1 Wa raakka mbeh, Yeesu nikka ŋ sereendaŋ Cookmaŋ-Senesaret[a], ɓi ɓo' laayiɗ ndeerra ɗe, ɓa baɓkoheeɗa ne ɓa min sikɗuk woo kiŋ Kooh. 2 Yeesu hotta gaal kanak ŋ sereendaŋ cookma, waam raak seeɓoh ca ruhsiɗ ŋ gaal ca po ɓa naawseeɗa mbaal caŋ ɓa. 3 A rappa ŋ waŋ Simong, a woosa ɗe ne : « Yeña gaali ŋ ɗooƴ masmi ƴissuut. » Simong yennjaa, Yeesu ɓooffa nga, a jangɗeeɗa ɓooɓa.

4 Wa a ƴut ɓa jangiɗ, a woosa Simong ne : « Kaɗa na gaali po ɗiska cookmi nooɗoh, ɗu njaf mbaal ciŋ ɗu, ɗu seeɓ. » 5 Simong loffa ɗe ne : « Kilifaani, niinma ɓoo neeh seeɓ te ali cuurund ɓoo ambɗi waaye, ŋ hey njafe mbaal ci. »

6 Wa ɓa njaf ca, ɓa ammba cuurund laayiɗ po mbaal ca faarkeeɗa. 7 Ŋ ineem, ɓa kaayilla huntoh caŋ ɓa nikee ŋ gaala winoora yaah, ne ɓeem hay ɓa ɓaatɗohe. Ɓa hayya, ɓa siffa gaal ca kanak ca jen cuurund po ca diigeeɗa.

8 Wa Simong Piyeer hot ŋ ineem, a ƴekka ŋ fiki Yeesu a woosa ne : « Us so kilifaani, ŋ bakaaɗoh. » 9 A feyse feyu a yi na ɓooɓa a hunee na ɓa jen sagu cuurund ca ɓa amb. 10 Huntoh caŋ ɗe Saak na Saaŋ, kuɓuuciŋ Sebede, nammba feyu. Yeesu woosa Simong ne : « Kana tiit, ini amboh woti fu seeɓan ɓo' kotii. »

11 Wa ɓa puliɗ gaal caŋ ɓa ŋ sereendaŋ cookma, ɓa faɗta in caŋ ɓa jen, ɓa ñaakiɗta Yeesu.

12 Wa raakka mbeh, Yeesu nikka ŋ kur, raak ƴaar yaa nga, a ambohee kosaay ki na oɓse faan po faaniŋ ɗe jen yahrukohha. A hot hot Yeesu rek, a ƴekka po pukiŋ ɗe reesa kehƴi, a kiimmba ɗe an : « Kilifaani, fu waaɗa ɗah, fu miniɗ to saɓsoh na kosaay kii po ŋ nik ɓo' hooliɗ. » 13 Yeesu raɗissa yaah, a degga ɗe wa, a woosa ne : « Ŋ waaɗiɗa, hoola ! » Ŋ ɗiska ɗiska kosaay kaŋ ƴaara saɓsukohha na ɗe. 14 Yeesu nakka ɗe ne a kinaata woo ali ɓo', a woosa ɗe ne : « Kaɗa fu teeɓa haf fu seeƴkiɗoha, fu haɓiɗ seeƴki waasiŋMusaa nakoh ne fu hool, wa teeɓoh ne fu wiriɗ.[b] » 15 Tiikiŋ Yeesu uupeeɗa nga kerhu, ɓi ɓo' laayiɗ hayeeɗa nga ɗe ne ɓa sikɗuk ɗe te ɓa wir ŋ kosaay caŋ ɓa. 16 Ini kaɗ ŋ Yeesu, a meeɗeen ɗaay ŋ nduufa, a kiimee Kooh nga.

17 Wa raakka mbeh, Yeesu jangɗoheeɗa. Ɓi ɓo' ɓaahee ŋ Farisen ca na ɓi ɓo' ɓaah ŋ jangɗohoh caŋ waasiŋ Musaa nikee nga. Ɓa pulohee kur caŋ Galile jen na caŋ Yudee na Yerusalem. Hatiliŋ Heɗ ɓoo huneen na Yeesu ne a wiriɗ kosaayiɗ ca. 18 Ɓi ɓo' hayya, gaalɗohiɗ ƴaar ŋ faankoha. E kot ciŋ ɗe sange. Weɗ tahee ɓa ɓayeeɗa ɗe ŋ Yeesu, raak ɗe ŋ ɗooƴ taɓah. 19 Waaye ɓa raakɗi ɗiski ɓa hee taambe sagu findi ɓooɓa laayohe. Ɓa rappa ŋ ɗafuk taɓaha, ɓa nihissa ŋ poon caŋ wa, ɓa yoorra ɗe ŋ ɗooƴ ɓooɓa ŋ fiki Yeesu.

