1 Wa degga ɓi neeh, Yeesu dokukka Kapernawum. Ɓooɓa kerahha ne a yaa ŋ kahan ɓa, 2 mboolo laayiɗ cohha ŋ ɗiska, wa riiffa po, nikoha sah raakisseeɗi ŋ nguɓu kahna. A woyeeɗa ɓa woo kiŋ Kooh.

3 Ɗekka po ɓa kommba ɗe ƴaar lafñiɗ, ƴaar nikiis ɓeɗ gaalɗohee ɗe ŋ faankoha. 4 Ɓa minɗi ree na ɗe ŋ Yeesu sagu findi ɓooɓa laayohe, tahha po ɓa nihissa ŋ poonaŋ taɓaha teemb ŋ ɗiska Yeesu nike, ɓa yoorra ƴaara nga na faankohaanaŋ ɗe. 5 Wa Yeesu hot ɓa na findi ɓa kosoh, a woosa lafñiɗa ne : « Ƴaariŋ ngo, fu ɗaasuuɗ bakaaɗ ciŋ ɗa. »

6 Raak ɓi ɓo' ɓaah ŋ jangɗohoh caŋ waasiŋMusaa ɓoofiɗ. Ɓa woyeeɗa ŋ ɗooƴ ɓa an : 7 « Ƴaarii a kaañoh woo ineem na ? A ɗalee Kooh. Ali ɓo' minɗi ɗaasoh bakaaɗ ɗal Kooh dong ! » 8 Yeesu jaarra inah ina ɓa liiɓee ŋ ɗooƴ hel ciŋ ɓa, a woosa ɓa ne : « Wa ye tah ɗu raakee liiɓohaaɗ mand ɗaa ? 9 Ŋ woo ƴaarii ne : “ Fu ɗaasuuɗ bakaaɗ ciŋ ɗa ” wala ŋ woo ɗe ne : “ Kurka, ɓaya faankohaaniŋ ɗa, fu tiind. ” A winde uup yooɓ ? 10 Waaye, ne ɗu inah ne Kuɓkiŋ ɓoyi raakiɗ hatili a min ɗaasoh bakaaɗ ŋ kehƴi - markaat rek. » A woosa ƴaara ne : 11 « Ñam woo ɗa wa, kurka fu ɓay faankohaaniŋ ɗa, fu haad. » 12 Ŋ ɗiska ɗiska, ƴaara kurukka ŋ fiki ɓooɓa, a ɓayya faankohaanaŋ ɗe, a pulla. Ɓooɓa jen feyuusa, ɓa yakɗeeɗa Kooh, ɓa woyeeɗa ne : « Ɓoo hotohɗi in mand an ! »

13 Yeesu dokkissa ŋ ɓakaŋ cookma. Ɓooɓa jen raakeeɗa ɗe nga, a jangɗeeɗa ɓa.

14 Wa Yeesu kaɗe, a hotta Lewi kuɓkiŋ Alfe, ɓoofiɗ ŋ ɗiska a na juuti'ohe. A woosa ɗe ne : « Ñaakiɗ to. » Lewi kurukka, ñaakiɗta ɗe.

15 Wa raakka mbeh, Yeesu nikka ŋ kahan Lewi na taalubeeciŋ ɗe, a ñameeɗa na ɓa na juuti'oh laayiɗ na bakaaɗoh laayiɗ ; ɓo' laayiɗ mand ɗaa nikee ñaakɗeeɗa ɗe. 16 Jangɗohoh caŋ waasi ɓaahee ŋ Farisen ca hotta ɗe ñameeɗa na ɓooɓeem, ɓa woosa taalubeeciŋ ɗe ne : « Wa ye tah kilifaaniŋ ɗu ñamee na juuti'oh ci na bakaaɗoh ci ? » 17 Yeesu kerahha ɓa, a loffa ɓa ne : « Ɓooɓi kosaayɗi etohɗi paƴoh, e kosaayiɗ ci etoh paƴoh. Ŋ hayɗi ne ŋ ɓeeɗuk ɓooɓi yurhiɗ ci waaye ŋ hay ne ŋ ɓeeɗuk bakaaɗoh ci. »

18 Wa raakka mbeh, taalubeecaŋ Yahya Ɓoktohi na Farisen ca oreeɗa. Ɓi ɓo' hayya ŋ Yeesu, ɓa woosa ɗe ne : « Wee tah hey ɗah taalubeeciŋ Yahya Ɓoktohi na ɓiŋ Farisen ci ore, ɓiŋ ɗa oruu ? » 19 A loffa ɓa ne : « Hanheeci hay kilook miniɗ or te raak heɗ kilooki yii na ɓa e ? Wa minɗi nik, feeh a yii na ɓa ɗah. 20 Waaye, wa hey raake jamano heɗ kilooki kooɗohu nga ɓa, ŋ ndeem, ɓa hey ore.

21 Ali ɓo' na daafeeɗi kulɓa maañiɗ na seeket as ; mbaa seeketi hey nookɗohe kulɓaaki, kulɓaaki uup nga faaruk. 22 Ali ɓo' na nameeɗi tum biiñi asi na soñe ŋ mbohos und maañiɗ ; mbaa biiñi asi hey pooke mbohoseem, biiñi na mbohosi jen yahrukoh. Biiñ as joy tumu ŋ mbohos as. »

23 Wa nikee ŋ mbehi na iɗsiɗkohse, Yeesu na taalubeeciŋ ɗe kaɗeeɗa, ɓa taammba ŋ yohon caŋ beleeca. Ŋ waasa, taalubeeciŋ ɗe piikeeɗa nga ca. 24 Farisen ca woosa ɗe ne : « Marka, wa ye tah taalubeeciŋ ɗa haɓɗee ini waasiŋ ɓoo sangoh ŋ mbehi na iɗsiɗkohse ? » 25 Yeesu loffa ɓa ne : « Mand haa ne ɗu moosɗi jangoh ina Dawuuda haɓɗee wa a aɗuk, a raakɗi ñamaah, a yi na ɓooɓa hunee na ɗe ? 26 A aas ŋ Kahan Kooh. Wa nikee ŋ jamanoonaŋ Abiyatar, seeƴkiɗoha yakka. Dawuuda ɓayya mbuuruuca degsee ŋ taaɓla wuu Kooh a ñammba nga ca, a nammba eɗ ɓooɓa hunee na ɗe.[a] Te ali ɓo' joyɗi ñam mbuuruuceem ɗal seeƴkiɗoh ci.[b] » 27 A degiɗta ɓa nga ne : « A ɓo' tah mbehi na iɗsiɗkohse waaku, mbehi na iɗsiɗkohse tahɗi ɓo' feru. 28 Kon mbaa Kuɓkiŋ ɓoyi a yi Heɗ mbehi na iɗsiɗkohse sah. »

<- Maarko 1Maarko 3 ->