Tujila Giesan Wilie 2

50 Qienni Jieqide Shenlin Bouzhezho

1 50 qienni jieqi kuzhese hhela man nie oronde hhantulazho. 2 Menzhali asiman jierese fugie kei feiliesan mutun nie xianshen bouzhezhi hhela sousan giedera duruwo. 3 Pse khanni hoyen mutun khizhedene jien kunyi jiere luiwo. 4 Ingie hhelai jiere Shenlin durudene Shenlin ogisan nenlighala psedu kielienghala kielie qiiwo.

5 Hhe xienzide xienliantu Yutai kunla shijieni go gojiase irezhi Yelusalende souzho. 6 Ene shenqi khizhese olon kunla man hhantuladene goya oronyi kielienyi sonosuse ghudure wo giezho. 7 Hhela hende ghanirazhi kieliewo, "Uzhe, ene kielien kieliesanlashi Jialili kun pushonu? 8 Matan chenliese hhela matugie mai olusan oronyi kielienghala kieliezho? 9 Mai dunda Paqiya, Madai, Ilan kun wine. Pse Meisobudamiya, Yudaya, Jiapadojia, Bendu, Yaxiya, 10 Fulijia, Panfeiliya, Aijidedu kun, Gulinaini kouisan Libiyai idou oronni kunlaye wine. Da Lomase irezhi toreisan kun dunda 11 Yutai kun, Yutaijioni suisan kun wine. Pse Kelite, Alabo kunye wine. Matan sonosuse hhela mai kielienghala Hudai fugie shiqinyi kieliezho." 12 Kunla man ghanirazhi mejie dazhi nieniedene, "Eneshi yan isi wo?" giezhi asazho. 13 Niezhan kunla hhelai xiniezhi hhela jiu ochi sudowo giezho.

Beduru Kunlade Jianjizho

14 Beduru 11 gie shitulare bosi ire kunlade fugiede kieliewo, "Yutai kun, Yelusalende sousan kunla, bi kieliesei goude chenliezhi mejiendu. 15 Ta sumulase enezighan kunla sudowo giezhou? Uye sudozho, eneshi eqiemaghaku 9 jien wo. 16 Eneshi zhen xienzhi Yeer kieliezhi daosan wo,

17 'Huda kieliewo, Duya baraku xienzide

bi Shenlinne jien kunlai jiere kiene.

Tai kewon, oqinla mini kielienyi kieliene.

Tai nasuchighan kunla zhoujin mutun chanlane.

Tai oqio kunla zhoujin zhoujiliene.

18 Hhe xienzi kuzhese

bi Shenlinne ere kun, bierei hojilane jiere kiese

hhela mini kielienyi kunlade kieliene.

19 Asiman jiere bi fugie shiqin xienjighane.

Zemin jiere chusun, khan, funighala ghudureqi xienjighane.

20 Ezhanni fugie famatu udu kuzhetula

naran kharalane,

sara chusun mutun hularane.

21 Ingiese Ezhanyi

xiahua giesan kunlai man jiuine.'"

22 "Isilie kunla, ene kielienyi chenliendu. Huda Nasale kun Ersai tungo giezhi tai dunda nenlitu shiqin, fugie shiqin, ghudureqi xienjighadene Ersade ganzhen beizho. Enei ta goyalane mejiene. 23 Huda zhao goyane isighala melieshi jihua giesan mutun Ersai jiuizhi ogiwo. Ta niman doghun kunlai tungo giezhi hhei shizijia jiere ghada alawo. 24 Ingieliuzhe Huda hhei fuguku nangoni widaghazhi aminne olughawo. Fuguku hhei hanshilie dazho. 25 Dawude hhei zhiizhi kieliewo,

'Bi chanlase Ezhan chan mii shida wo.

Hhe mii borun miende beise bi ulie gojiolune.

26 Ingiese zhughedemi bayasuzhi

amandemi doulakui wine.

Made xiwon wine, bi hhamura shidane.

27 Chi mii ruhherni dozode ulie bendane.

Zhiguitu kunne ulie fughane.

28 Chi aminni moni made uzheghawo.

Chighala hhantushi bi hende bayasuzho.'"

29 "Gaijiula, famatu xienren Dawudeni shiqinyi bi tande minminji kielieye. Hhe duya ijiezhi bulawo. Hhei meza edeliuzhe mai enende wine. 30 Hheshi nie xienzhi wo. Huda hhende dadu giezhi hhei houdeise nie kun sunghudene hhei baozo jiere soughane giezhi kieliesei mejiewo. 31 Hhe melieshidase ene shiqinyi mejiezhi Mexiha fuho giekui kieliewo,

'Hhei dozode ese bendawo,

beyeini ese fughawo.'

32 Ene nie Ersai Huda aminne olughawo. Bijien man ene shiqinde ganzhen beine. 33 Huda hhei undudaghazhi borun miendene soughawo. Ada dain giesan Shenlinni hhe jienliedene kie bouzheghawo. Eneshi ta chujieghezhi sonosusan wo. 34-35 Dawude asiman jiere ese khireiwoma, goyane kieliezho,

'Ezhan mii Ezhande kieliewo,

"Bi duitoulaichii kon dourachii teitula

chi mini borun miende sou."'

36 Ingiese Isilie kunla, man mejiendu. Ta shizijia jiere ghadasan ene Ersani Huda Ezhan, yeshijiu Mexiha gholughawo."

37 Kunla ene kielienyi chenliedene zhughedeni hende jindazhi Bedurude, psedu shitulade asazho, "Gaijiula, bijien matugiene?"

38 Beduru kieliewo, "Ta man geizhen giendu. Ersa Mexihai niereghala xilii jienliedene tai zuini mienlie gie. Ingiese Huda ogine giesan Shenlinni ta jienliene. 39 Ene dainshi tande, tai kesilade, pse Ezhan mai Huda gholodose uruzhi iresan kunlade man olusan wo."

40 Beduru pse olon kielienghala, "Ta ene idai doghun kunlai dundase goyalane jiuizhi khizhe!" giezhi ganzhen beizhi hhelade hende surughazhi kieliewo. 41 Hhei kielienyi xianxin giesan kunla xili jienliewo. Hhe niudude xianxin giesan kun chabudu 3000 olodowo. 42 Hhela zhomen shitula sughasanyi chenliezhi laiwon giezhi ginan ghuluzhi onxian gienduzho.

Xianxin Giesan Kunla Laiwon Giezho

43 Shitula olon fugie shiqin, ghudureqi xienjighase kunla man ayizho. 44 Xianxin giesan kunla hhantulazhi yan dunxiiliuzhe hhantu injizho. 45 Hhela giene dunxi, jiachanlane huidene baer injine giesan kunlade ghughazhi ogizho. 46 Niudunie mechide hhantulazho. Pse gieladene ginan ghuluzhi bayasuzhi heqide ijienduzho. 47 Hudade doulazho. Olon kunla hhelai kuaizho. Ezhan yebeiseye kun olon jiuizho.

<- Tujila Giesan Wilie 1 Tujila Giesan Wilie 3 ->