1 Ɓaah ciŋ ngo, ɓo' telu tumee ini yurahɗi ɗah, ɗu ɓi na pesohe Fuuɗsi Hoolohngaani, ɓaatɗohaat ɗe po a dokuk ŋ waas, wa hun na woo soosiɗ. Te yaa nu nga ɗu ɗah, marak haf ce baahiɗ po a namuu kafnduk. 2 Yaa nu nga ɗah raankohaat morom ce ɓitki a ɓituk. Ɗu tuma ɗah, ɗu mitiɗ waasiŋ Kiristaani. 3 Yi amb ne a yi uupiɗ njiriñ, te a ali in haa, a na leye haf ce. 4 Yaa nu nga markisaat ini a na tume, a hot ini neɓ ɗe nga ɗah, a neɓsaat, waaye a ɓeesuu wa ŋ ɓinooɓi ; 5 in nu ɓo' tum ɗah, a tuma haf ce.

6 Yi na jangɗasse woo kiŋ Kooh, eɗaat yi na jangɗee ɗe ngaŋ baahiɗ ci a raak. 7 Kinaat lee haf ɗu ; Kooh na njembtasseeɗi. Ini ɓoyi sok, weɗ a nguɗan. 8 Yi sok wuu ini neɓ faaniŋ ɗe, nguɗan ini puloh ŋ neɓiɗ ciŋ faaniŋ ɗe, maanaam ɗumbu, waaye yi sok wuu Fuuɗsi Hoolohngaani, nguɗan ini puloh ŋ Fuuɗsi Hoolohngaani, maanaam kipes ki heyɗi reehe. 9 Ɓoo kinaat yaaɓ ŋ tum in baahiɗ, laam, ɓoo hey nguɗe ŋ jamanooniŋ wa, ne ɓoo faɗsukɗi nga ɗah. 10 Mbaa, ɓoo tumɗaat ɓooɓi jen in baahiɗ, ŋ woyisɗi ɗa ɓaah ciŋ ɓoo kosiɗ ci feeh ɓoo ɓii mina ɗah.

11 Ɗu hotiɗ fiis ci yakak ci mi na fiisootee wuu ɗu na yaahiŋ ngo. 12 Ɓi waaɗ hotaat to ŋ ini kaɗ ŋ in ci min hotu, findi ɓa hend jen, ɓeɗ ɓi na woyee ɗu ne ɗu nguɗuk. Ɓa waaɗ in yino dong nga, weɗ ne ɓa sang tolfiɗu sagu kurwaaniŋ Kiristaani. 13 Ɓeɗ ɓi nguɗuk, ŋ haf ɓa sah, ɓa taambiɗɗi waasiŋMusaa ; waaye ɓa waaɗ ne ɗu nguɗuk ne ɓa min yaksiɗuk nga.

14 Waaye, ini kaɗ nga so, ŋ heyɗi waake muk yaksiɗkoha ŋ ali in wiiriis ɗal ŋ kurwaaniŋ Heɗ ɓoo Yeesu Kiristaa. Sagu kurwaani, findi ŋ hotoh Adina, wa mand na ini daaƴu ŋ kurwaa, wa raakisɗi njiriñ nga so, te Adina na namee so hotoh ɗaa. 15 Ini raak njiriñ, wa nguɗuk haa, wa nguɗkaaɗi haa, waaye nik feruuɗ as, weɗ raak njiriñ. 16 Jam na yirmoh nikaat na ɓo' nu na taambɗe ini ŋ nakoh wii ɗah, ca nam nik na Israayeliŋ Kooh !

17 Ini kooɗoh ndii, ali ɓo' kinaat to yaaɓiɗ ; mi, ŋ raak ŋ faaniŋ ngo muuy-gaañ ci teeɓoh ne ŋ ɓaah ŋ Yeesu.

18 Ɓaah ciŋ ngo, baahohiŋ Heɗ ɓoo Yeesu Kiristaa nikaat na ɗu ! Amiin !

<- Ɓi Galaat 5