Yunus

1 Yunus, a nikee kuɓu Amitay. Raakka mbeh, Nikiɗi woosa ɗe ne : 2 « Kaɗa win-win Niniw, kur ka yakka, looƴkaa ɓa ne aƴaarkaŋ ɓa reyiɗ nga so. » 3 Waaye Yunus taambohha ndeem a saandohha Tarsis, ne a fus Nikiɗi. A reesa ŋ Joppa, a raakka nga batoona na kaɗe Tarsis, a wirinnda, a aassa na ɓi ɓo' ŋ batoona na hee ɓa coottohe nga ne a min ki us Nikiɗi.

4 Waaye, wa ɓa nik ŋ ɗooƴ cookma, Nikiɗi fuuɗissa ŋ ɗafuk cookma puuɗis ayrukiɗ, pahul yakak yoppa cookma po batoona waaɗeeɗa ɓaltukoh. 5 Ɓooɓa ambohee batoona neƴƴohha ; yaa nik nga ɓa looƴukka tiikaŋ koohaŋ ɗe, ɓa aammba unung caŋ ɓa ŋ cookma ne ɓa eɗfiɗ batoona.

Raakka waam Yunus ruhsiɗ ngaŋ tasaŋ batoona ; a nikee faankiɗ, a neeheeɗa pani nooɗiɗ. 6 Ƴaara adgiɗee amboh ca reɓpa ɗe, woosa ɗe ne : « Fu neehang ye ? Kurka, koolɗa hooso po ŋ koohiŋ ɗa ! Wa miniɗ raak Kooh liiɓsiɗoh ɓoo po ɓoo sooƴuu. »

7 Ŋ ndeem, ɓa woytiɗohha an : « Ɓoo markiskaat ŋ petaaw ci, ɓoo marak miskiɗi rahas ɓoo puloh nga ɓa. » Ɓa markisukka, petaaw ca teeɓohha Yunus. 8 Ɓa woyissa ɗe ne : « Teeɓa ɓoo ɓoyi ɓek ɓoo inii ! Fu na haɓɗe ye ? Fu kurkoh nde ? Kur ɗu teeku na ? Fu ɓaah ngaŋ winde cuuɓ ? » 9 A loffa ɓa ne : « Ŋ Heber, Nikiɗi, a yi mi na yakɗe, Kooh ŋ ɗafki, yi fer cookmi na kehƴi. » 10 Wa ɓa kerah woo kaŋ ɗe, amboh ca neƴƴohha, ɓa tummba ɗe ne : « Fu haɓiɗ ye an ? » Ɓa inheen ɓal ne a na saandohe fusoha Nikiɗi laam a naandsukeen ɓa wa. 11 Ɓa meekissa ɗe ne : « Ɓoo na hee na tumtiɗohe na ɗa po cookmi yeeɓuk ? » Laam raak cookma koolɗukeeɗa koolɗuk. 12 A loffa ɓa an : « Meeɓaat to ɗu biir ro ŋ cookmi, ɗah cookmi hey yeeɓke. Laam ŋ inhiɗa, wa nga so findi wa taamboh po pahuli ayrukiɗii bipukka ŋ ɗafuk ɗu. »

13 Joy ne ɓa tum ini a woo, amboh ca joowwa ne ɓa teer ŋ tefsa, waaye ŋ ɓarang ɓarang, laam cookma nikee uupeeɗa ɓa uup ayruk.

14 Ŋ ineem, ɓa kiimmba Nikiɗi ne : « Cey ! Nikiɗi, kana ɓoo ap sagu ƴaarii ! Te kan ɓoo yamb kakaan ɓo' yurhiɗ. Laam a yaf, Nikiɗi, tum findi wa neɓoh ɗa. » 15 Ɓa jaarra, ɓa meeɓpa Yunus, ɓa njaffa ɗe ŋ cookma, cookma hannda seemiɗ ɗuuɗaŋ wa. 16 Ɓooɓa neƴƴohha ŋ Nikiɗi ; ɓa seeƴkiɗta ɗe, ɓa giñiɗta ɗe ne ɓa hey ɗe tumɗe in, ɓa cooteeɗa.

Yunus 2 ->