1 Kos weɗ ne : wa woor ɓoyi ne in ci yaakaaru raakiɗ, te a ooluk ne in ci hotuuɗi nikiɗ. 2 Caac ciŋ ɓoo kosohee ɗaa, weɗi tah Kooh seede'iɗ ɓa seede moɗiɗ ŋ Fiis ci Hooliɗ ci.

3 A kos tah po, ɓoo hotta ne Adina ferohu woo kiŋ Kooh, kon in ci na hotke pulohɗi ŋ ini ɓo' min hot.[a]

4 A kos tah po, Abel seeƴukka wuu Kooh seeƴki uup baah wiŋ Kayin. A weɗ tah po Fiis ci Hooliɗ ci seede'iɗ ne a ɓo' yurhiɗ, Kooh seede'iɗ ɗe ŋ teyɗuka a teyɗuk seeƴkaŋ ɗe. A kos tah po, ŋ ini a nik ɓo' kaaniɗ jen, a ris woo poyi.[b]

5 A kos tah po, Henok coottohuusa ne a lahuu ŋ kakaan. A hotissuuɗi, laam a Kooh coottoh ɗe. Waaye bala a coottohsan ɗah, Fiis ci Hooliɗ ci seede'iɗ ne a neɓiɗ Kooh.[c] 6 Ɗal kos ɗah, ali ɓo' minɗi neɓ Kooh. Laam ɓo' nu waaɗ reɓ Kooh ɗah, fu joyiɗ kos ne a nikiɗ te a na aafe aaf ɓi na waakee ɗe.

7 A kos tah po, wa Noohin inhiɗu in ci hee raake te ɓo' hotɗi ca paaɗ, a kerhiɗta Kooh, a haɓiɗta gaal yakak ne a muciɗ ɓi kahan ce. A kosa a kosee tah po a ɓurra ɓi Adina, a rahassa kiyurhi kos na eɗohe.[d]

8 A kos tah po, wa Ibrahiima ɓeeɗku, a teyɗukka kaɗ kur ka a joyee rahas lamaah lamu te a inahɗi ɗiska a kaɗe.[e] 9 A kosa a kosee tah po, a gennda ŋ kur ka a gapse findi hanhe[f] ; a gennda ngaŋ ɗiip na Isaahha na Yaŋhooɓa ɓi Kooh namee gap ne ɓa hey name lam kur keem.[g] 10 A sekeeɗa ne a gen ŋ kur-taaha yipu ŋ atoh, wi fu inah ne a Kooh fiisoota, taɓahhaa.

11 A kos tah, Kooh tummba po Ibrahiima na Saarata minnda raak kuɓu, ali nik ne ɓa yakeen ŋ raak kuɓu, te a yi Saarata sah, a nikee ɓitiɓ minaaɗi raak kuɓu.[h] Wa wooree woor Ibrahiima ne Yi gapoh na dokkeeɗi finho.[i] 12 Tahha po wa raakangannga, ɓi laayiɗ rimkohha ngaŋ ɓo' yino yi useeɗi kakaan ; ɓa laayya po haa hor ciŋ eel ci, ɓa minaaɗiisa kindu po haa merhey miŋ yaah-cookmi.[j]

13 Ɓooɓi kosee ɓeem jen kaan na kos. Ɓa rahasɗi in ci Kooh gapohe, waaye ɓa ƴokiɗ ca, ɓa summba nga ca po haa ɓoyi na taambɗukee ɓo' ; ɓa woosa halang ne ɓa hanhe ngaŋ kehƴi,[k] ɓa ɓaaɓoh. 14 Ɓi na woyohee ɗaa na teeɓohe wooriɗ ne ɓa na waake kur ki ɓa min ɓaahoh. 15 Nikee ne, a kur ka ɓa pulohee weɗ hel ciŋ ɓa nikohee ɗah, ɓa heen mine dokuk nga. 16 Waaye ɓa waaɗee wi uup baah, wi nik ŋ Eel ci. Weɗ tah Kooh supukɗi ɓeeɗkohu Koohiŋ ɓa, laam a kooɗkiɗiɗ ɓa kur.

17 A kos tah po, wa Ibrahiima markiskasse, a teyɗukka ne a seeƴkoh kuɓkiŋ ɗe Isaahha, kuɓkiŋ ɗe yino-kongi. Waam raak ɗe gapuuɗ, 18 te ŋ in ci a gapse, Kooh woyiɗ ɗe nga ne : « Fu raakohan ɓi rimkohan nga ɗa ŋ Isaahha.[l] » 19 Ibrahiima markeen po a inahha ne Kooh raakiɗ hatili min hultiɗ kaaniɗ sah. Ŋ ineem, ɓo' miniɗ woo ne a wiku wiku kuɓkiŋ ɗe findi ɓoyi hultiɗu.[m]

20 A kos tah po, Isaahha nammba barke'iɗ Yaŋhooɓa na Esaaw ŋ in ca haye.[n]

21 A kos tah po, wa Yaŋhooɓa na kaane, a barke'iɗta yaa nu nga ŋ kuɓuuciŋ Yuusufa,[o] a ambaalukka ŋ hafiŋ ndooɗiŋ ɗe, a ƴekka ne a ñaamuk Kooh.[p]

