1 Yeesu naandsukeen taalubeeciŋ ɗe andiinii : « A nikee ƴaar heɗ raak-raak, a raakka ñaama meeɗ ɗe taambkohiɗ raak-raakaŋ ɗe. A woyuusa ne ñaamaŋ ɗe na yahrohee wa yahroh. 2 Ƴaara ɓeeɗukka ñaama, a woosa ɗe ne : “ Ŋ kerhiɗ ini fu na tume ! Teeɓ po findi fu na taambkohohe raak-raakiŋ ngo. Fu pangkiɗissanɗi so. ”

3 Ñaama woosa ŋ ɗooƴ ce ne : “ Kilifaaniŋ ngo hey yo aañe, moo ŋ tuman na ? Ŋ hot ne ŋ raakɗi hatil guuroha te ŋ supkiɗ kiim. 4 Ee, waaye ŋ inhiɗ ini mi na hee haɓɗe po kilifaaniŋ ngo aañ njo ɗah, ŋ raak ɓooɓi na hee so ɓaye ŋ kahan ciŋ ɓa. ”

5 A ɓeeɗukka ɓooɓa joy wirind kilifaaniŋ ɗe kombot jen, yino yino. A woo yi koc ne : “ Fu joy ye wirind kilifaaniŋ ngo ? ” 6 Yeem loffa ɗe ne : “ Diwliin. Ngaal yakak*16:6 Ngaal yakak : wa reyeen liitar ndaŋkiyaah-kanak na liitar kanak (22). teemet (100). ” A woosa ɗe ne : “ Kaytiŋ ɗa weɗɗi, ɓoofa, fu ar fiis ngaal yakak ndaŋkiyaah-yatuus (50). ” 7 Ƴutta, a ɓeeɗukka ƴaar wiiriis, a woosa ɗe ne : “ Fu nak, fu joy ye wirind kilifaaniŋ ngo ? ” Ƴaari loffa ne : “ Bele. Saaku teemet (100). ” A woosa ɗe ne : “ Kaytiŋ ɗa weɗɗi, ɓoofa, fu fiis ndaŋkiyaah-yasna-kaahay (80). ” 8 Kilifaani hotta ini ñaami yurhaaɗiini haɓiɗ, a woosa ne : “ Ƴaari ñaañiɗ kat ! ” »

Yeesu degga nga ne : « Ɓooɓi na taambɗe jamanooni, ŋ findi ɓa na tiindɗohe ŋ harmban ɓa, ɓeɗ uup yunuk ɓooɓi nik ŋ ñiiniŋ Kooh. 9 Ñam na woyee ɗu ne, raak-raakiŋ Adina yurahɗi, waaye waakaat nawle naa, kaɗ po wa raakisɗi ɗah, ɓa min ɗu taambuk ŋ ɗiip ca na hee nikee po faw. 10 Ɓoyi min oolku ŋ in ƴissuut, a miniɗ oolku ŋ in yakak te ɓoyi nik yurhaaɗi ŋ in ƴissuut, a heyɗi name nik yurhiɗ ŋ in yakak. 11 Kon, nik ne ɗu minɗi oolku ŋ findi ɗu na ambohe raak-raakiŋ Adina ɗah, ya ɓa na hee ɗu dengkohe raak-raak ci kiyooh ci ? 12 Nik ne ɗu minɗi oolku ŋ findi ɗu na ambohe ini ɗu raakɗi ɗah, andi ɗu hey eɗse ini ɗu raakoot ?

13 Ali ñaam minɗi raak heɗ kanak, mbaa a hey waaɗe yino, a sang yi tas ; wala a ŋoɗ ŋ yii, a heef yi tas. Kon ɗu minɗi ñaamuk Kooh, ɗu ñaamkee raak-raak. »

14 Farisen ca nikee ɓo' waaɗiɗ kopor lool, tahha po, wa ɓa kerah woo ceem jen, ɓa njembteeɗa ɗe. 15 Yeesu woosa ɓa ne : « Ɗu na yurah yurahɗuke ŋ has ciŋ ɓooɓi, waaye Kooh inhiɗ ini nik ŋ ɗooƴ keeñ ciŋ ɗu. Laam in ci ɓooɓi na yakɗe, ca in sepƴiɗ ngaŋ Kooh.

