Yeesu degga nga ne : « Ŋ nikee na ɗu, tahha po in ceem, ŋ woyeeɗi ɗu ca ŋ cambohaana. 5 Ɗiski wa nik, mi yii kaɗeeɗa ŋ Yi woos so, te ali ɓo' nga ɗu meekisɗi so ɗiski mi na kaɗe. 6 Waaye keeñ ciŋ ɗu reehiɗ sagu ini ŋ woo ɗu. 7 Moona, ini mi na woyee ɗu wii, wa keeh : Ini ngisoh nga ɗu weɗ ne ŋ coot. Ŋ kaɗɗi ɗah, Ɓaatɗohohi hayanɗi nga ɗu. Waaye ŋ coot ɗah, ŋ hey ɗu ɗe woosohe.

8 A hay ɗah, a hey raake keeh nga ɓi Adina ŋ ini kaɗ ŋ bakaaɗ, ŋ ini kaɗ ŋ yurah, na ini kaɗ ŋ atteeniŋ Kooh. 9 A hey raake keeh nga ɓa ŋ ini kaɗ ŋ bakaaɗ, laam ɓa kosɗi so. 10 A hey raake keeh nga ɓa ŋ ini kaɗ ŋ yurah, laam mi yii kaɗ ŋ Baabi te ɗu hotissanɗi so. 11 A hey raake keeh nga ɓa ŋ ini kaɗ ŋ atteeniŋ Kooh, laam yi deg adinaanii yaah atte'uuɗ po ƴutiɗ.

12 Ŋ raakissiɗ in laayiɗ ci ŋ joy ɗu woo, waaye ɗiski wa nik ɗu antalɗi ca. 13 Fuuɗsi Hoolohngaani na teeɓohe keeh ki hay ɗah, a hey ɗu yurhiɗe ŋ keeh ki jen ŋ ini kaɗ ŋ Kooh. A woyanɗi ɗu woo kiŋ ɗe haf ce, waaye a woyan ɗu ini a kerah jen, te a hey ɗu yegɗe ini na haye. 14 A hey teeɓohe yaki ŋ yak, a kooɗohan nga so, a woyee ɗu. 15 Ini Baabi raak jen, wa wiŋ ngo, weɗ tah ŋ woosa ɗu ne, a kooɗohan nga so, a woyee ɗu. »

16 Yeesu woyissa ne : « Tas ƴissuut rek ɗu hotissanɗi so, te wa degis ƴissuut ɗah, ɗu hotis so. » 17 Ɓum ngaŋ taalubeeciŋ ɗe woyeeɗa ŋ harmban ɓa ne : « A na waaɗe ɓoo ye woo an : “ Tas ƴissuut rek ɗu hotissanɗi so, te wa degis ƴissuut ɗah, ɗu hotis so. ” ? A ɓaatis nga ne “ Mi yii kaɗ ŋ Baabi. ” A waaɗ ye woo ŋ ineem ? 18 "Tas ƴissuuti" a woo, wa tokis ye ? Ɓoo inahɗi ini a waaɗ woo ndii. »

19 Yeesu inahha ne ɓa waaɗ ɗe meekis, a woosa ɓa ne : « Ŋ woo ɗu ne : “ Tas ƴissuut rek, ɗu hotissanɗi so, te wa degis ƴissuut ɗah, ɗu hotis so. ” Ɗu na meeksohe ŋ harmban ɗu ini ŋ waaɗ woo ŋ ineem e ? 20 Ñam na woyee ɗu wa te ambaat ne wa keeh, ɗu hey fuɗe, ɗu miskiɗke, raakan Adina neɓsiɗke. Ɗu, ɗu hey raake keeñ reehiɗ, waaye keeñ ciŋ ɗu hey mirndohe soos. 21 Ɓitiɓ heesa ɓasle ɗah, keeñiŋ ɗe na reehe reeh, raakee e wahtuuniŋ ɗe ree ; waaye a raak kuɓki po ƴut ɗah, a na alkohe alkoh miskiɗa, sagu soosi keeñiŋ ɗe soos ŋ ini a ɓay ɓo' Adina.

22 Ɗu nak, ɗiski wa nik, keeñ ciŋ ɗu reehiɗ, waaye ŋ hey ɗu hotisse ; ndeem keeñ ciŋ ɗu hey soose, te ali ɓo' kooɗohanɗi sumeem nga ɗu. 23 Ŋ mbeheem, ɗu heyɗi so meeksisse ali in. »

Yeesu woyissa ne : « Ñam na woyee ɗu wa te ambaat ne wa keeh, in nu ɗu kiim Baabi ŋ tiikiŋ ngo ɗah, a hey ɗu wa one. 24 Po woti, ɗu kiimɗi ali in ŋ tiikiŋ ngo. Kiimaat te ɗu hey rahse, jaar sumiŋ ɗu mit.

25 Woo ceem, ŋ woyiɗ ɗu ca ŋ woyohaaɗ ; jamano weɗi hay ŋ woyissanɗi na ɗu ŋ woyohaaɗ, waaye ŋ woyan na ɗu halang ŋ ini kaɗ ŋ Baabi. 26 Ŋ mbeheem, ɗu hey kiime Baabi ŋ tiikiŋ ngo, nikɗi haa ne a ñam kiimɗan ɗu Baabi. 27 Baabi ŋ haf ce a waaɗiɗ ɗu, sagu ini ɗu waaɗ to te ɗu nammba kos ne mi, ŋ puloh nga ɗe. 28 Ŋ puloh ŋ Baabi, ŋ hayya Adina ; ɗiski wa nik mi yii pul Adina, mi yii dokuk ŋ Baabi. »

29 Taalubeeciŋ ɗe woosa ɗe ne : « Aa ! Fu yii han woo halang kotii, fu woyisɗi ŋ woyohaaɗ. 30 Ɗiski wa nik, ɓoo inhiɗ ne fu inhiɗ jen, po sah, wa etohɗi ɓo' meeksee ɗa ; weɗ tah ɓoo kossa ne fu puloh ŋ Kooh. » 31 Yeesu loffa ɓa ne : « Ɗu kosiɗ kotii i ? 32 Inhaat ne wahtuuni weɗi hay te wa hayiɗ po ƴutiɗ, wi fu inah ne ɗu hey pasarkohe jen, yaa nu nga ɗah coot waas ce, ɗu faɗ to kiik ko ; waaye ŋ kiik ko haa, Baabi yii na so. 33 In ceem, ŋ woyiɗ ɗu ca, ne ɗu min raak jam ŋ niki ɗu nik nga so. Ɗu hey raake miskiɗ ŋ Adina, waaye ndengɗukaat ! Mi, ŋ saahiɗ Adina. »

<- Saaŋ 15Saaŋ 17 ->