Yaheiya Huaisan Ji 1 Hui Xin 3

1 Ta uzhe, Ada matande matugiezhi orezho. Huda matanyi goyane kewosi wo giezhi uruzho. Matanshi hhei kesila enbene. Duyani kunla matanyi tani dakushi Hudai tani dazho. 2 Mii orentula, ede matanshi Hudai kesila wo. Jianlai matan matui gholukuni da ulie mejienema, Ersa Mexiha xienjikude matan hhei zhen yanziini chanlase matan hhe mutun gholukui mejiene. 3 Kien hhei kouizhi enei panjise goyane Ersa Mexiha mutun ganjinraghane.

4 Kien zui fanjise guijinni fanjizho. Guijinni fanjise jiushi zui wo. 5 Ersa Mexiha zuini widaghale iresanyi ta mejiene. Hhende yama zui uwo. 6 Hhei sudoro beisan kun zui ulie fanjine. Zui fanjisan kun hhei uzhezhi ese daozho, taniye dane.

7 Kewosila, ta goyane bu piendagha. Gundande giesan kunshi Ersa Mexiha mutun gundan kun wo. 8 Zui fanjisan kunshi Ibilisinughun wo. Ibilisi dei qiisanse zui fanjizho. Ibilisini giekuni widaghane giezhi Hudai Kewon irezhi daozho. 9 Hudase iresan kesila zui ulie fanjine. Hhelai sudoro Huda ogisan fure wine. Hhelashi Hudase iresan kesila wo, ingiese zui fanji dane. 10 Kienshi Hudai kesila, Ibilisii kesila bikui ingiezhi mejiene. Gundande ulie giezhi gaijiuladene ulie orese Hudanughun pusho.

Nieniedene Orendu

11 Matan nieniedene orekuni wo. Eneshi ta dei qiikude chenliesan daoli wo. 12 Jiabini bu dagha. Hheshi Ibilisinughun wo. Jiune alazho. Yangiezhi alazho? Hheni giekushi mouxienni wo. Jiuni giekushi gouni wo. 13 Gaijiula, duyai kunla tani henjise ta bu ghanira. 14 Matan gaijiulade orese fugukuse amitude iresei mejiene. Ulie orechenla fugukude beizho. 15 Kien gaijiulani henjise kun alaku niekielien wo. Kun alasan kunni sudoro chanqiku amin wikuni ta mejiene. 16 Ersa Mexiha matande oluzhi aminne sheiwo. Ingiese matan yanshi orekuni mejiene. Matanye indan gaijiulade aminni sheikuni wo. 17 Kiende baer olon bidene nanxin jiulani uzhedene zhughene khidunde giezhi ulie gonjise Hudade oreku zhughe hhei sudoro matugie wine? 18 Kesila, matan orese zi amande bu kieliedene xindun giezhi shixinde gieye. 19-20 Ingiezhi giese matanshi zhendaose iresei mejiene. Matan zhughedene gui gieliuzhe mai zhughe Hudai melie undan wo. Hudashi mai zhughese pse fugie wo. Yan shiqinyiliuzhe man mejiene.

21 Mii orentula, mai zhughede gui ulie giese Hudai melie yama ayikui uwo, 22 pse hhense yan xiahua giese yan ogine. Matan hhei zunjizhi hhe bayasukui giezho. 23 Hhei minlinshi matan hhei kewon Ersa Mexihai niereni xianxin giekuni wo. Pse hhe ogisan minlin mutun nieniedene orekuni wo. 24 Kien Hudai minlinyi zunjise hhe Hudai sudoro beizho. Hudaye hhei sudoro beizho. Huda mai sudoro beisei hhe ogisan Shenlinghala mejiene.

<- Yaheiya Huaisan Ji 1 Hui Xin 2 Yaheiya Huaisan Ji 1 Hui Xin 4 ->