Macce 2

Ɓi heɗ haf hayiɗ ñaamke Yeesu

1 Yeesu raakohu Betlehem ŋ kur kaŋ Yudee ŋ jamanoona Herod nikoh buur. Ɓi heɗ haf kurkohha pulohaaɗ-noh, ɓa hayya Yerusalem. 2 Ɓa meeksoheeɗa an : « A nde kuɓki han raaku, yi nikan buuriŋ Yawuut ci ? Ɓoo hotiɗ horiŋ ɗe ŋ pulohaaɗ-noh. Te ɓoo hay ne ɓoo ñaamuk ɗe. »

3 Wa Herod buuri kerah ineem, a feyuusa lool, a yi na ɓi Yerusalem jen. 4 A cohɗohha kilifaacaŋ seeƴkiɗoh caŋ waasiŋMusaa*2:4 Musaa : woosuuɗi Musaa, a yi farañse na woye "Moïse". A raaku ŋ jamanoona Israayel ca tumohu ñaam ŋ Misra weɗ "Egypte" woti-woti (Pula 2:1-10). Musaa yeem, Kooh adgiɗee ɗe ne a pulɗoh Israayel ca ŋ kiñaamka ɓa nikohe (Pula 3:10). Wi a puliɗ ɓa, Kooh eɗta ɗe ɓi nakoh laayiɗ ŋ ini kaɗ ŋ findi ɓa joy ɗe ñaamkoh na findi ɓa joy pesoh ŋ ɗooƴ ɓa. Musaa a yi fiis teereeci yatuus ci koc ŋ Biibali ci na woyse "Tawreet", wala "waasiŋ Musaa".†2:4 waasiŋ Musaa : e teereeci yatuus ci koc ngaŋ Fiis ci Hooliɗ ci ; ceem ceɗ na woyse Tawreet. Ca na woye findi Adina ferohu, hayiŋ bakaaɗ na kakaan, gaalaŋ Noohin na ambtiɗohi Kooh tufkiɗ na adinaani jen, ɓeeɗkiŋ Kooh na Ibrahiima, na ambtiɗohi a tufkiɗ na ɗe na ɓi rimkoh nga ɗe, cambohaaniŋ cuuɓiŋ Israayel, na ambtiɗohi Kooh tufkiɗ na ɓa. Ŋ ɗooƴ ambtiɗoheem, Kooh gapeen ɓa ɓi in laayiɗ, te a nameen ɓa eɗ nakoh ciŋ ɗe. na jangɗohoh caŋ wa jen, a meekissa ɓa ɗiski Mucɗohi Gapohse joy rimohu. 5 Ɓa loffa ɗe ne : « A joy raakohu Betlehem ŋ Yudee ŋ ini woosuuɗi fiis wii :

6 “ Fu Betlehem ŋ kur kiŋ Yudee,

fu ɓaahɗi muk ŋ ci uup ƴissuut ŋ kur ciŋ Yudee

sagu pulohi kilifaani pulohan nga ɗa, kilifaani niiɗan cuuɓiŋ ngo Israayel. ”[c] »

7 Herod ɓeeɗukka heɗ haf ca, a ɗaayya na ɓa, ne ɓa teeɓ ɗe hooliɗ, jamanooni hora hotkoh. 8 A tuuƴca ɓa Betlehem, a woosa ɓa ne : « Kaɗaat ɗu meeksoha kuɓki meeksoh hooliɗ, ɗu hot ɗe ɗah, ɗu woo so, ŋ nam ɗe kaɗ ñaamka. »

9 Wa heɗ haf ca sikɗuk buura po ƴutta, ɓa kaɗta. Hora ɓa hotee ŋ pulohaaɗ-noh pulissa, wa nikka ŋ fikiiɓa, wa kaɗeeɗa po wa tiimmba ɗiska kuɓka nik, wa tufukka. 10 Hora ɓa hotee, ɓa sumeen nga keeh-keeh po ɓa minisɗi.

11 Ɓa aassa ŋ kahna, ɓa hotta kuɓka na Maryaama yaay ɓa ; ɓa ƴekiɗta Yeesu, ɓa ñaamukka Yeesu. Ɓa puliɗta alala ɓa ɓayndohe, ɓa eɗta ɗe urus, cuuraay na miir‡2:11 miir: wa cuuraay, wa na fuuɗseeɗi. Wa na woyse "myrrhe" ŋ farañse.. 12 Ƴutta Kooh teeɓpa ɓa ŋ heeƴ ne, ɓa haadee ɗah, ɓa kinaat taamb ŋ Herod. Ɓa kooɗta waas wiiriis, ɓa dokukka kur ɓa.

Suseef na Maryaama saandohiɗ ŋ Misra

13 Wa heɗ haf ca coot, malaaka Heɗ ɓoo teeɓukka Suseef ŋ heeƴ, a woosa ɗe ne : « Suseef, Herod hey nakohe kuɓki waaku ne a ap ɗe, mbaa kurka fu ɓay kuɓki na yaay ɓa, fu saandoh Misra, fu nik nga po mbaɗna ŋ woyan na ɗa. » 14 Suseef kurukka, a ɓayya kuɓka na yaay ɓa ŋ ɗooƴ weka, a kaɗta na ɓa Misra. 15 Ɓa nikka nga po Herod kaannda. Ŋ ineem, ina Heɗ ɓoo woyee raakka, woo ki a taambɗee ŋ nguɓ woosuuɗ an : « Ŋ ɓeeɗkiɗ kuɓkiŋ ngo ne a pul Misra.[e] »

16 Wa Herod inah ne heɗ haf ca ñaañoh ɗe ñaañoh, a ayrukka lool. A tuuƴohha ŋ kur kaŋ Betlehem na ina wila ne komaakca ƴaar ca raak kiis kanak ruhussa jen, apsaat. A kindoha ŋ jamanoona heɗ haf ca woyee ɗe. 17 Wa nikohha ɗaa findi woosuuɗi Yeremi woyohee wa, an :

18 « Hooso kerhuuɗ ŋ kur ki na woyse Rama,

ca fuɗ laayiɗ na rooy keeh-keeh.

A Rasel na fuɗe komaakciŋ ɗe,

ɓa kaaniɗ, weɗ tah a waaɗɗi giifɗu. »[f]

19 Ŋ finho kakaan kaŋ Herod, malaaka Heɗ ɓoo teeɓukka Suseef ŋ heeƴ ŋ Misra, 20 a woosa ɗe ne : « Kurka, fu ɓay kuɓki na yaay ɓa, ɗu dokuk Israayel, ɓooɓa waaɗee ɓay kiñin kiŋ ɗe ɓa kaaniɗ. » 21 Suseef kurukka, a ɓayya kuɓka na yaay ɓa, a haadda Israayel. 22 Waaye wa a kerah ne e Arkelawus namsiɗ baab ɓa Herod ŋ hafaŋ kur kaŋ Yudee, a neƴƴohha kaɗ nga. Heɗ ɓoo woytohha ɗe ŋ heeƴ, ŋ ineem, a kaɗta Galile, 23 a gennda nga, ŋ kur ka na woyse Nasareet. Ina woosuuɗ ci woyee raakka, ne Mucɗohi Gapohse ɓeeɗkohsan ƴaariŋ ɓi Nasareet[g].

<- Macce 1 Macce 3 ->