin giekushi yama zoin wituni chi mejieku duran winu? 21 Matanyi xienren IburaheimuIsaghei kewonne sidagha gieku teizi jiere teikude giekughala gounide sanasan pushonu? 22 Chi uzhe, hhei xianxin gieku hhei giekughala hhantu wilie giezho. Giekughala xianxin giekui hulunshighawo. 23 Ingiese jinwun jiere "Iburaheimu Hudai xianxin giedene Huda hhei gounide sanazho." giezhi kieliesan mutun gholuwo. Pse hhei Hudai zhanlien wo giezhi uruzho. 24 Ingie uzhese kunni gounide sanase giekughala wo, zinie xianxin giekughala pusho. 25 Niekielien wo, biozi Lahe peizhi ireghasan kunlai jienliedene psedu mo jierese echighawo. Eneshi giekughala gounide sanasan pushonu? 26 Ingiese ruhher witu beye fugusan mutun gieku witu xianxin giekushiye fugusan wo.

<- Yagebu Huaisan Xin 1Yagebu Huaisan Xin 3 ->