1 Fu, ɓo' nu fu min ki nik ɗah, fu yi na atte'e morom fu, fu raakɗi ali naafkoha. Fu atte'ee morom fu ɗah, fu na atte'e haf fu, laam fu na name tum in ci a na tume. 2 Te kat, ɓoo inhiɗ ne atteeniŋ Kooh ŋ ɓi na tume in mand na ceem gaƴuk ŋ keeh.

3 Fu yi na atte'e ɓi na tume in ceem, te fu yii nam ca tum, fu liiɓiɗ ne fu hey fuse ŋ atteeniŋ Kooh e ? 4 Wala fu heef heef yaki baah kiŋ ɗe yak, na muñiŋ ɗe, na min sek kiŋ ɗe ? Te fu hotɗi hotɗi ne baah kiŋ Kooh joyiɗ ɗa ɓay ŋ ɓoƴsoh tumohaaɗ e ? 5 Ndengi fu ndeng haf na sangi fu sang ɓoƴsoh ŋ keeñiŋ ɗa, tahiɗ po fu na nangɗohe ayruk yakiɗ wuu mbehiŋ ayruki. Mbeheem, atteeni yurhiɗi hey inhasse, atteeniŋ Kooh.

6 Ŋ mbeheem, a hey wirnde yaa nu nga ɗah tumohaaɗ ciŋ ɗe. 7 Ɓi na gene tum in baahiɗ, ɓa waakohee wa ndam na cir na kaanaaɗi, Kooh na sekɗohee ɓa kipes ki heyɗi reehe. 8 Waaye ɓi na sange keeh ki te ɓa taambɗee yurhaaɗi sagu waaɗ-waaɗiŋ ɓa haf ɓa, Kooh na sekɗohee ɓa ayruk keeh-keeh.

9 Ee, miskiɗ na keeñ reehiɗ, caɗ na seke ɓo' nu na tume moɗaaɗi ɗah, ineem cambohan ŋ Yawuut ci, ɓi nikɗi Yawuut taamb nga. 10 Waaye ndam na cir na jam ca wuu ɓi na tume baahiɗ, ineem cambohan ŋ Yawuut ci, ɓi nikɗi Yawuut taamb nga. 11 Laam Kooh talsohɗi ali ɓo'. 12 Ɓi bakaaɗ jen te ɓa inahɗi nakoh ciŋ waasiŋMusaa, ɓa hey atte'se ŋ ini nikɗi waasiŋ Musaa, ɓa sooƴ. Ɓi bakaaɗ jen te ɓa inahha waasiŋ Musaa, ɓa hey atte'se ŋ waasiŋ Musaa. 13 Laam wa nikɗi haa ne ɓi na sikɗuke waasi ɓeɗ yurah ŋ fiki Kooh ; waaye e ɓi na taambɗe waasi ɓeɗ na hee ambse findi yurhiɗ.

14 Ɓi nikɗi Yawuut te ɓa rahasɗi waasiŋ Musaa, nik ne ɓa na tume ini fiisu ŋ waasi sagu yegi ɓa yeg ŋ ɗooƴ keeñ ciŋ ɓa ne wa ɗaa ɗah, ɓeɗ ɓeem, ali ɓa raakɗi waasi, ineem weɗ waasiŋ ɓa. 15 Ɓa na teeɓohe ne ini waasi nakoh, wa fiisu ŋ keeñ ciŋ ɓa. Liiɓ ɓo' namiɗ teeɓoh ineem, ŋ ini wa na yambee ɗe, wala langɗee ɗe. 16 Te wa mandan ɗaa ŋ mbehi Kooh atte'ohan in ci ɗasɗukiɗ ciŋ ɓooɓi, taamboh ŋ Kiristaani Yeesu, findi wa woyohu ŋ Yegɗohiŋ Muci mi na yegɗohe.

17 Fu yi woo ne fu Yawuut, fu gaƴukka ŋ waasiŋ Musaa, fu ndamkohee Kooh, 18 fu inhiɗ ini a waaɗ, te waasi jangɗiɗ ɗa po fu minnda inhisoh in ci baah. 19 Fu liiɓ ne fu miniɗ nook fuuliɗ ci, fu niitɗee ɓi nik ŋ ñuus, 20 fu koɗee naandiɗ ci, fu jangɗee inhaaɗiici, laam wa wooriɗ nga ɗa ne fu raakiɗ ŋ waasiŋ Musaa ki'inah na keeh mitiɗ.

21 Fu yi na jangɗe ɓinooɓi, fu jangɗanɗi haf fu e ? Fu yi na woye ne ɓo' joyɗi rok, te fu roke ! 22 Fu yi na woye ne ɓo' joyɗi njaaloo, te fu njaalo'e ! Fu yi na araamɗe kooh ci nikaaɗiici, wa ye tah fu roke in ciŋ ca ? 23 Fu yi na ndamkohe waasi te fu tumee ini wa sangoh, fu na riiɓɗe tiikiŋ Kooh ! 24 Findi Fiis ci woyoha an : « E ɗu tah cuuɓ ci cinooci ɓasee Kooh.[a] »

25 Fu Yawuut e ? Fu nguɗkiɗ e ? Nguɗkeem raakiɗ njiriñ ne fu pesoh waasiŋ Musaa ɗah ; waaye nik ne fu kerhiɗɗi waasi ɗah, nguɗkiŋ ɗa mand na nguɗkaaɗi. 26 Ɓoyi nikɗi Yawuut, a na nguɗkeeɗi findi waasiŋ Musaa woyoha. Ɓoyeem, a taambiɗ in ci waasi nakoh ɗah, Kooh amban ɗe findi nguɗkiɗ. 27 Nguɗkaaɗiineem, yi na taambɗe ini waasi nakoh, a teeɓohanɗi ne fu nikɗi ŋ keeh e, fu yi nguɗuk waaye fu kerhiɗɗi waasi te raak ɗa na Fiis ci ?

28 Yawuut keeh-keeh, wa ini na hotke ŋ ɓoyi haa ; te nguɗuk keeh-keeh weɗ ini na hotke ŋ faani haa. 29 Yawuut keeh-keeh a yi ɓoyi nika ŋ ɗooƴ ce ; nguɗuk keeh-keeh, wa na nike ŋ keeñ, wa puloh ŋ Fuuɗsi Hoolohngaani, wa pulohɗi ŋ taambiɗ nakoh ci fiisu ; te ɓoyi nika, e ɓooɓi na ɗaapee ɗa haa, e Kooh ŋ haf ce.

<- Ɓi Rom 1Ɓi Rom 3 ->