1 Ŋ finho ineem Aadama hunnda na ɓitiice Aawa, yeem ammba rook po a ɓasilla, a teekka kuɓka Kayin. A yi Aawa, a woosa ne : « Ŋ ɓaatɗohiŋ Nikiɗi ŋ raakiɗ ɓo' ƴaar. » 2 A raakissa kuɓu ƴaar wiiriis teeku Abel, taambɗoh Kayin. Abel nikka niiɗoh, Kayin nikka guuroh.

3 Wa kaɗoh kaɗoh po Kayin ɓayya ŋ in ca a guure, a puliɗta seeƴkaah[a] wuu Nikiɗi. 4 Abel nammba ɓay ŋ saaw caŋ gat caŋ ɗe, a puliɗta seeƴkaah ngaŋ sepet caŋ mbaal ca uupee fayum. Ŋ ineem Nikiɗi neɓuusa ŋ Abel, a teyɗukka ina a eɗoh, 5 waaye a neɓuuɗi ŋ Kayin na ina a eɗoh. Ineem ɓekka Kayin aay-keeñ miskiɗ, a ñuusɗukka. 6 Nikiɗi meekissa ɗe ne : « Fu ayruk ye po fikiiriŋ ɗa mannda an ? 7 Tumohaaɗiŋ ɗa baah ɗah, fu hey teyɗukɗasse ; fu tumɗi baahiɗ ɗah, bakaaɗi weɗi wii raɗukka ŋ nguɓu tuuƴ fu na sekee ɗa, ne wa yilif ɗa, te ya fu joya min. »

8 Waaye, Kayin woosa taambɗoh ce ne ɓa kaɗ yohon ca. Wa ɓa nik ŋ yohon ca, Kayin soonnga Abel, a appa ɗe.

9 Ɗekka po Nikiɗi meekissa ɗe ne : « Kayin, a nde taambɗoh fu Abel ? » A loffa ɗe ne : « Ŋ inahɗi kat, ñam na niiɗee ɗe haa. » 10 Nikiɗi woosa ɗe ne : « Fu haɓiɗ ye an ? Ŋ kerhiɗ ñif miŋ taambɗoh fu looƴkohha kehƴi po nga so ne wa wirndukɗu. 11 Fu alkuuɗ po merhey mi faɗiɗ ɗa, laam ya fu aniɗa ñif miŋ taambɗoh fu fu aam. 12 Fu guuris merhey mi ɗah, wa eɗissanɗi ɗa in. Fu na hee hey wiltiɗohe ŋ kehƴi, fu genanɗi ɗisik yino. »

13 Kayin woosa Nikiɗi ne : « Ini fu deg go ɓitootiɗ lool po ŋ antalɗaa. 14 Woti fu aañiɗ to ŋ merhey mi an e ? Ŋ hotiɗ ne ŋ hey ɗa use, mi na hee hey wiltiɗohe ŋ kehƴi, ŋ genanɗi ɗisik yino po ɓo' nu hot to ɗah, a ap po. » 15 Nikiɗi woosa Kayin ne : « Kon, ɓo' nu ap ɗa ɗah, fu hey wirndukɗasse waas yasna-kanak. » A waakiɗta Kayin inhisoha, ne ɓo' nu hot ɗe ɗah, a apuu ɗe.

16 Wa taambohha ɗaa, Kayin kaɗta gena kur ka na woyse Nood, ŋ pulohaaɗ-nohaŋ Eden, a ussa Nikiɗi.

17 Kayin hunnda na ɓitiice, yeem ammba rook po a ɓasilla, a teekka kuɓka Henok. Kayin yippa kur-taah, a teekkaa ngaŋ kuɓkiŋ ɗe Henok. 18 Henok nikka baabiŋ Irad, Irad nikka baabiŋ Mehuya'el, Mehuya'el nikka baabiŋ Metusa'el, Metusa'el nikka baabiŋ Lemek.

19 A yi Lemek, a ɓayya ɓitiɓ kanak, yi koc na woyse Aada, yi kanakɗoh, Silla. 20 Aada a yi rim Yabal, baab-caaciŋ ɓi na gene ŋ ɗiip[b] ci, niiɗe gat ci. 21 Taambɗoh ce ƴaar, ya teekse Yuubal, a yi baab-caaciŋ halmoh ci na mbiiɓoh ci. 22 Silla, ɓitɓiŋ ɗe yinoora, rimmba Tubal-Kayin, sisɓi na tiɓe moos na tiwiñ. Tubal-Kayin raakeen taambɗoh ɓitiɓ teeku Naama.