1 Shentulade baer khighakui kieliese bi Jialataini jiohuilade fenfulasan mutun taye qingiezhi gie. 2 Niefanie xinqide jien kunla goya hashughalane agizhi khizhedene ghura, pse bi irekude ta cai khireighane. 3 Bi irekudeni ta chenren giesan kunlade xinni deilazhi hhelai tai murei ughuzhi Yelusalende khughozhi echighaye. 4 Bi echise heshi bise hhela mare hhantu echise olune.

5 Bi Maqidunse daone giezho, daokudeni tai uzhele ireye. 6 Kenen bi tanre nietan soune, kenen unchai daoghane. Ingiedene bi khala echise ta mii khughose olune. 7 Bi ede zinie jingo giekude tai uzhedene echiku duran uwo. Ezhan duran bise bi tanre hhantu ezighancha souse giezho. 8 Bi izhi Ifusode souzhi 50 qienni jieqi kurune. 9 Fandui giechen kun olon woma, made yu aghui yu zointu wijien keizhi chonjiku jihui olon wo.

10 Qimotai irese ta hhende goude giezhi bu ayigha, hheye biwo giezhi Ezhanyi wilieni giezho. 11 Ingiese kienliuzhe hhei gade bu uzhe. Pinnande khughozhi echigha, mii enende ire gie. Gaijiulare hhantu hhe irekui bi sagheizho. 12 Gaijiu Yaboloi kieliese hhe gaijiulare hhantu tai hhende echi giezhi bi hhende haojihui goude fenfulawo, hhe ene shihoude echiku duran uwo, jihui irese echine.

13 Ta jinxin giezhi xinyan jiere beizhi undanla, ere kunyi yanzii khizheghazhi khidunde bei. 14 Ta yan giese oreku zhugheghala gie.

15 Siqifana nie gie kun Yagaiyade Ersai tou 1 giede xianxin giesei ta mejiene. Pse hhela zhomen shentulai ushilazho. Gaijiula, bi tai goude fenfulaye, 16 ta qimutu kunlai, pse hhelare hhantu khishulazhi wilie giesan kunlai man shunji. 17 Siqifana, Futunadu, Yagaigu irese bi bayasuzho. Ta enende uwoma, hhela banman giewo. 18 Hhela tai pse mii bayasughazho. Imutu kunlai ta danren gie.

19 Yaxiyani jiohuila tande kielien asazho. Yajila, Baijilaghala pse hhelai giede hhantulasan jiohui Ezhanni miende tande shixinji kielien asazho. 20 Gaijiula man tande kielien asazho. Ta zhughesene nieniedene kielien asa.

21 Bi Baolo qinsi huaizhi kielien asazho. 22 Kien Ezhande ulie orese hhei indan kharakui wo. Mai Ezhan, ire! 23 Ezhan Ersai nenjien tanre hhantu bi gie! 24 Mexiha Ersai miende mii oreku tanre man hhantu wo!

<- Gelindo Kunlade Huaisan Ji 1 Hui Xin 15