Ifuso Kunlade Huaisan Xin 5

1 Ingiese ta Hudai daghazhi suru, tashi Huda oresan kewosi wo. 2 Mexiha matande orezhi matande goyane sheidene Hudade ogisan andatu dunxi, mure danlazhi Hudade ogisan mutun taye yan giese oreku zhugheghala gie.

3 Lon kijieku, yanyanji zannanni gieku, tanxin giekulai tai dunda qiizhi da ulie olune. Shentula ingiezhi giese heshi uwo. 4 Shizheku kielien, hu kielieku kielien, zannan kielienlai bu kieliedene mafan gieku kielien kielie. 5 Ta goude mejie, lon kijiechen, zannanni giechen, tanxin giechenla Mexiha Hudaghalai gojiai jiachanni jienlie dane. Tanxin gieku nigiedade beiikughala niekielien wo.

Gonni Kewosi Mutun Gie

6 Enezighan shiqin jiere Hudai hokuruku hhezighan kielien ulie chenliechen kunlai jiere irene. Yama oronde witu kielienghala kiema tai bu piendagha. 7 Ingiese ta hhelare bu hhantula. 8 Ta eqighandeishi kharani woma, edeshi Ezhanyi miende gon wo. Ta yan giese gonni kewosi mutun gie. 9 Gonni jiegoshi yanyanji gouni, gundanni, zhenni wo. 10 Ezhan bayasuku shiqinshi yan wo giezhi kaoyen gie. 11 Yama haochu witu, khara shiqin giesan kunlare bu hhantula, khareidene hhezighan shiqin giesan kunlai kheila. 12 Hhela beimiende giesan shiqinlai qiise ungien hularane. 13-14 Manlai chujiegheghasanshi gon wo. Gon dunda khizheghasanlai man chujieghene. Ingiese kieliezho,

"Unturasan kunya, xierei!

Fugusanse bosizhe,

Mexiha chii zhouine."

15 Ingiese ta xioxin giezhi gie. Aghelitu kun mutun gie, ben kun mutun bu gie. 16 Jihuini goude barei, edeku gonyin doghun wo. 17 Ingiese ben kun bu danlazhi Ezhanni isishi yan bikui mejie. 18 Jiu ochizhi bu sudo, jiu kunni hu gieghane. Khareidene Shenlinghala goyane durugha. 19 Shige, zanmeige, ganjin donghala nieniedene doula. Zhughesene don giezhi Ezhande doula. 20 Yan shiqindeliuzhe mai Ezhan Ersa Mexihani niereghala chan ada Hudade mafan kielie.

Zhanguiji Biereighala

21 Mexihai zunjiku zhugheghala nieniene shunji.

22 Biereila, Ezhande shunjiku mutun zhanguijidene shunji. 23 Mexihashi jiohuini qiorun biku mutun zhanguijishi biereini qiorun wo. Mexihashi ene beye, jiushi jiohuini jiuichen wo. 24 Jiohui Mexihade matugie shunjiku mutun biereiye yandeliuzhe zhanguijidene qingiezhi shunji.

25 Zhanguijila, Mexiha jiohuide orezhi goyane sheisan mutun biereidene ore. 26 Hhe ingiezhi giekushi Hudai kielienyi tungo giezhi usughala jiohuini waghazhi zhiguishighadene 27 famashighazhi goyadene khughoghane giezho, yama zannan jienjien chuchutu intui wizhi zhiguitu yama maobin witui gholughane giezho. 28 Niekielien wo, zhanguijiye beyedene oreku mutun biereidene orekuni wo. Biereidene orese goyadene orezho. 29 Kiemada goya beyene henjichen kun uwo, kharei guizhunde zhaogu giezhi Mexiha jiohuini zhaogu giekughala niekielien wo. 30 Matanshi hhei beye jieredu iyanzi wo. 31 "Ingiese kun ada anasene likai giedene biereighalane hhantulazhi ghuala nie beye gholune." 32 Eneshi fugie mimi wo. Bi Mexiha, jiohuighalai zhiizhi kieliezho. 33 Ingieliuzhe ta jien kunlaye goyadene oreku mutun biereidene ore. Biereiye zhanguijine zunji.

<- Ifuso Kunlade Huaisan Xin 4 Ifuso Kunlade Huaisan Xin 6 ->