1 Louda Piibi ya kawanamwanamwaei. Iya ekalesiya bodadi Senkiliya unai yodi diyakona. 2 Ya kaibwadaigomiu taba Guiyau hesanaena kwa yogaisini. Taba yomi kabikabina doha Yaubada yona tamowai ye launamwanamwaedi ne. Na sagu saha ye henuwa kalimiuwai ne taba unai kwa sagui, matawuwuna iya hinage tamowai se bado ye sagukaliliyeidi yo yau hinage ye saguigau.

3 Yogu lautoki kwa mosei Pilisila yo Akuila,**Pilisila yo Akuila wasadi kabo Apostolo Yodi Paisowa bukana peina 18 unai ku hasili. siya helegu taupaisowa Keliso Yesu yona paisowa ne unai. 4 Yodi mauli se talamgabaeidi yau hesabagu. Ya lautokikaliliyeidi, na nige yau ya bom mo, na dagela tamowaidi luwadiyena ekalesiya bodadi maudoidi hinage. 5 Ekalesiya bodadi siya yodi numa ne unai taukoikoigogo ne hinage yogu lautoki kwa mosei kalidiyena.

Yo yogu gadosisi tamowaina Epenetasi unai yogu lautoki kwa mosei. Iya meta tamowai bagubagunana teha Eisiya unai ye kawamamohoi Keliso unai.

6 Yogu lautoki kwa mosei Maliya. Iya yomiu taupaisowabayaokalili.

7 Yogu lautoki se lau Andolonikasi yo Diuniyasi kalidiwai. Siya meta yogu hali Dius na lahinaidi maidaguwao numatutugudu unai se tolegai. Apostolo bodadi luwadiyena meta se kitahesaekaliliyeidi, yo siya Keliso unai se kawamamohoibaguna na kabo yau.

8 Yogu lautoki ye lau Ampiliyatasi, iya yogu gadosisi tamowaina Guiyau unai.

9 Yogu lautoki ye lau Ebanasi unai, iya yoma hali taupaisowa Keliso yona paisowa ta unai, yo kagu kaha namwanamwana Sitakisi unai.

10 Yogu lautoki ye lau Apelesi unai. Iya hewahewaiunu ye lobaidi, iyamo ye tolobayao na ye hemamohoiyei ede iya Keliso unai tausunumatahitahi.

Yogu lautoki ye lau Alistobulusi yona numa tamowaidiyao kalidiyena.

11 Yogu lautoki ye lau Helediyoni, iya yogu hali Dius.

Yogu lautoki ye lau Guiyau taukawamamohoiyeina siya kaiteyadi Nasisasi yona numa unai ne kalidiyena.

12 Yogu lautoki ye lau Tulupeina yo Tuluposa kalidiyena. Sinesinebadao labui ne meta Guiyau yona paisowa unai se paisowabayaokalili.

Yogu lautoki ye lau sinada Pesisi unai, iya sinebada hesau ye paisowabayaokalili Guiyau yona paisowa ta unai.

13 Yogu lautoki ye lau Lupasi, iya Guiyau yona kaisunuwa tamowaina, yo sinana unai, yau hinage ya kawasina kalinawai.

14 Yogu lautoki ye lau Asinikilitasi, Pelegonu, Hemesi, Patolobasi, Hemasi, yo kada kahao maidadiyao taumiya ne udiyedi.

15 Yogu lautoki ye lau Pilologasi, Diuliya, Neleusi ma louna, yo Olimpasi, yo Guiyau yona tamowai maudoidi maiyadiyao ne kalidiyena.

16 Bena gadosisi mamohoina unai**Gadosisi mamohoina unai: Paulo ye kuli, sumta tabuna unai bena se hailaulautokiyeidi, na sumta meta ekalesiya yodi gadosisi hekihekinoina. kwa hailaulautokiyeigomiu.

Keliso taukawamamohoiyeina bodadi maudoidi yodi lautoki se hetamalidiwa kalimiuyena.

17 Kagu kahao, ya kaibwadalakilaki kalimiuyena taba kwa kitanamwanamwa tamowai hekadiyo udiyedi, siya lauhekata kwa haidiko wa nige se miyawatanidi yo ekalesiya bodana unai haikawayagala yo kabahekalabesibesi se ginaulidi. Tamowaidi ne kwa kaihaleidi. 18 Matawuwuna tamowai doha tenem meta nige yoda Guiyau Keliso yona se paisowa na se bom mo yodi se paisowa. Yodi hedehedede se namwakalili yo tamowai se hededehesaegaibuidi, na tenem unai tamowai supusupudiyao se lupohaidi. 19 Boda maudoina yomi kawakabi wasana se lapuiyako na unai ya gwauyalakalili komiu debamiuyena. Na ya henuwa taba kwa sibasiba nuwanuwatu namwanamwadi udiyedi na bena yababa nuwanuwatudi kwa kitalobaidi na kwa kaihaleidi.

20 Nige bayaona kabo nuwadaumwali Yaubadana Satani ye saedikwaei na ye tole kaemiu ne gunidiyena.

Taba yoda Guiyau Yesu yona kabinamwa ye miya kalimiuyena.

21 Helegu taupaisowa Timoti yona lautoki ye hetamaliyawa kalimiuwai, gonogonowana doha Lusiyasi, Yasona, yo Sosipata, siya yogu hali Dius tamowaidi.

22 Yau Tetiyasi, Paulo yona leta ta taukulina, na Guiyau hesanaena yogu lautoki ya hetamaliyawa kalimiuwai.

23-24 Gaiyasi hinage yona lautoki ye hetamaliyawa. Iya meta yau yo ekalesiya bodana maudoina magai ta unai ye kitahetetegai.

Elasitasi, iya magai lakilakina ta yodi moni taukitahetetedi, yo kada kaha Kwatasi yodi lautoki se hetamalidiwa hinage.**Kulikuli beyabeyadi hekadi lausoisoi ta se kulitubei ede, Taba yoda Guiyau Yesu Keliso yona kabinamwa ye miya maudoimiu kalimiuyena. Mamohoi!

25 Yaubada ta hedebasaei! Iya gonowana ye hebayaogomiu yogu wasa namwanamwana unai, iya ede Yesu Keliso wasana ya wasaduwaiyei ta. Huya bagubagunana unai na ye laoma meta Yaubada wasa ta ye tolewadam. 26 Na Yaubada miyamiyahaina ne ye hedede yo peloweta se kulinonohaiyako bena teina huya ta unai ye masalaha tanoubu tamowaidiyao maudoidi udiyedi. Yona nuwatu ede taba maudoidi ne iya se sunumaei yo se kawakabiyei. 27 Yaubada ye bom mo ye sibasiba, na Yesu Keliso debanaena ede yoda hedebasae ye sae iya unai nige kana siga. Mamohoi!

<- Loma 15