16 WaasiŋMusaa na woo ciŋ woosuuɗ ci nikee nga po wi Yahya Ɓoktohi hay. Ini amboh ndeem, Yegɗohiŋ Muci, wiŋ ŋ Nguuriŋ-Kooh wii yegɗohu, te ɓo' nu nga ɗah yii ndengɗuk na hatil ne a aas nga. 17 Waaye eel ci na kehƴi kuruk nga, weɗ uup yooɓ fiisi uup ƴissuut nihsuk ŋ waasiŋ Musaa.

18 Ƴaar nu saɓsukoh na ɓitiice, a tokis ɓitiɓ wiiriis ɗah, a njaaloo njaaloo. Te ƴaar nu tok ɓitiɓ saɓsukohiɗ na ƴaar ce ɗah, a njaaloo njaaloo. »

19 Yeesu naandsukissa taalubeeciŋ ɗe ne : « A nikee heɗ raak-raak, a meeɗ ɓekuk kulɓa jakiɗ ca uupee raak candoom ; a peseeɗa pes neɓiɗ, Kooh-nu-wiis a meeɗta mbuumbaay. 20 Raakeen ñakiɗ ŋ serooce, na woyse Lasaar. Lasaar yeem faaniŋ ɗe riifeen na puus, a meeɗ faɗu faankiɗ ŋ nguɓu kahan ƴaara. 21 A meeɗeen aɗuk po a waaɗ ñam ŋ ñamohiicaŋ heɗ raak-raaka, ca na keene. Te ɓuu ci sah meeɗ meeɗ hay, ca ɗeewee puus ciŋ ɗe.

22 Wi ƴaari ñakɗi kaan, malaakaaci ɓayya ɗe ŋ sero Ibrahiima. Heɗ raak-raaka nammba kaan, a acuusa. 23 Waaye ŋ ɗiska a nik ŋ Jaanim, a miskiɗta lool. A marakka usiɗ, a hotta Lasaar ŋ sero Ibrahiima. 24 A yi heɗ raak-raaka, a woosa ŋ ɗafka ne : “ Baab Ibrahiima, ŋ miskaat ɗa, fu woos Lasaar, a ɓek ndukniŋ ɗe ŋ masuɓ, a iiri'ɗiɗ to peɗmiŋ ngo ne sifaɗki haawsuk, ŋ raakiɗ miskiɗ lool ŋ yongkaahii. ”

25 Waaye Ibrahiima loffa ɗe ne : “ Kuɓu, naandsuka ne fu rahsiɗ neɓɗaŋ ɗa wa fu na pese te Lasaar nikka ŋ miskiɗ. Ɗiski wa nik ndii, keeñiŋ ɗe soosɗuuɗ, a fu nik ngaŋ miskiɗ kotii. 26 Ɓaat nga, nung angiɗ nooɗiɗ weɗi ŋ harmban ɓoo na ɗu ; tahha po, ali ɓo' waaɗ puloh ndii, a kaɗ nga ɗu, wa minkanɗi te ɓo' minɗi puloh ngaŋ ɗiski fu nik ndeem, a hay ndii. ”

27 Heɗ raak-raaka woosa ne : “ Kon, mi yii kiim ɗa baab Ibrahiima, woosa Lasaar ŋ kahan baab ɓoo. 28 Ŋ raakiɗ taambɗoh yatuus nga, a woo na ɓa, ɓa hayuu ŋ ɗiski miskiɗii. ” 29 Ibrahiima loffa ɗe ne : “ Taambɗoh ciŋ ɗa, ɓa ɗaa na woo ciŋ Musaa na ciŋ woosuuɗ ci, ɓa sikɗukaat ca. ” 30 Heɗ raak-raaka woosa ɗe ne : “ Baab Ibrahiima, ineem doyɗi, waaye ɓo' hulit ŋ kaaniɗ ci, a kaɗ nga ɓa ɗah, ɓa hey ɓoƴsohe pesohaaɗ. ” 31 Waaye Ibrahiima woosa ɗe ne : “ Ɓa sikɗukɗi Musaa na woosuuɗ ci ɗah, ali ɓo' hulit ŋ kakaan ka, tahanɗi ɓa ɓoƴsoh kipes.[b] ” »

<- Luk 15Luk 17 ->