Gelindo Kunlade Huaisan Ji 2 Hui Xin

1 Hudai isighala Mexiha Ersade shitu danlasan BaoloQimotai gaijiughala Gelindoni Hudai jiohui, pse Yagaiyani shentulade man xin huaizho. 2 Mai ada Huda, Ezhan Ersa Mexiha tande nenjien, pinnan ogi gie!

3 Mai Ezhan Ersa Mexihani ada Hudade doula. Hheshi ubali xiichen ada wo, shiheni sidaghazhi kieliechen Huda wo. 4 Hhe olon kunnan dunda matai sidaghazhi kieliezhi hhe ogisan sidaghaku kieliesanghala matan psedu kunnan shouisan kunlai sidaghazhi kielie shidane. 5 Matan Mexihai kui olon shouisan mutun Mexihai tungo giezhi sidaghaku kielienye olon wo. 6 Bijien kunnan shouise tai sidaghazhi jiuikude oluzho. Bijienyi sidaghazhi kieliese tai sidaghazhi kieliekude oluzho. Ene sidaghazhi kielieku bijien shouisan xianlitu kunnanni ta shouikude tai rennai gieghane. 7 Ta bijien mutun ku shouise sidaghaku kielienyiye jienliekui bijien mejiene, ingiese bijien tande xiwon giesan goujida ulie bienjine.

8 Gaijiula, bijien Yaxiyade shouisan kunnanni tande ulie mejieghaku duran uwo. Hhe shihoude bijien danjisan achanshi bijien danji dakui wo, lien amituraku xiwon da widazho. 9 Bijien sumulase bijienyi ijin sixin panjiwo giezho. Ingiekushi bijienyi goyadene ese kouighazhi fugusan kunyi aminne olughasan Hudade kouighane giezho. 10-11 Huda bijienyi fuguku wixiense jiuiwo, da izhi jiuine. Taye onxian giezhi bijiende banman giema, hhe pse bijienyi jiuikui bijien hende xiwon giezho. Ingiezhi olon kunla bijiende onxian giedene Huda dain giese olon kunla bijienyi yenyin jiere Hudade mafan kieliene.

12 Bijien duyade giekude, tebieshi tanre laiwon giekude Huda ogisan zhijieji shixinji zhugheghala giezho. Kunni jienzhaghala ese giezhi Hudai nenjienghala giezho. Enende bijienyi lianxin ganzhen beine. Ingiezhi giesande bijien goyane kuaine. 13 Bijien ede tande huaisanshi zhao ta onshizhi dunjireku mutun huaizho. Ta ede bijienyi man dunjire dazhoma, bi xiwon giese man dunjire. 14 Ingiese Ezhan Ersai udude bijien tai kuaiku mutun taye bijienyi kuaine.

15 Made intu xinxin bise sumulazhi xien tai hhende echizhi tande ghuareifa nenjien ireghaye giezho. 16 Jiushi tai hhense jingo giezhi Maqidunde echine, ingie Maqidunse khareizhi tai dunda iredene ta mii Yudayade khughose giezho. 17 Bi ingiezhi jihua giese suibiende giezhou? Bi duyai banfaghala jihua giezhi enbene giekude pusho giezhi kielienu? 18 Bi kekaotu Hudai zhiizhi kielieye. Bijien tande kieliese yu enbene yu pusho giezhi ulie kieliene. 19 Bi, Seila, Qimotai ghuralie tai dunda chonjisan Hudai kewon, Ersa Mexihashi enbene giekude pusho giekui pusho. Hhende zinie enbekui wine. 20 Hudai dain giesanla giedughanliuzhe Mexihai sudoro man enbekui wo. Ingiese matan Mexihai tungo giezhi amine kieliezhi Hudai kuaine. 21 Mexihai miende bijienyi tanre hhantu khiduzheghazhi teshu wiliede oluzhi matanyi sunghusanshi Huda wo. 22 Hhe matai jiere zhanzi taizhi Shenlinni mai zhughede ogizhi yajin daruwo.

23 Bi Gelindode pse ese irekushi tande oluzho. Enende Huda made ganzhen bei giezhi bi kielie shidane. 24 Bijien tai xinyanni gonjine gieku pusho, tai bayasughane giezhi tanre hhantu wilie giezho. Ta xinyan jierene beizhi undanlazho.

Gelindo Kunlade Huaisan Ji 2 Hui Xin 2 ->