1 Yeesu woosa ɓa ne : « Ŋ jamanooneem, Nguuriŋ-Ɗafki mandan na inii : Ɓa nikee cafaƴ ndaŋkiyaah ɓi kee taambka heɗ kilooki, yaa nu nga ɓayya laampaaniŋ ɗe. 2 Cafaƴ ci yatuus ci nikee cafaƴ naandiɗ, yatuus ci tas nikka ñaañiɗ. 3 Yatuus ci naandiɗ ci, wi ɓa kaɗee, ɓa ɓayndohɗi diwliin wuu laampaaciŋ ɓa ; 4 waaye ñaañiɗ ci, wi ɓa kaɗe, yaa nu nga ɗah, ɓayndoheen diwliin ŋ inaa.

5 Wi wa kaɗ po heɗ kilooki hooɓiɗta hay, ɓa pani'uusa jen, ɓa neeheeɗa. 6 Ngaŋ ndengelnde weka, ɓa kerahha leehuk an : “ Heɗ kilooki hiiɗ ! Kaɗaat ɗu taambkaa ɗe ! ” 7 Weɗi cafaƴ ca kurkoh, ɓa haɓɗeeɗa laampaacaŋ ɓa. 8 Naandiɗ ca yatuus ca woosa ɓinooɓa ne : “ Laampaaciŋ ɓoo ca ɗii ƴim, onaat ɓoo ŋ diwliin ciŋ ɗu. ” 9 Ñaañiɗ ca woosa ɓa ne : “ Muk ndaa ciŋ ɓoo doyanɗi ɓoo te ca doyanɗi ɗu ; kaɗaat ɗu roma ŋ toonoh ci. ”

10 Weɗi ɓa kaɗoh roma, heɗ kilooki hayya ŋ finhooɓa. Ɓa kooɗkee po ƴutta hunnda na ɗe, ɓa aassa kahna kilooka joy haɓɗohu, buntaanaŋ kahna ranguusa.

11 Wa degga ƴissuut, cafaƴ ca ɓinooɓa hayya, ɓa woosa ne : “ Kilifaani, kilifaani, rangsiɗa ɓoo ! ” 12 A loffa ɓa ne : “ Ñam woo ɗu wa te wa keeh, ŋ inahɗi ɗu. ” » 13 Yeesu degga nga ne : « Kon kinaat neeh laam ɗu inahɗi mbehi na wahtuuni Kuɓkiŋ ɓoyi hayohan.

14 Wa nam mand na ƴaari ɓaaɓe, a ɓeeɗukka ñaam ciŋ ɗe, a dengkohha ɓa taambkohiŋ raak-raakiŋ ɗe. 15 A eɗta yaa nu nga ini a min ɓay ; yi koc saaku kopor yatuus, yinoori saaku kanak, yi tas saaku yino. Ƴutta, a cootta. 16 Yi eɗu saaku yatuus arra kaɗ, a toontukka na ca po ca rimmba saaku yatuus wiiriis. 17 Yi eɗu saaku kanak nammba tum ɗaa, ca rimmba saaku kanak wiiriis. 18 Waaye yi eɗu saaku yino kaɗta acca nung, a ɗasiɗta koporiŋ kilifaaniŋ ɗe nga.

19 Wa kilifaani ɓaaɓ maañiɗ po a hayya, a woosa ɓa ne ɓa teeɓaat ɗe findi ɓa tumoh na koporiŋ ɗe. 20 Ya eɗsee saakuuca yatuus ca hayya na ca, a woosa ne : “ Kilifaani, fu dengkohee so saaku yatuus, ŋ toontukiɗ na ca po ŋ raakissiɗ saaku yatuus, ceɗi cii. ” 21 Kilifaani woosa ɗe ne : “ Wa baahiɗ, fu ñaam baahiɗ cariɗ oolku ; fu cariɗ oolku ŋ in ci ƴin ci weɗ tah ŋ hey ɗa dengkohisse in laayiɗ. Haya ɓoo ɓaah sumi ŋ sum. ”

22 Ya eɗsee saakuuca kanak ca nammba kaɗ woosa kilifaana ne : “ Kilifaani, fu dengkohee so saaku kanak, ŋ toontukiɗ na ca po ŋ raakissiɗ saaku kanak ; ceɗi cii. ” 23 Kilifaana woosa ɗe ne : “ Wa baahiɗ, fu ñaam baahiɗ cariɗ oolku ; fu cariɗ oolku ŋ in ci ƴin ci weɗ tah ŋ hey ɗa dengkohisse in laayiɗ. Haya ɓoo ɓaah sumi ŋ sum. ”

24 Yi eɗsee saakndi yinoori hayya, a woosa ne : “ Kilifaani, ŋ inheen ne fu ɓo' miskiɗ, fu na nguɗe ini fu sokɗi, fu ɓeenee ŋ ɗiski fu saawɗi ; 25 ŋ neƴƴoh neƴƴoh, ŋ ɓayya koporiŋ ɗa, ŋ accaa. Weɗi wii, ɓayaa. ” 26 Kilifaani woosa ɗe ne : “ Ñaami baahaaɗiini tirɓiɗi ; fu inheen ne maa nguɗe ini ŋ sokɗi, ŋ ɓeenee ŋ ɗiski ŋ saawɗi, 27 fu mineeɗi ɓay koporiŋ ngo ŋ ɗaakoh kopor ci ne ŋ hay ɗah, ŋ raaka rimɗiɗ to in e ? 28 Ɓayaat saakndi nik na ɗe, ɗu eɗa yi raak saakuuci ndaŋkiyaah ci.

