2 Ta jinxin giezhi mafan giekughala izhi onxian gie. 3 Pse bijiende oluzhiye onxian gie. Huda bijiende daoli chonjiku wijienyi keighazhi Mexihai mimini jianjigha gie. Bi ene yenyinde bafanzi souzho. 4 Ingiezhi onxian giema, bi indan kielieku kielienghala daolini man kielie khizheghane.

5 Ta jihuini goude bareizhi aghelighala xianxin ese giesan kunlare laiwon gie. 6 Ta kielien kieliese dansunghala andatughaku mutun chan renyide kielie. Ingiese jien kunde matugie huida giekui mejiene.

7 Mii qinkonlai Tuijigu man tande mejieghane. Hheshi nie oresan gaijiu wo, shixinji giesan wiliechi wo, mare hhantu Ezhande hoji danlazho. 8 Bi zhomen hhei tai hhende peizhi echighakushi bijienyi qinkonyi tande mejieghazhi tai zhughei nanranshighane giezho. 9 Hhere hhantu echiku dou nie oresan, shixinjitu gaijiu Aniximu wine. Hheshi tai hhendedu kun wo. Hhe ghuala enendedu shiqinlai man tande kieliene.

10-11 Mare hhantu bafanzi sousan Yalidagu, Banabani gujiu Make, Yushidu giezhi urusan Ersa enela tande kielien asazho. Makeni kieliese, tande fenfulazhi daozho. Hhe tai hhende irese ta hhei jienlie. Yutaini Mexihai xianxin giesan kun dunda zinie enela mare hhantu Hudai gojiade oluzhi wilie giezhi mii zhughei nanranshighazho. 12 Mexiha Ersade hoji danlasan tai hhendeduku kun Ibafu tande kielien asazho. Hhe chan tande oluzhi xiacha giezhi onxian giese ta Hudai isi jiere man hulunshizhi xianxin gieku duruzhi beizhi undanlase giezho. 13 Hhe tande, pse Laojijia, Xilapolini gaijiulade oluzhi olon khishulazho, enei bi hhende ganzhen bei shidane. 14 Oresan deifu Lujia, Jimaghala tande kielien asazho.

15 Laojijiadedu gaijiulade, pse Ninfade, hhei giededuku jiohuide kielien asa. 16 Ta ene xinni onshidene Laojijiani jiohuide ogizhi hhelade onshigha. Laojijiase iresan xinni taye onshi. 17 Ezhanse jienliesan renwuni ijinyo onchen gie giezhi Yajibude kielie.

18 Bi Baolo qinsi huaizhi kielien asazho. Bi bafanzi sousanyi ta jila. Nenjien tanre chan hhantu bi gie!

<- Geloxi Kunlade Huaisan Xin 3