3 Yohana

1 Ugogolo hwa Gayo uyegene, ulugano lwa lyoli. 2 Wamwetu, elabha huje utabhale humambo gonti neshi umwoyo gwaho shagutabhala. 3 Nasungilwe tee panahumvwizye huje uhwendelela shinza bhambulile bhaala bhabhafumule huliwe. 4 Nalumo uluseshelo lwalushilile olu ahumvwe aje abhaana bhane bhahwendelela mulweteho. 5 Wamwetu ubhomba shinza nubhaavwa aholo na jenyu ajenyi, 6 ebho bhafumizye uluguno lwaho hwi kanisa. Aje ubhomba shinza abhashulezye abhasafirizye shila shasungwa Ungulubhi. 7 Hunongwa yitawa, bhahendeleye nkahweje nkahamo hwa pagani(hwa Mataifa). 8 Tihwanziwa huje tibhakaribisyaje abhantu neshi ebha nkatibhe bhabhomba mbombo nabho. 9 Nalisimbiye ikusanyiko(ubhungano) gwenyu ijambo limo lelo uDiotrefe, yasungwa abhe wahwandesiga hwitihananate. 10 Nkanayenza naibhabhuula zyonti zyabhomba, sigahobhoha nembombo zyetu nantele abhakhana bhaala bhabhahwanza abhakaribisye aholo bhabhabhenga 11 Awe usafwatizye embibhi ufwatizyaje enyinza, uyabhomba enyinza uyo muntu wa Ngulubhi; yabhomba embibhi sigaalolile Ungulubhi. 12 U Demetrio bhalolile bhinji, natebhayo tilolile ezi zyatizilolile zyelyoli. 13 Endinazyo nyinji ezyasimbe lelo siga ehwanza husimbile ne kalamu nuwino. 14 Ehwanza aje enenze tilolane nkatiyanje nkatalolana humaso. 15 Ulutengano lubhe nawe. Akundanu bhahulamuha. Shila muntu hwitawa lyakwe.