1 Wa Kooh wiis na ɓaaɓa, kilifaacaŋ seeƴkiɗoh caŋ waasiŋMusaa na yakak caŋ cuuɓi cohha ne ɓa min apɗuk Yeesu. 2 Ɓa tokɗukka ɗe, ɓa ɓayya ɗe, ɓa eɗta ɗe Pilaat, goornooraŋ kur ka.

3 Ŋ ineem, Yudaa hotta ne Yeesu yi a eɗndohee hey apse, inwaaso ammba ɗe, a kaɗta ŋ kilifaacaŋ seeƴkiɗoh ca na yakak ca, a wikka ɓa haalsa, hanjar ca ndaŋkiyaah-kaahay (30) ca. 4 A woosa ɓa ne : « Ŋ bakaaɗiɗ, ŋ degiɗ ɓoyi tumɗi in ŋ yaah ciŋ ɗu ne a apu ! »

Waaye ɓa woosa ɗe ne : « Waas ɓoo ye nga ? A fu inah. » 5 Weɗ Yudaa njafoh hanjar ca ŋ Kahan Kooh, a pulla, a ɓayya niy, a kaɗta harka.

6 Kilifaacaŋ seeƴkiɗoh ca parahha ca, ɓa woosa ne : « Wii, wa candoom ñif aamkiɗ. Ɓoo minɗaa ɓek ŋ koporiŋ Kahniŋ Kooh. » 7 Ɓa cohha ɓa kerhiɗohha ŋ woo, ɓa ɓayya kopor ka, ɓa romohha wa yohnaŋ mahoha, acoha ɓooɓa genɗi kur ka. 8 Weɗ tah yohna teekuusa po woti, yohniŋ ñif mi.

9 Taambohha ndeem, ini woosuuɗi Yeremi woyee raakka an : « Ɓa ɓayiɗ hanjar ca ndaŋkiyaah-kaahay (30) ca, ineem weɗ a car ŋ Israayel ci. 10 Ɓa eɗohiɗ ca ne ɓa rom yohniŋ mahohi, findi Heɗ ɓoo woyohee so wa. »[a]

11 Ŋ ini kaɗ ŋ Yeesu, wa a ɓayu ŋ fiki Pilaat goornoora, yeem meekissa ɗe ne : « A fu buuriŋ Yawuut ci e ? » Yeesu loffa ɗe ne : « Fu woyiɗa. » 12 Waaye a lofɗi ali in ŋ in ca kilifaacaŋ seeƴkiɗoh caŋ waasiŋ Musaa na yakak ca yambee ɗe. 13 Pilaat woosa ɗe ne : « Ŋ woo ne : fu kerahɗi in ci ɓa na woyɗee ɗa jen e ? » 14 Waaye Yeesu lofɗi ɗe ŋ ali in, ineem feyya goornoora lool.

15 Feetiŋ Paak reyeen ɗah, goornoor meeɗ ɓa meeɗ faɗsiɗ ambuuɗ yino, e mboolndi meeɗ ɗe tan. 16 Waam raak ɓa raakiɗ ƴaar inhuuɗ ya taƴsee ŋ kasoona, a teeksee [Yeesu] Barabaas. 17 Mboolnda jen nikee cohiɗ ŋ ɗiskaŋ Pilaat, a woosa ɓa ne : « Ɗu waaɗ ne ŋ faɗsiɗ ɗu ɓa, [Yeesu] Barabaas wala Yeesu yi na woyse Kiristaa ? » 18 A inheen ne waaɗa ɓooɓa waaɗ Yeesu, weɗ tah kilifaaca degga ɗe ŋ yaah ciŋ ɗe.

19 Wa Pilaat ɓoof ŋ ngelohaana a atte'eeɗa, ɓitiice woosohha woo kii nga ɗe an : « Kina raakɗoh ali in na ƴaari yurhiɗeem, woti ŋ heeƴiɗ heeƴ miskiɗ nga so saguuce. » 20 Kilifaacaŋ seeƴkiɗoh ca na yakak ca hiireeɗa mboolnda ne ɓa woyaat ne Barabaas faɗsassaat, Yeesu apu.