22 A kos tah po, wa Yuusufa hee kaane, a woosa ŋ pulaŋ Israayel Misra, a dengkohha ŋ ini kaɗ ŋ ƴoh ciŋ ɗe.[q]

23 A kos tah po, wa Musaa rimu, yaay ɓa na baab ɓa ɗasiɗta ɗe caɓin kaahay. Laam ɓa hoteen moɗ ŋ kuɓka te ɓa neƴƴoheeɗi nakohaŋ buura.[r]

24 A kos tah po, wa Musaa yak, a teyɗukɗi kerhis ne a kuɓu ngaŋ kuɓki ɓitɓiŋ Firawnaana.[s] 25 A tannda ne a mbugalu na cuuɓiŋ Kooh, te raak kipes kiŋ ɗe mineen neɓ ; waaye neɓɗeem heen reehe te wa hee nike neɓiɗ ŋ bakaaɗ. 26 Teyɗuk heefu findi Kiristaani, weɗ ngisohɗee ɗe raak-raakiŋ Misra jen ; laam a degee has ciŋ ɗe ŋ aafi Kooh aafan ɗe.

27 A kos tah po, a pulohha Misra te a neƴƴohɗi ayrukaŋ buura.[t] Wa mand haa ne a hotee Yi na hotseeɗi, weɗ tah ɗe muñeeɗa.

28 A kos tah po, Musaa haɓiɗta seeƴkaŋ Paak, a woosa ɓooɓa ne ɓa reefaat ñif ma ŋ yahndeer ca ne malaakaani na yahrohe hay ɗah, a laaluu saaw ciŋ Israayel ca.[u]

29 A kos tah po, wa Israayel ca taamb ŋ ɗooƴ Cookma-Ruumnda, wa mannda haa ɓa taamb ŋ merhey suyiɗ ; ɓi Misra jeemmba nam taamb nga, masma onnda ɓa.[v]

30 A kos tah po, wa Israayel ca taambɗee miira ɗingee Yeriko, ɓa wileeɗaa, po ɓa raakka neeh yasna-kanak na ineem, miira keennda juƴ.[w]

31 A kos tah po, wa ɓooɓa taambɗeeɗi Kooh apse, Rahab, ɓitɓa toonkoha, mucca, laam a taambkohee taambkoh moɗoɗ espiyoŋ ca Israayel ca tuuƴe.[x]

32 Ŋ joy ye ɓaatis kotii ? Wa haɓɗi nga ne ŋ woo ŋ ini kaɗ ŋ Gedewon,[y] Barak,[z] Samson,[aa] Yefte,[bb] Dawuuda,[cc] Samuwel[dd] na woosuuɗ ci. 33 E kos tah po, ɓa folla ɓi buur po ɓa degga kur ciŋ ɓa yaah, ɓa tiindɗeeɗa waas, ɓa rahassa in ci Kooh gapohe, ɓa rannga nguɓ gaynde saahiɗ,[ee] 34 ɓa ƴimmba doole yongkaah,[ff] ɓa mucca ngaŋ kaañ ndang, ɓa rahassa hatili ɓa raakeeɗi, ɓa nikka jalmba ŋ hiñoh, ɓa ngekka hiñohoh caŋ kur ca cinooca.

35 Wa haɓɗi nga ne ŋ nam woo ŋ ini kaɗ ŋ ɓitiɓ ca wiksee kaaniɗ ciŋ ɓa hultiɗuuɗ.[gg] Na ɓi ɓo' wiiriis, ɓi kaan ŋ mbugal ca ɓa mbugalse, sagu waaɗa ɓa waaɗeeɗi findi ɓa hee pulɗohse nga ; ɓa waaɗee rahas hulti na eɗohe kipes ki ngisoh kipes ki ɓa hee ñake*11:35 Marka teerndi woysang 2 Makabee, saar 2. Teerndeem, wa ɓaah ngaŋ fiis ci na woyse "apokrif". Fu waak ca ngaŋ biibal ci ŋ peɗeem ci cinooci ɗah, cum raakiɗ ca, cum raakɗi ca.. 36 Na ɓi wiiriis, ɓi njembtasse, laɓseeɗa ngeer, jatngasseeɗa, ɓekseeɗa ŋ kasooci, te ɓa munnja. 37 Ɓum tapseeɗa atoh po ɓa kaannda, ɓinooɓi ɓesuusa ŋ leerni, [ɓinooɓi nattu'seeɗa,] ɓum apuusa na ndang, raakka ɓi raakeeɗi ali in, ɓa ɓekkee und mbaal wala und pe', ɓa wileeɗa ɓak nu ɓak, ɓa torhiɗasseeɗa, ɓa mbugalseeɗa. 38 Adina yeyyoo'eeɗi ɓa ! Ɓa nikee nga, ɓa kaɗeeɗa ɗisik nu ɗisik ŋ bilaf ci na tangooci, na ɗembohaaci nik ŋ hur ciŋ atoh ci na nung ciŋ kehƴi.

39 Ɓooɓeem jen, a kosiŋ ɓa tah po, ɓa seede'ɗuusa seede moɗiɗ. Moona deey, ɓa rahseeɗi ini Kooh gapohe. 40 Laam, Kooh kooɗkiɗee ɓoo in wiiriis wi uup baah, a waaɗeeɗi ne ɓa mitɗu te ɓoo ɓaahuu nga.

<- Heber ci 10Heber ci 12 ->