29 Laam ɓoyi raak hey ɓaatse po a laayiɗ lool, waaye ɓoyi raakɗi, ini ƴissuuti a amb sah hey naafse nga ɗe. 30 Te ñaami raakaaɗi njirñi, mbetaat ɗe ŋ ñuusa ŋ hara, ɗiska fuɗ na ɗoɓɗoh sis raak. ”

31 Kuɓkiŋ ɓoyi hay ŋ yaki a yak na malaakaaci jen ɗah, a hey ɓoofe ŋ ɓoofoha-buuri nik wiŋ ɗe, wi na teeɓohe yaki a yak. 32 Cuuɓ ci jen cohɗohu ŋ fikiice. A paysohee ɓum na ɓum, findi niiɗoh na talsohohe mbaal ci na pe' ci. 33 Te a hey ɓaye mbaal ci yaah-ñaahum, a ɓay pe' ci yaah-sing.

34 Ŋ ineem, buuri hey woye ɓi nik ŋ ñaahmiŋ ɗe ne : “ Hayaat ɗu ɓi Baabiŋ ngo barke'iɗ, ɓayaat Nguuri a kooɗkiɗee ɗu wa adinaani feru po wi. 35 Laam ŋ aɗkeen, ɗu onnda so ŋ ñammba. Ŋ sifaɗkeen, ɗu onnda so ŋ annda. Ŋ nikeen ɓoyi ɗu inheeɗi, waaye ɗu daliɗta so ŋ kahan caŋ ɗu. 36 Ŋ ɓangtasseen kulɓa, ɗu ɓekiɗta so. Ŋ kosaayeen, ɗu hayya so ɗoohɗe. Ŋ taƴseen ŋ kaso, ɗu kaɗta so marka. ”

37 Yurhiɗ ci hey ɗe lofe ne : “ Heɗ ɓoo, ɓoo hot ɗa aɗkiɗ kiɗa, ɓoo onnda ɗa fu ñammba ? Wala sifaɗkiɗ, ɓoo onnda ɗa fu annda ? 38 Kiɗa weɗ ɓoo hot ɗa findi ɓoyi ɓoo inahɗi, ɓoo daliɗta ɗa ? Wala ɓangtuuɗ, ɓoo ɓekiɗta ɗa kulɓa ? 39 Kiɗa, weɗ ɓoo hot ɗa kosaayiɗ wala taƴuuɗ ŋ kaso, ɓoo kaɗta ɗa marka ? ”

40 Ŋ ineem, buuri hey ɓa lofe ne : “ Ñam na woyee ɗu wa te wa keeh, ali nik ne ɗu haɓɗiɗ in ceem yino ŋ taambɗoh ciŋ ngo uup heefu sah, ɗu haɓɗiɗ to wa. ”

41 Ƴut ɗah, a hey woye ɓi lahan ɗe ŋ yaah-sing ne : “ Usaat to, ɗu ɓi alkuuɗ ci ! Ɗu kaɗ ŋ yongkaaha genan, yongkaahi Seytaani kooɗkiɗu na malaakaaciŋ[a] ɗe hun na ɗe. 42 Laam ŋ aɗkeen, ɗu onɗi so kañam. Ŋ sifaɗukka, ɗu onɗi so ŋ an. 43 Ŋ hayiɗ nga ɗu, findi ɓoyi ɗu inahɗi, ɗu daliɗɗi so. Ŋ ɓangtuusa kulɓa, ɗu ɓekiɗɗi so. Ŋ kosaayeen, ŋ taƴuusa ŋ kaso, ɗu kaɗɗi so marka. ”

44 Ɓa hey ɗe name lof ne : “ Heɗ ɓoo, ɓoo hot ɗa aɗkiɗ, sifaɗkiɗ, hanhe, ɓangtuuɗ, kosaayiɗ wala taƴuuɗ ŋ kaso kiɗa te ɓoo taambkohɗi ɗa ? ”

45 Ŋ ineem a hey ɓa lofe ne : “ Ñam na woyee ɗu wa te wa keeh, ali nik ne ɗu haɓɗiɗaaɗi in ceem yino ŋ ɓi uup heefu ɓii ɗah, ɗu nik ko ca haɓɗiɗaaɗi. ”

46 Te ɓii na kaɗe ŋ mbugala heyɗi reehe, waaye yurhiɗ ci na kaɗe ŋ kipes ki heyɗi reehe. »

<- Macce 24Macce 26 ->