21 Goornoor kooɗissa woo ka woosa ɓa ne : « Ɗu waaɗ ne ŋ faɗsiɗ ɗu ya ɓa ŋ ƴaaɓi kanak cii ? »

Ɓa loffa ne : « Barabaas. »

22 Pilaat woosa ɓa ne : « Moo ŋ tuman Yeesu yi na woyse Kiristaani na ? »

Ɓa jen ɓa woosa ne : « A daaƴsaat ŋ kurwaa ! »

23 A woosa ɓa ne : « A haɓiɗ ye in moɗaaɗi ? »

Ɓa ɓaatta woo ŋ ɗafka ne : « A daaƴsaat ŋ kurwaa ! »

24 Ɓa uupeeɗa nga uup ɗuuɗ, tahha po Pilaat hotta ne a miniɗɗi ɓa in, weɗ a ɓayoh masuɓ, a ɓohñukka ŋ fikiiɓa, a woosa ne : « Inii, ŋ hooliɗ nga, ŋ ɓaahɗi ŋ aami ɗu aaman ñif miŋ ƴaarii. A ɗu inah naa ! »

25 Ɓa loffa ɗe jen ne : « Hey ɗah wa ñaakiɗ ɓoo na kuɓuuciŋ ɓoo ! »

26 Pilaat faɗsiɗta ɓa Barabaas, a laɓɗukka Yeesu leraw po ƴutta, a eɗohha ɗe ne a daaƴu ŋ kurwaa.

27 Weɗ soldaar caŋ goornoora ɓayoh Yeesu ŋ leero kahna, ɓa willa ɗe findi ɓa hend jen. 28 Ɓa wolla kulɓaacaŋ ɗe, ɓa ɓekiɗta ɗe palto ruumind coy. 29 Ɓa teɗiɗta ɗe mbahne-buur, ɓa teɗohhaa ñapir, ɓa deggaa ŋ hafiŋ ɗe, ɓa degiɗta ɗe ndooɗ caaɓees ŋ yaahiŋ ɗe ñaahmi, ƴutta ɓa ƴekɗeeɗa ɗe, ɓa njembteeɗa ɗe an : « Ɓoo ɓii kañiɗ ɗa buuriŋ Yawuut ci ! » 30 Ɓa tuhseeɗa ɗe, ɓa ɓayya ndooɗaŋ caaɓsa, ɓa laɓeeɗa ɗe wa ŋ haf. 31 Wa ɓa njembit ɗe po ƴutta, ɓa wolla paltoona ɓa ɓekɗee ɗe, ɓa ɓekɗissa ɗe kulɓaacaŋ ɗe, ɓa ɓayeeɗa ɗe ne ɓa daaƴaa ɗe ŋ kurwaa.

32 Wa soldaar ca pulee kur ka, ɓa coh na ƴaar gen Sireen teeku Simong, ɓa junnga ɗe ne a deguk kurwaaniŋ Yeesu. 33 Wa ɓa ree ɗiska na woyse Golgota, wa tokis "Ƴoh-haf", 34 ɓa eɗta Yeesu biiñ ambsohuuɗ na in aayiɗ ne a an, Yeesu ƴoohhaa, a waaɗɗi an.

35 Wa ɓa daaƴ ɗe ŋ kurwaa po ƴutta, ɓa piilohha kulɓaacaŋ ɗe ne ɓa paysoh ca, 36 ɓa ɓooffa, ɓa niiɗeeɗa ɗe. 37 Ɓa daaƴeen in, wa tiimmba hafiŋ ɗe ne ɓa teeɓoh ini tah ɗe apu. Inii weɗ ɓa fiisee nga : « Yii a Yeesu buuriŋ Yawuut ci. » 38 Nguɗndukohoh kanak daaƴseen na ɗe, yii lahha ɗe yaah-ñaahum, yi tas lahha ɗe yaah-sing.

39 Ɓooɓa taambee ŋ ɗiska njembteeɗa ɗe, ɓa kuɗteeɗa haf, ɓa ɓaseeɗa ɗe 40 an : « Ngec ! Fu yi woyee ne, fu hey yahrohe Kahniŋ Kooh, fu taɓahisa ŋ neeh kaahay, mucɗa haf fu ! Nik ne a fu Kuɓkiŋ Kooh ɗah, ruhsa ŋ kurwaani. »

41 Kilifaacaŋ seeƴkiɗoh caŋ waasiŋ Musaa na jangɗohoh caŋ wa na yakak ca nameeɗa ɗe njembit an : 42 « A mucɗiɗ ɓinooɓi, a minɗi muciɗ haf ce ! Nik ne a yi buuriŋ Israayel ɗah, a ruhsaat ŋ kurwaani win-win te ɓoo hey ɗe kose ! 43 A wik haf ce Kooh, nik ne Kooh waaɗiɗ ɗe ɗah, a naafaat ɗe kotii. A woo ne a yi Kuɓkiŋ Kooh haa e ! » 44 Nguɗndukohoh ca daaƴsee na ɗe nameeɗa ɗe ɓasoh ɗaa.