20 Wa Yeesu hot ɓa na findi ɓa kosoh, a woosa ƴaara kosaayɗa ne : « Ƴaariŋ ngo, fu ɗaasuuɗ bakaaɗ ciŋ ɗa. » 21 Jangɗohoh caŋ waasiŋ Musaa na Farisen ca woyeeɗa ŋ ɗooƴ ɓa ne : « Ƴaarii a yi ɓa po a ɗale Kooh mand an ? Ali ɓo' minɗi ɗaasoh bakaaɗ ɗal Kooh dong ! » 22 Waaye Yeesu inahha ina ɓa liiɓee ŋ ɗooƴ ɓa, a woosa ɓa ne : « Wa ye tah ɗu liiɓee ineem ? 23 Ŋ woo ƴaarii ne : “ Fu ɗaasuuɗ bakaaɗ ciŋ ɗa ” wala ŋ woo ɗe ne : “ Kurka fu tiind. ” A winde uup yooɓ ? 24 Mbaa ŋ hey ɗu teeɓe ne Kuɓkiŋ ɓoyi raakiɗ doolndi a min ɗaasoh bakaaɗ ŋ kehƴi. » Yeesu woosa ƴaara lafñiɗa ne : « Ñam woo ɗa wa, kurka fu ɓay basngiŋ ɗa te fu haad. » 25 Ŋ fiki ɓooɓa jen ƴaara jaarra kuruk, a ɓayya faankohaanaŋ ɗe, a haadeeɗa, a yakɗeeɗa Kooh. 26 Ɓooɓa jen feyuusa ɓa yakɗeeɗa Kooh ; ɓa jaahiɗta, ɓa woyeeɗa ne : « Ɓoo hotiɗ in feyohiɗ woti. »

27 Wa Yeesu pul, a hotta juuti'oh teeku Lewi ɓoofiɗ ŋ ɗiska a na juuti'ohe. A woosa ɗe ne : « Ñaakiɗ to. » 28 Lewi kurukka, a faɗta in caŋ ɗe jen, a ñaakɗeeɗa ɗe. 29 Wa ɓa ree kahan Lewi, a tikɗukiɗta Yeesu kañam laayiɗ ndaam. Ɓi juuti'oh laayiɗ na ɓi ɓo' wiiriis ñameeɗa na ɓa.

30 Farisen ca na jangɗohoh caŋ waasiŋ Musaa ñaɗtukeeɗa ŋ taalubeeciŋ Yeesu an : « Wa ye tah ɗu ñame, ɗu anee na juuti'oh ci na bakaaɗoh ci ɓinooɓi ? » 31 Yeesu loffa ɓa ne : « Ɓooɓi kosaayɗi etohɗi paƴoh, e kosaayiɗ ci etoh paƴoh. 32 Ŋ hayɗi ne ŋ ɓeeɗuk ɓooɓi yurhiɗ ci waaye ŋ hay ne ŋ ɓeeɗuk bakaaɗoh ci, ɓa ɓoƴsoh pesohaaɗ. »

33 Ɓa woosa Yeesu ne : « Taalubeeciŋ Yahya Ɓoktohi na ɗeke po ɓa ore, ɓa kiimee Kooh findi ɓiŋ Farisen ci, waaye ɓiŋ ɗa deey, na ñamee ñam, ɓa ane. » 34 A loffa ɓa ne : « Hanheeci hay kilook, ɓa hey orɗukohse te raak heɗ kilooki yii na ɓa e ? Wa minɗi nik ! 35 Waaye wa hey raake jamano heɗ kilooki kooɗohu nga ɓa, ndeem, ɓa hey ore. »

36 Ŋ ineem Yeesu woosa ɓa andiini mandtiɗkohaanii : « Ali ɓo' na faareeɗi ŋ kulɓa as ne fu daaf kulɓa maañiɗ. Mbaa fu hey yahe kulɓaaki asi te seeketi fu na hee kooɗohe nga hunanɗi na kulɓaaki kiisɗi. 37 Te ali ɓo' na tumeeɗi biiñi asi na soñe ŋ mbohos und maañiɗ ; mbaa biiñi hey pooke mbohoseem, wa aamuk, mbohosi yahrukoh. 38 Biiñ as joy tumu ŋ mbohos as. 39 Waaye ɓo' nu an biiñ maañiɗ ɗah, fu heyɗi waaɗe biiñ as, laam fu na woyee ne : “ Wi maañɗi baahiɗ. ” »

<- Luk 4Luk 6 ->