1 Ini kaɗ nga ɗa nak, Tit, woya ini hun na jangɗohi wiriɗi. 2 Woya yaɓkooci ɓa min amb haf ciŋ ɓa, ɓa nik eɗaah cir, ɓa hendoh pesohaaɗiŋ ɓa, kosiŋ ɓa wir, wa hun na waaɗi ɓa waaɗ ɓooɓi na muñi ɓa muñ ɓa seke.

3 Wa mand ɗaa ŋ ɓitif ci, ɓa raakaat mandohaaɗi neɓ Kooh ; ɓa ɗooɓohuu, ɓa ŋoɗuu ŋ sangara, ɓa dengohee in baahiɗ, 4 ne ɓa min jangiɗ jeeg ci, ɓeem waaɗ ƴaar ciŋ ɓa na kuɓuuciŋ ɓa, 5 ɓa hendoh pesohaaɗiŋ ɓa, ɓa hool te ɓa taambkoh kahan ciŋ ɓa, ɓa nik ɓo' baahiɗ te ɓa kerhiɗ ƴaar ciŋ ɓa, ŋ ineem, ɓo' riiɓɗuu woo kiŋ Kooh.

6 Nama ñaah komaakci ƴaar ci ɓa hendoh pesohaaɗiŋ ɓa. 7 Te fu, ŋ in nu wa min ki nik ɗah, nika altiɗkohaah ŋ tum in baahiɗ na jangɗoh yurhiɗ. Jangɗohiŋ ɗa joyiɗ nawu, 8 wa wir, ali ɓo' minuu wa nihis. Wa kaɗoh ɗaa ɗah, sangiɗ ciŋ ɓoo hey kaci'e, ɓa raakuu ali in moɗaaɗi woyaah nga ɓoo.

9 Woya ñaam ci ɓa kerhiɗ ɓi raak ɓa ngaŋ in ci jen, ɓa tumee ini neɓ ɓeem, ɓa taasohuu na ɓa, 10 ɓa rokɗuu ɓa ali in, waaye ɓa teeɓohee ne ɓa cariɗ oolku keeh-keeh. Ŋ in ceem jen, ɓa hey moɗɗe jangɗohi kaɗ ŋ Kooh, Mucɗohiŋ ɓoo.

11 Jangɗoheem raakiɗ njiriñ, laam Kooh teeɓohiɗ baahohi a baahoh ɓooɓi, baahohi rangis waasiŋ muci wuu ɓooɓi jen. 12 Baahohiŋ ɗe na ɓoo weem, wa na jangɗe ɓoo ne ɓoo penduk kaañ Kooh, na waaɗ-waaɗ ciŋ adinaani. Ŋ ineem ɓoo min pes ŋ adinaanii kipes hendohuuɗ, yurhiɗ, huniɗ na waaɗ-waaɗiŋ Kooh, 13 te ɓoo sekee mbehi neɓiɗi ɓoo oolkoh : hayiŋ Yeesu Kiristaa ŋ yaki a yak, a yi Kooh, Mucɗohiŋ ɓoo.

14 A eɗohiɗ haf ce wuu ɓoo ne a tos ɓoo ŋ moɗaaɗi nu nik. Ŋ hoolɗi a hooliɗ ɓoo, a tumiɗ ɓoo cuuɓ hooliɗ, ɓoo nikka cuuɓi a raak, cuuɓi sawaran ŋ tum in baahiɗ. 15 Fu joy jangɗoh in ceem Tit, fu ñaahee ɓi na sikɗukee ɗa, fu kuƴsee ɓa, wa hun na kikilifa mitiɗ. Ali ɓo' kinaat ɗa heef !

<- Tit 1Tit 3 ->