45 Ina kooɗoh ŋ njooloor, kehƴi jen nikka ŋ ñuus ini ree wahtu kaahay. 46 Wa wahtuuca kaahay ca hee reehe, Yeesu leehukka ŋ ɗafka an : « Elii, Elii, lema sabahtani ? [b] » Wa tokis "Koohiŋ ngo, Koohiŋ ngo, wa ye tah fu faɗta so ?"

47 Ɓi ɓo' ɓaah ŋ ɓa nikee ŋ ndaam kerahhaa, ɓa woosa ne : « A na ɓeeɗke Ilyas ! » 48 Yino nga ɓa arra nup, ɓayya daah, a hooƴcaa ŋ masuɓ raakiɗ bineegar, a tokkaa ŋ lecem ndooɗ, a eɗta ɗe ne a an. 49 Waaye ɓinooɓa woyeeɗa ne : « Faɗa ɓoo marak andi Ilyas hey ɗe hee hirpe ! »

50 Yeesu leehkissa ŋ ɗafka, a nguɗta.

51 Teemb ndeem, ridoona ɗasɗe Ɗiska Hoolohngaanaŋ[c] Kahnaŋ Kooh faarukka tareet ini kooɗoh ɗafka po kehƴa, kehƴi yoondɗukka, atoh ci yakak ci ɓessa. 52 Ruy-ruy ci rangsukka, ɓo'-Kooh laayiɗ ɓi inah ne ɓa kaaneen, hultiɗuusa. 53 Ɓa pulohha ruy-ruy ca. Ŋ finho hultaŋ ɗe, ɓa aassa ŋ ɗooƴ Yerusalem, ɓa teeɓukka ɓo' laayiɗ.

54 Soldaar ca niiɗee Yeesu na ƴaara adgohee ɓa, hotta ina raak jen, na findi kehƴi yoondɗukoh, ɓa feyuusa keeh-keeh, ɓa woosa ne : « Wa keeh ne a nikee Kuɓu Kooh. »

55 Ɓitiɓ laayiɗ nikee nga, ɓa cangtiɗukka usiɗ, ɓa markeeɗa. Ɓitiɓ ceem ñaakɗohoh Yeesu Galile ne ɓa taambkoh ɗe. 56 Ɓii ɓaahee nga ɓa : Mari Makdala, Mari yaayiŋ Saak na Suseef, na yaayiŋ Saak na Saaŋ, kuɓuuciŋ Sebede.

57 Wa niina ree, ƴaar teeku Suseef hayya. A nikee ɓo' raakiɗ, a genee Arimate te a ɓaahee ŋ taalubeeciŋ Yeesu. 58 A kaɗta ŋ Pilaat, a meekissa ɗe fiɗaafaŋ Yeesu, Pilaat nakohha ne a eɗsaata.

59 Suseef ɓayyaa, a ullaa na uuf leeŋ hooliɗ, 60 a ɓekkaa ŋ ruy-ruyi a haɓɗiɗee haf ce, ruy-ruy as acuuɗ ŋ hur atoh. Ƴutta, a pilnginnda atoh yakak, a ranngaa, a cootta. 61 Mari Makdala na Mari yi yinoori nikee nga ɓoofiɗ, yurhiɗkohiɗ na ruy-ruya.

62 Ŋ mbeha taamb ŋ reehɗohaanaŋ mbeha na kooɗkohse, kilifaacaŋ seeƴkiɗoh caŋ waasiŋ Musaa na Farisen ca hunnda, ɓa kaɗta ŋ Pilaat, 63 ɓa woosa ɗe ne :

« Kilifaani, ɓoo naandsukiɗ ne, wi ñaañohohii na pese, a woyiɗ ne : “ Ŋ kaan po wa raak neeh kaahay ɗah, ŋ hey hulte. ” 64 Mbaa nakoha ruy-ruya niiɗu po neeh ci kaahay ci coot, ne taalubeeciŋ ɗe kaɗuu roka fiɗaafaŋ ɗe, ɓa woyuu ɓooɓi ne a hultiɗ. Kon a leyi mirndoh weem uupan moɗaaɗi wa koc. »

65 Pilaat woosa ɓa ne : « Soldaar ɓeɗɗi, kaɗaat ɗu niiɗa ruy-ruya findi ɗu waaɗoh. » 66 Ɓa kaɗta, ɓa kooɗukka findi ɓaa hee wa niiɗohe, ɓa reewwa atoh fa ŋ nguɓaŋ wa, ɓa tummba nga mandargaani teeɓoh ne wa ranguuɗ, ɓa tufkiɗta soldaar ca ŋ ɗiska.

<- Macce 26Macce 28 ->