1 Weɗi Yeesu woyoh taalubeeciŋ ɗe ne : « Kinaat jaahiɗ, kosaat Kooh te ɗu nam mbo kos. 2 Kahan Baabiŋ ngo raakiɗ genoha laayiɗ ; wa nikeeɗi ɗah ŋ heen ɗu wa woye ; mi na kee ɗu kooɗkiɗa ɗiski ɗu nikan. 3 Te ŋ kaɗ po ŋ kooɗkiɗ ɗu ɗiska ɗu nikan po ƴut ɗah, ŋ hey hayisse, ŋ ɓay ɗu ŋ serooso, ne ɗiski ŋ nik, ɗu nam nik nga. 4 Te ɗiski mi na kaɗe, ɗu inhiɗ waasiŋ wa. »

5 Tomaa woosa ɗe ne : « Heɗi, ɓoo inahɗi ɗiski fu na kaɗe, ɓoo min na inhoh waasi ? » 6 Yeesu loffa ɗe ne : « A mi waasi na keeh ki na kipes ki. Ali ɓo' minɗi kaɗ ŋ Baabi te a lahɗi nga so. 7 Ɗu inhiɗ to ɗah, ɗu hey name inah Baabiŋ ngo, te ini kooɗoh woti, ɗu inhiɗ ɗe, ɗu hotiɗ ɗe. »

8 Filip woosa ɗe ne : « Heɗi, teeɓa ɓoo Baabi, ineem hey ɓoo doye. » 9 Yeesu loffa ɗe ne : « Na maañi ŋ maañ na ɗu jen, fu inahɗi so poyi e Filip ? Ɓo' nu hot to ɗah, a hotiɗ Baabi, mbaa fu min na woyoh ne : “ Teeɓa ɓoo Baabi ” ? 10 Fu kosɗi ne mi yii ŋ Baabi te Baabi yii nga so e ? Woo ci mi na woyee ɗu na puloheeɗi nga so, a Baabi gen nga so na tume tumohaaɗ ciŋ ɗe. 11 Kosaat to ŋ ini ŋ woo ɗu ne mi yii ŋ Baabi te Baabi yii nga so ; wala sah ɗu kos sagu in ci ɗu hot to tume.

12 Ñam na woyee ɗu wa te ambaat ne wa keeh, yaa nu kos so ɗah, a hey name haɓiɗ in ci mi na haɓɗe ; a hey haɓɗe ci uup ca yak sah, laam mi na kaɗe ŋ Baabi. 13 In nu ɗu kiim ŋ tiikiŋ ngo ɗah, ŋ heya tume ne Kuɓki teeɓoh yaki Baabi yak. 14 Ɗu kiim mbo in ŋ tiikiŋ ngo ɗah, ŋ heya tume. »

15 Yeesu woyissa taalubeeciŋ ɗe ne : « Ɗu waaɗ to ɗah, ɗu hey taambɗe nakoh ciŋ ngo. 16 Te ŋ hey kiime Baabi, a eɗ ɗu Ɓaatɗohoh wiiriis ne a nik na ɗu po faw. 17 A Fuuɗsi Hoolohngaani, Fuuɗsiŋ Kooh. A yi na teeɓohe keeh ki ŋ ini kaɗ ŋ Kooh ; ɓi Adina minɗi ɗe teyɗuk laam ɓa minɗi ɗe hot te ɓa inahɗi ɗe. Waaye ɗu, ɗu inhiɗ ɗe, a yii na ɗu te a nikan nga ɗu. 18 Ŋ faɗanɗi ɗu ɗu nik komaaki yaɗu, ŋ hey hayisse nga ɗu. 19 Tas ƴissuut ɓi Adina hotissanɗi so waaye ɗu, ɗu hey yo hote, laam mi yii pes, te ɗu hey name pes. 20 Mbeheem ree ɗah, ɗu hey inhe ne mi yii ŋ Baabiŋ ngo, ɗu ɓii nga so te mi yii nga ɗu.

21 Ɓoyi waaɗ to, a yi ɓoyi amb nakoh ciŋ ngo te a taambɗee ca ; ɓoyi waaɗ to, Baabiŋ ngo hey ɗe waaɗe ; te mi, ŋ hey ɗe waaɗe, te ŋ hey ɗe teeɓe ini ŋ nik. »

22 Yudaa, ɓaahɗi na Yudaa Iskaryot meekissa ɗe ne : « Heɗi, wa ye raak po fu na hee ɓoo teeɓke dong, fu heyɗi teeɓke adinaani jen ? » 23 Yeesu loffa ɗe ne : « Ɓo' nu waaɗ to ɗah, a hey ambe woo kiŋ ngo. Baabiŋ ngo hey ɗe waaɗe, ɓoo hun hay nga ɗe te ɓoo gen na ɗe. 24 Ɓo' nu waaɗɗi so ɗah, a taambɗanɗi woo ciŋ ngo. Te inhaat ne woo ci ɗu na kerhe ŋ woyee ca, ca pulohɗi nga so, ca puloh ŋ Baabi woos so.

25 Ŋ woyiɗ ɗu woo ceem, ŋ ini ŋ ris nik na ɗu. 26 Waaye Ɓaatɗohohi, Fuuɗsi Hoolohngaani Baabi na hee woose ŋ tiikiŋ ngo, hey ɗu jangɗe in ci ɗu joy inah jen, a naandis ɗu in ci ŋ woo ɗu jen.

27 Jam weɗ ŋ faɗ na ɗu, jamiŋ ngo weɗ ŋ on ɗu, ŋ onɗi ɗu jam findi Adina na onohee wa. Mbaa kinaat jaahiɗ te kinaat neƴƴoh.

28 Ɗu kerhiɗ to woyeeɗa ne : “ Mi yii kaɗ te ŋ hey hayisse nga ɗu. ” Ɗu waaɗeen ndo ɗah, ɗu heen neɓse ŋ ini maa kaɗe ŋ Baabi, laam a Baabi uup po. 29 Ŋ woyiɗ ɗu in ceem woti, bala ca hayan, ne ca hay ɗah, ɗu kos. 30 Ŋ heyɗi woyisse na ɗu laayiɗ laam yi deg adinaanii yaah yii hay. A miniɗɗi so ali in, 31 waaye adinaani joyiɗ inah ne ŋ waaɗiɗ Baabi te mi na tumohe findi Baabi nakoh ho. Kurkaat ndii, ɓoo coot. »

<- Saaŋ 13Saaŋ 15 ->