1 Fiisa inii wuu malaakaaniŋ Janguunaŋ Efes, woyaa ɗe ne : “ Yi amb hor ci yasna-kanak ci ŋ yaah-ñaahum te a tiindee ŋ harmban laampa-urus ci yasna-kanak ci, woo inii : 2 Ŋ inhiɗ ini fu na haɓɗe jen, ŋ inhiɗ pangkiŋ ɗa miskiɗi na mini fu min muñ fu seke ; ŋ inhiɗ ne fu minɗi teyɗuk añaandiɗ ci. Fu markiskiɗ ɓi na woye ne ɓa apootar po fu inahha ne ɓa na leye. 3 Fu minnda muñ fu seke, fu yaaɓiɗ lool sagu tiikiŋ ngo te fu dokukɗi finho.

4 Waaye raakiɗ ini ŋ hot nga ɗa te wa baahɗi, weɗ faɗi fu faɗ waaɗi fu waaɗee so koc. 5 Naandsuka ɗiski fu puloh, fu keennda, fu ɓoƴsoh tumohaaɗ, dokka ŋ tumohaaɗ caŋ ɗa koc. Wa nikɗi ɗah, ŋ hey hee nihse laampaaniŋ ɗa ŋ ɗiski wa nik, hanaa fu ɓoƴsoh tumohaaɗ.

6 Waaye raakiɗ ini ŋ hot nga ɗa te wa baahiɗ, sangi fu sang in ci ɓi Nikola na haɓɗe. Mi sah ŋ namiɗ ca sang.

7 Yi raak nof kerhaat ini Fuuɗsi Hoolohngaani, Fuuɗsiŋ Kooh woo ŋ Janguuci ! Yaa nu saah ɗah, ŋ hey ɗe ñamɗe ŋ rimiŋ kidgiŋ kipes ki nik ŋ ɗooƴ nguukaŋ Kooh. ”

8 Fiisa inii wuu malaakaaniŋ Janguunaŋ Ismirna, woyaa ɗe ne : “ Yi koc na Yi mirndoh, Yi kaanee te a hulitta, woo inii : 9 Ŋ inhiɗ miskiɗiŋ ɗa na ñaki fu ñak, moona fu heɗ raak-raak. Ŋ inhiɗ leyɗoh ciŋ ɓi na woye ne ɓa Yawuut te ɓa Yawuut haa, ɓa sinaagog Seytaani.

10 Fu hey raake miskiɗ waaye kina neƴƴoh. Marka, Seytaani hey ɓeke ɓi ɓo' nga ɗu ŋ kaso ne ɗu markisku, te ɗu hey raake miskiɗ neeh ndaŋkiyaah, waaye kinaat faɗ, ndengɗukaat po ali ɗu kaanoh nga sah ɗu ɓay, ŋ hey ɗu aafe kipes ki reehanɗi.

11 Yi raak nof kerhaat ini Fuuɗsi Hoolohngaani woo Janguuci ! Yi saahan, a yeganɗi miskiɗiŋ kakaan ki kanakɗoh.[a] ”

12 Fiisa inii wuu malaakaaniŋ Janguunaŋ Pergam, woyaa ɗe ne : “ Yi amb ndangi kaañiɗi, wi na nguɗe na ɓak kanak woo inii : 13 Ŋ inhiɗ ne ɗiski fu gen weɗ ɗiski ɓoofoha-buuri nik, wiŋ Seytaani, waaye fu ŋoɗiɗ nga so. Fu faɗɗi kosi fu kos nga so, po sah wa Antipas seedeeniŋ ngo woor apse. A apohu ŋ kur ɗu, ŋ ɗiska Seytaani gen.

