1 Ɓi Farisen na Sadusen reɓpa, woyeeɗa na Yeesu. Ɓa markiskeeɗa ɗe, ɓa meekseeɗa ɗe ne a teeɓ ɓa firnde puloh ŋ Eel ci. 2 A loffa ɓa ne : « [Noh muyee te eel ci ruumndiɗee ɗah, ɗu na woye ne : “ Eel ci ruumndiɗ coy, wa hey neɓe ! ” 3 Wa nik na ɓaaɓ ɗah, ɗu woo ne : “ Wa ngaaɓiɗ, wa neɓanɗi. ” Ɗu minnda inhisoh findi eel ci na mande te ɗu minɗi inhisoh firndeeciŋ jamanooni !] 4 Ɓooɓi woti ɓeɗ baahaaɗi, ɓa topɗi ŋ Kooh po haa njaalo'oh, an ɓa na meeksohe firnde ! Ɓa eɗsanɗi ali firnde ɗal wiŋ Yunus.[a] » Ƴutta a faɗta ɓa ndaam, a cootta.

5 Wa taalubeeci kaɗee ŋ ɓaka winooraŋ cookma, ɓa alkoheen ɓayndoh mbuuru. 6 Yeesu woosa ɓa ne : « Wortukaat lawiiriŋ Farisen ci na Sadusen ci ! » 7 Ɓa woyeeɗa ŋ harmban ɓa ne : « A ini ɓoo ɓayɗi mbuuru weɗ tah. » 8 Waaye Yeesu inahhaa, a woosa ɓa ne : « Cey, e ɗu kosaaɗi, wa ye tah ɗu woyee ŋ harmban ɗu an : “ A ini ɓoo raakɗi mbuuru ? ” 9 Ɗu inahɗi poyi e ? Ɗu alkoh alkoh mbuuruuca yatuus ca paysohsee ɓooɓa junni-yatuus (5000) ca e, tasɗohiica ɗu ɓayndohee, ca nikee pañe hend na ? 10 Na mbuuruuca yasna-kanak ca paysohsee ɓooɓa junni-nikiis (4000) ca, tasɗohiica ɗu ɓayndohee, ca nikee dammba hend na ? 11 Tumoh na po ɗu minɗi inah ne mi na woye mbuuru haa ? Wortukaat lawiiriŋ Farisen ci na Sadusen ci ! » 12 Ŋ ineem, ɓa inahha ne a woyee ɓa ne ɓa wortuk lawiiriŋ mbuuruuci haa, waaye ne ɓa wortuk jangɗohiŋ Farisen ci na Sadusen ci.

13 Yeesu kaɗta ɓak Seesare-Filip, wa a ree, a meekissa taalubeeciŋ ɗe ne : « Ɓooɓi na woye ne Kuɓkiŋ ɓoyi a yi ɓa ? » 14 Ɓa loffa ɗe ne : « Raakiɗ ɓi na woye ne a fu Yahya Ɓoktohi, ɓum na woye ne a fu Ilyas, ɓinooɓi woyee ne a fu Yeremi[b] wala woosuuɗ wiiriis ŋ ɓa ɗeɓgaan. »

15 Yeesu meeksissa ɓa ne : « Moo nga ɗu nak, a mi ɓa ? » 16 Simong Piyeer loffa ɗe ne : « A fu Mucɗohi Gapohse, Kuɓkiŋ Koohi na pese[c]. » 17 Yeesu woosa ɗe ne : « Fu neɓɗiɗ Simong kuɓkiŋ Yoona, a ɓo' moondiɗ ɗa ini fu lof haa, waaye a Baabiŋ ngo yi ŋ Eel ci !

18 Mi, ŋ woo ne a fu Piyeer, weɗ atoh ; ŋ hey yipe ɓi Janguuniŋ ngo findi taɓah ŋ atoh feem te doolndiŋ kakaan ki sah minɗanɗi wa ali in. 19 Ŋ hey ɗa eɗe caaɓeeciŋ Nguuriŋ-Ɗafki ; in nu fu sangoh ŋ kehƴi ɗah, wa hey nike ini Kooh sangoh ŋ Eel ci, te in nu fu teyɗuk ŋ kehƴi ɗah, wa hey nike ini Kooh teyɗuk ŋ Eel ci. » 20 Yeesu nakka taalubeeci ne ɓa kinaat woo ali ɓo' ne a yi Mucɗohi Gapohse.

21 Ini kooɗoh ndeem, Yeesu cammba woo woo jahran na taalubeeciŋ ɗe an : « Ŋ joyiɗ kaɗ Yerusalem, ŋ yaaɓ keeh-keeh ŋ yaah ciŋ yakak ci na kilifaaciŋ seeƴkiɗoh ciŋ waasiŋMusaa na jangɗohoh ciŋ wa, ŋ apu te ŋ hultiɗu ŋ neeha kaahayɗoh. »

22 Piyeer gukka ɗe, ngaseeɗa ɗe an : « Kilifaani, Kooh mucɗaat ɗa nga ! Ineem rahsanɗi ɗa muk ! » 23 Waaye Yeesu heelukka, woosa ɗe ne : « Kurka ndii, kaɗa ŋ finhooso, seytaaniini ! Fu na jaɗɗee so fiir. Liiɓohaaɗiŋ ɗa hunɗi na wiŋ Kooh, fu na liiɓe findi ɓo'. »

24 Ƴutta, Yeesu woosa taalubeeciŋ ɗe ne : « Ɓo' nu waaɗ hun na so ɗah, a joyɗi liiɓ haf ce, a degkaat kurwaani aa hee daaƴohse, a ñaakiɗ to. 25 Laam, ɓo' nu waaɗ muciɗ kiñin kiŋ ɗe ɗah, a heya ñake. Waaye ɓo' nu ñak kiñin kiŋ ɗe saguuso ɗah, a heya rahsisse. 26 Ɓo' raak adinaani jen na in ci nik nga te a ñak kipes kiŋ ɗe, ineem raakiɗ ɗe winde njiriñ ? Ɓo' min romkoh kipes kiŋ ɗe na ye ?

27 Ee, Kuɓkiŋ ɓoyi hey hayisse na malaakaaciŋ ɗe, na yaki Baab ɓa yak, a hey atte'e yaa nu nga ngaŋ tumohaaɗ ciŋ ɗa. 28 Ñam na woyee ɗu wa te wa keeh, ɓi ɓo' ɓii ŋ ndii ɓa kaananɗi muk te ɓa hotɗi Kuɓkiŋ ɓoyi hayee findi buur. »

<- Macce 15Macce 17 ->