1 Wa nikee mbehi taamb ŋ mbehi na iɗsiɗkohse na ɓaaɓa teel, raaka ris ñuus, Mari Makdala kaɗta ruy-ruyaŋ Yeesu. Wa a ree, a hotta ne atoh fa rangee wa ɓakɗuuɗ. 2 Weɗi a nupoh ŋ Simong Piyeer na taalubeena yinoora, yi Yeesu keeñkohee, a woosa ɓa ne : « Ɓa kooɗohiɗ fiɗaafiŋ Heɗi ŋ ruy-ruya, te ɓoo inahɗi ɗiski ɓa ɗaaka ! »

3 Piyeer na taalubeena yinoora pulla ne ɓa kaɗ ruy-ruya. 4 Ɓa kanak jen, ɓa hunnda, ɓa nupeeɗa, waaye taalubeena yinoora uuppa gaaw Piyeer, a kocca ɗe ree. 5 A huusukka, a hotta uufa liwsee ŋ faaniŋ ɗe, waaye a aasɗi.

6 Simong Piyeer nikee ñaakɗeeɗa ɗe, a reesa, a aassa, a hotta uufa deguuɗ ŋ ɗisik. 7 A nammba hot wa wilɗassee ŋ hafa. Wa nikeeɗi na winoora, wa nikee lemuuɗ, wa deguusa kiik wa.

8 Taalubeena yinoora hannda nam aas ; a hotta, a kossa. 9 Fiis ci woyeen ne Yeesu joyiɗ hulit, waaye ɓa inheeɗaa paaɗ. 10 Taalubeeca kanak ca haadda.

11 Waam raak Mari ŋ hara, ŋ sero ruy-ruya, fuɗeeɗa, a huusukka, a markeeɗa ŋ ɗooƴa. 12 A hotta malaaka kanak ɓekkiɗ kulɓa yaanow, ɓoofiɗ ŋ ɗiska fiɗaafaŋ Yeesu degse, yinoora ɓooffa teemb ŋ ɗiska hafi nike, ya tas teemb ŋ kot ci. 13 Ɓa woosa ɗe ne : « Ɓitɓi, fu na fuɗe ye ? » A loffa ɓa ne : « Ɓa ɓayiɗ fiɗaafiŋ Heɗ to, te ŋ inahɗi ɗiski ɓa ɗaaka. »

14 Wa a woo ineem, a heelukka, a hotta Yeesu tufkiɗ ; waaye a inhiseeɗi ɗe. 15 Yeesu woosa ɗe ne : « Ɓitɓi, fu na fuɗe ye ? Fu na waake ya ɓa ? » Mari liiɓpa ne a pangkohiŋ nguuki ɓa nikoh, a loffa ne : « Kilifaani, nik ne a fu ɓay fiɗaafi ɗah, teeɓ po ɗiski fu ɗaaka, ŋ kaɗa ɓaya. »

16 Yeesu woosa ɗe ne : « Mari ! » Mari wiirukka, woosa ɗe ŋ peɗeem Yawuut ne : « Rabbuuni ! » Wa tokis "jangɗohohi". 17 Yeesu woosa ɗe ne : « Kinaa so amb ndii laam ŋ rapɗi ŋ Baabi paaɗ. Waaye kaɗa ŋ ɓooɓiŋ ngo, fu woo ɓa ne mi yii rap ŋ ɗiskaŋ Baabiŋ ngo, yi nam nik Baabiŋ ɗu ; Koohiŋ ngo, yi nam nik Koohiŋ ɗu ! »

18 Ŋ ineem Mari Makdala kaɗta ŋ taalubeeca, a woosa ɓa ne : « Ŋ hotiɗ Heɗi ! » A woosa ɓa ina a woo ɗe jen.

19 Mbaɗi na niina, taalubeeca cohha ŋ kahan, ɓa rangukka nga sagu neƴƴoh kilifaacaŋ Yawuut ca. Ɗekka po Yeesu nikka ŋ leerooɓa, a woosa ɓa ne : « Nikaat ŋ jam ! » 20 A teeɓpa ɓa ɗiski a maangsee ŋ yaah ciŋ ɗe na hambuusiŋ ɗe. Ɓa summba lool ŋ hoti ɓa hot Heɗi.

21 Yeesu woyissa ɓa ne : « Jam nikaat na ɗu ! Findi Baabiŋ ngo woosoh ho, mi yii nam ɗu woosoh ɗaa. » 22 Ŋ finho woo keem a fuuɗissa nga ɓa, a woosa ɓa ne : « Rahsaat Fuuɗsi Hoolohngaani ! 23 Ɓi ɗu ɗaasan bakaaɗ ciŋ ɓa, ɓa hey ɗaasse. Ɓi ɗu ɗaasanɗi bakaaɗ ciŋ ɓa, ɓa ɗaassanɗi. »

24 Waam raak Tomaa yi na woyse Siisi te a ɓaahha ŋ taalubeeci ndaŋkiyaah na kanak ci (12), a nikeeɗi na ɓa wa Yeesu hay nga ɓa. 25 Taalubeeci ɓinooɓi woyeeɗa ɗe ne : « Ɓoo hotiɗ Heɗi. » Waaye Tomaa loffa ɓa ne : « Feeh ŋ hotɗi daaƴohiiciŋ pontooci ŋ yaah ciŋ ɗe, ŋ ɓekɗi ndukniŋ ngo ŋ ɗiski pontooci daaƴsee te ŋ ɓekɗi yaahiŋ ngo ŋ hambuusiŋ ɗe ɗah, ŋ kosanɗi wa. »

26 Mbeha dokkissa, taalubeeci cohissa ŋ kahna, Tomaa nikee na ɓa. Buntaaca jen rangseen, ɗekka po Yeesu pulla, tufukka ŋ leerooɓa. A woosa ɓa ne : « Jam nikaat na ɗu ! » 27 A hannda woo Tomaa ne : « Ɓaya ndukniŋ ɗa ndii, fu marak yaah ciŋ ngo. Raɗsa yaahiŋ ɗa fu ɓeka ŋ hambuusiŋ ngo. Kana nikis kosaaɗi, kosa kotii. » 28 Tomaa loffa ɗe ne : « Heɗ to na Koohiŋ ngo ! » 29 Yeesu woosa ɗe ne : « Hoti fu hot to, weɗ tah ɗa kos ! Ɓa neɓɗiɗ, ɓi kos te ɓa hotɗi ! »

30 Yeesu tumissiɗ ŋ fiki taalubeeciŋ ɗe firnde wiiriis laayiɗ waaye ca fiisuuɗi ŋ teerndii. 31 Firndeeci fiisu cii fiisu ne ɗu kos ne Yeesu a yi Mucɗohi Gapohse, Kuɓkiŋ Kooh, te koseem on ɗu kipes ŋ tiikiŋ ɗe.

<- Saaŋ 19Saaŋ 21 ->