Link to home pageLanguagesLink to all Bible versions on this site

1 Wa malaakaana reehiɗ woo, ŋ kerahha ŋ Eel ci hooso meeɓuuɗ findi hooso mboolo yakak, wa woyeeɗa ne :

« Halleluya !
Koohiŋ ɓoo yakɗaah,
Muci na hatili wuu ce.
2 Ee di',
atteeniŋ ɗe keeh
te wa yurhiɗ !
A atte'iɗ toonkohi yakki
yi yahrohee kehƴi na toonkiŋ ɗe.
Ñaam ciŋ Kooh, Kooh wirndukɗiɗ ɓa,
a meekissa toonkohi ñif miŋ ɓa aamuk. »
3 Hoosooca woyissa ne :
« Halleluya !
Ɗuukriŋ kur-taahi na dohe wii,
kurkan kuruk po faw. »
4 Yakak ci ndaŋkiyaah-kanak na nikiis ci (24), na pesiɗ ci nikiis ci, ƴekka ñaamkeeɗa Kooh yi ɓoof ŋ ɓoofoha-buuri ; ɓa woyeeɗa ne : « Amiin ! Halleluya ! »
Kañam kiŋ kilookiŋ Kuyiŋ Mbaali ƴini
5 Wa yakak ca na pesiɗ ca woo po ƴutta, raakka hoosoori puloh ŋ ɓoofoha-buuri woosa ne :
« Ƴeekaat Koohiŋ ɓoo,
ɗu ɓi ñaam ciŋ ɗe jen,
ɗu ɓi nup ɗe,
ƴin na yakak ! »
6 Wa hoosoora ƴut woo, ŋ kerhissa hooso haa hooso mboolo yakak ɗuuɗeeɗa findi masuɓ laayiɗ, ɗiiɗɗeeɗa findi inding yakiɗ, wa woyeeɗa ne :
« Halleluya !
Kooh, Heɗ ɓoo,
Heɗ-hatili,
tufkiɗiɗ Nguuriŋ ɗe.
7 Ɓoo sumaat,
ɓoo neɓu te ɓoo yakiɗ ɗe,
kilookiŋ Kuyiŋ Mbaali ƴini reyiɗ
te kilook ce kooɗkiɗ po ƴutiɗ.
8 A onuuɗ ne
a ɓekuk kulɓa leeŋ eɗfiɗ,
melciɗ, hooliɗ les. »
Kulɓaaki leeŋeem weɗ tumohaaɗ ci yurhiɗ ciŋ ɓo'-Kooh ci.

9 Ŋ ineem, malaakaani woosa so ne « Fiisa ne : Ɓa neɓɗiɗ, ɓooɓi ɓeeɗku ŋ kañam kiŋ kilookiŋ Kuyiŋ Mbaali ƴini ! » Ƴutta a degga nga ne : « Woo cii, ca woo ciŋ Kooh te ca keeh. » 10 Ŋ keennda ŋ kot ciŋ ɗe ne ŋ ñaamuk ɗe, waaye a woosa so ne : « Muk ! Kina wa tum, ŋ ñaam findiifu, findi ɓi ɓaah na ɗa kos te ɓa rissa amb keeh ki Yeesu teeɓoh. Ñaamka Kooh, laam keeh ki Yeesu teeɓoh weɗ nik ŋ liiɓiŋ woosuuɗ ci. »

Ƴaari rap pansi yaanwi
11 Wi malaakaani ƴut woo na so, ŋ hotta Eel ci rangsukiɗ, panis yaanow pulla. Yi rapee ɗe teeku Wooriɗi, Keeh-keehi. Atteeniŋ ɗe na hiñohiŋ ɗe lakiɗ waas. 12 Has ciŋ ɗe kaɓee findi jaal yongkaah, hafiŋ ɗe ɓekuusa mbahne-buur laayiɗ. Tiik fiisuusa nga ɗe, tiiki ali ɓo' inahɗi ɗal a yi. 13 A ɓekkee kulɓa hooƴuuɗ ŋ ñif. A teeksee "Woo kiŋ Kooh".

14 Hiñohoh ci nik ŋ Eel ci ñaakɗeeɗa ɗe, ɓa rapee ɓi panis yaanow, ɓa ɓekukka kulɓa leeŋ eɗfiɗ, yaanow, hooliɗ les. 15 Ndang kaañiɗ pulla ŋ nguɓiŋ ɗe, ndangi a laɓohan cuuɓ ci. A hey ɓa adgohe na salma, a hey pooƴoote ŋ pooƴoha biiñiŋ ayrukiŋ Kooh, yi Heɗ-hatil. 16 Tiikii fiisseen ŋ kulɓaakiŋ ɗe teemb rambiŋ ɗe "Buuriŋ buur ci, Heɗiŋ heɗ ci".

17 Ŋ hotta malaaka wiiriis tufkiɗ ŋ ɗooƴ nohi, a leehukka sel ci na eleerke ŋ ɗafka ɗafka ne : « Hayaat ɗu coh ndii ŋ kañam ki yakki Kooh onoh. 18 Hayaat ɗu ñam sepet ciŋ buur ci, na ciŋ kilifaaciŋ soldaar ci, na ciŋ hiñohoh ci, na ciŋ panis ci na ɓi rapee ca, na fiɗaaf ciŋ ɓooɓi jen, ñaam na nikaaɗi ñaam, ƴin na yakak. »

19 Ŋ ineem, ŋ hotta ɗoopti na buur ciŋ kehƴi na hiñohoh ciŋ ɓa, ɓa ambsukohha ne ɓa hiñoha na Yi rapee pansi, a yi na hiñohoh ciŋ ɗe.

20 Ɗoopti ambuusa, a yi na woosuuɗi leyohi. Woosuuɗi leyoheem, a yi meeɗ tum in feyohiɗ ŋ fiki ɗoopti ne a muuƴiɗ ɓooɓi raak mandargaaniŋ ɗoopti te ɓa meeɗta ñaamuk nataaliŋ ɗe. Ɓa kanak jen, ɓa njafuusa kaanaaɗi ŋ kalaŋ yongkaaha, ɗiska suufara kaɓe. 21 Ɓi tas apuusa na ndangi pulohee ŋ nguɓiŋ Yi rapee pansi, sel ci jen ñammba ŋ sepet ciŋ ɓa po ca kappa.

<- Teeɓ ki 18Teeɓ ki 20 ->