14 Waaye ɓi in rek, ceɗ ŋ hot nga ɗa te ca baahɗi : Raakiɗ ŋ ɓooɓiŋ ɗa, ɓi taambiɗ jangɗoh ciŋ Balaam, yi jangɗee Balak ne a bakaaɗɗukoh Israayel ci po ɓa ñammba sepet ci seeƴkohu wuu kooh ci nikaaɗiici, ɓa faankoheeɗa faankoh sangohuuɗ.[b] 15 Namiɗ raak ɓi ɓo' ŋ ɓooɓiŋ ɗa ɓi taambiɗ jangɗoh ciŋ ɓi Nikola. 16 Mbaa ! Ɓoƴsoha pesohaaɗ wala ŋ hey haye win-win na ndangi na pule ŋ nguɓiŋ ngo ne ŋ hiñoh ɓooɓeem.

17 Yi raak nof kerhaat ini Fuuɗsi Hoolohngaani woo Janguuci ! Yi saahan, ŋ hey ɗe eɗe kañam ki na woyse maan[c] wi ɗasɗukiɗi, ŋ nam ɗe eɗ atoh yaanow, atoh fi fiisu tiik as wi ali ɓo' inahɗi ɗal ɓoyi rahsana. ”

18 Fiisa inii wuu malaakaaniŋ Janguunaŋ Tiyatiir, woyaa ɗe ne : “ Kuɓkiŋ Kooh yi has ciŋ ɗe siñaarɗe haa jaal yongkaah, kot ciŋ ɗe mannda na moosi foocu po wa melciɗe, woo inii : 19 Ŋ inhiɗ ini fu na haɓɗe jen, na waaɗi fu waaɗoh, na kosi fu kos, na waaɗi fu waaɗ taambkohoh, na mini fu min muñ fu seke. Ŋ hotiɗ ne ini fu na haɓɗe jen woti-woti weɗ uup wa koc.

20 Waaye raakiɗ ini ŋ hot nga ɗa te wa baahɗi, faɗi fu faɗ Yesabel ŋ ini neɓ ɗe, ɓitɓi na woye ne a woosuuɗ. A muuƴɗee ñaam ciŋ ngo, a jangɗee ɓa faankoh sangohuuɗ na ñam sepet ci seeƴkohu wuu kooh nikaaɗi. 21 Ŋ oniɗ ɗe in maañiɗ ne a ɓoƴsoh pesohaaɗ waaye a sangiɗ ne a faɗanɗi faankoh sangohuuɗ. 22 Marka, ŋ hey ɗe faane kosaay miskiɗ, a yi na ɓi na njaalo'e na ɗe ne ɓa ɓoƴsohɗi pesohaaɗ, ɓa faɗ tumohaaɗ ciŋ ɗe ɗah. 23 Ŋ hey ape kuɓuuciŋ ɗe, te Janguuci jen hey inhe ne ñam inah in ci ɓooɓi na liiɓe na ci ɓa na maɗe. Ŋ hey wirnde yaa nu nga ɗu ɗah, ini fu tum.

24 Ini kaɗ nga ɗu, ɗu ɓi ɓinooɓi te ɗu ɓaahha ŋ Janguuniŋ Tiyatiir, ɗu ɓi taambɗeeɗi jangɗohiŋ ɓoyeem, ɗu ɓi inahɗi sah in ci ɗasɗukiɗ ci nooɗiɗ ciŋ Seytaani findi ɓa na woyohee wa, mi yii woo ɗu ne ŋ deganɗi ɗu in ɓitiɗ wiiriis. 25 Waaye ini ɗu raak, ŋoɗaat nga po mbaɗna ŋ hayan.

26 Yi saahan te a ris taambiɗ nakoh ciŋ ngo po ŋ mirndaana, ŋ hey ɗe dege ŋ ɗafuk cuuɓ ci. 27 A hey ɓa adgiɗe na salma, a pooksoh ɓa findi meeme na ruñuɓsohohse. 28 A raak hatil findi wi ŋ rahsoh ŋ Baabiŋ ngo. Te ŋ hey ɗe eɗe mbeedi, hori na ɓaaɓ. 29 Yi raak nof kerhaat ini Fuuɗsi Hoolohngaani woo Janguuci. ”

<- Teeɓ ki 1Teeɓ ki 3 ->