1 Wa Firawna sang, Nikiɗi woosa Musaa ne : « Kaɗa ŋ Firawna, fu woo ɗe ne : “ Nikiɗi Koohiŋ Heber ci woo ne, faɗa ɓooɓiŋ ɗe ɓa kaɗ ɗe ñaamka. 2 Fu sang, fu ris ɓa amb ɗah, 3 marka, a hey dege yaahiŋ ɗe ŋ ɗoopaat ciŋ ɗa, kosaay miskiɗ wi na kaɓkohe ruhus ŋ panis ci, mbaam ci, ngeelemb ci, inoh ci, mbaal ci na pe' ci. 4 Waaye Nikiɗi hey talsohe ɗoopaat ciŋ ɓi Misra na ciŋ Israayel ci, ali yino kaananɗi ngaŋ ciŋ Israayel ci. 5 A gapiɗ naamooneem, wa nikan kim ngaŋ kur ki. ” »

6 Wa Kooh wiis, Nikiɗi tummba ina a woyee, ɗoopaat caŋ ɓi Misra kaannda ŋ kur ka jen, waaye ali yino kaanɗi ŋ caŋ Israayel ca. 7 Weɗi Firawna woosoh ɓi ɓo' ne ɓa meeksoh, waaye a woyuusa ne ali ɗoopaat yino kaanɗi ŋ caŋ Israayel ca po ya uup ƴissuut sah ! Hondohɗi keeñiŋ ɗe rissa ndengiɗ, a faɗɗi Israayel ca ne ɓa coot.

8 Wa Firawna sang ɓa faɗ, Nikiɗi woosa Musaa na Aaruna ne : « Nuyaat ɗuund ŋ yaah ciŋ ɗu po ca riif, ŋ utohaani ; hey ɗah, Musaa njafa ŋ ɗafki, ŋ fiki Firawna. 9 Ɗuundeem hey ɓoƴsuke ɗuuku, wa ruhus ŋ kur kiŋ Misra jen, ŋ ɓooɓi, na ɗoopaat ci, wa tum ufis ci na hee pulɗe mapuuƴ ŋ faan ciŋ ɓa. » 10 Musaa na Aaruna ɓayya ɗuunda, Musaa njaffaa ŋ ɗafka ŋ fiki Firawna, wa tummba ufis ca na pulɗe mapuuƴ ŋ faan caŋ ɓooɓa na ɗoopaat ca. 11 Heɗ haf caŋ Misra minɗi tufuk ŋ fiki Musaa sagu riifa ɓa riifee na ufis ca, findi ɓi Misra jen. 12 Findi Nikiɗi woyohee wa Musaa, a ndengiɗta keeñiŋ Firawna, yeem sikɗukɗi Musaa na Aaruna.

13 Wa Firawna sang ɓa sikɗuk, Nikiɗi woosa Musaa ne : « Kurka kim na ɓaaɓa teel fu kaɗ ŋ Firawna, fu woo ɗe ne : “ Nikiɗi, Koohiŋ Heber ci woo ne : Faɗa ɓooɓiŋ ɗe ɓa kaɗ ɗe ñaamka. 14 Waasii a hey ruhsiɗe ŋ ɓooɓiŋ ɗa na dag ciŋ ɗa na ɗa sah, naamoociŋ ɗe jen, ci na hee ɗa miske ŋ keeñ. Wa teeɓ ɗa ne, ali in hendɗi na Nikiɗi ŋ kehƴi jen. 15 Te a raɗseen yaahiŋ ɗe a laɓ ɗa na kosaay ki na ape ɗah, fu heeɗi nikisse ŋ kehƴii, fu na ɓooɓiŋ ɗa. 16 Waaye a yi tufkiɗ ɗa ne a min ɗa teeɓ hatiliŋ ɗe te tiikiŋ ɗe wil kehƴi jen. 17 Te fu taalndiɗiɗ, fu ris ndeng haf ŋ ɓooɓiŋ ɗe, fu sangiɗ ɓa faɗ ne ɓa coot, 18 weɗi tah, marka, kim ŋ wahtuunii, a hey toɓe atoh galacaac raakiɗ hatil, mand naa raakohɗi ndii, ina Misra nikoh poyi. 19 Ɗiski wa nik, nakoha ɗoopaat ciŋ ɗa na ini fu raak jen ɗasɗu, fu tumɗi ineem ɗah, ɓooɓi wala ɗoopaat ci wa raakan ŋ hari jen, wa hey ca ape. ” »

20 Wa dag caŋ Firawna kerah woo ceem, ɓum nga ɓa ambeen woo kiŋ Nikiɗi, ɓa arra ɓay ñaam caŋ ɓa na ɗoopaat caŋ ɓa ŋ kahan ca. 21 Ɓinooɓa ambeeɗi woo kiŋ Nikiɗi, ɓa faɗta ñaam caŋ ɓa na ɗoopaat caŋ ɓa ŋ hara. 22 Nikiɗi woosa Musaa ne : « Raɗsa yaahiŋ ɗa ŋ eel ci, toɓ galacaac keen ŋ Misra, ŋ ɗafuk ɓooɓi na ɗoopaat ci na in ci na guurse ŋ kur ki jen. » 23 Musaa raɗissa ndooɗaŋ ɗe ŋ eel ci, Nikiɗi indngeeɗa, a toɓeeɗa galacaac, melña doheeɗa in ci ŋ kehƴi. 24 In mand ɗaa misik raakohɗi ina Misra nikoh poyi ; toɓaŋ atoh caŋ galacaaca miskohngaana, wa hunee na meleñ te wa keeneeɗa ɗisik nu nik. 25 Wa tapukka in ca nikee ŋ bilaf fa jen na hatil, ɓooɓa na ɗoopaat ca ; wa weersohha kidig ca na in ca soksee ŋ yohon ca. 26 Wa tasee ree ŋ Gosen dong, ɗiska Israayel ca gene.

27 Firawna nakohha ɓeeɗkiɗu Musaa na Aaruna, a woosa ɓa ne : « Waasii ŋ bakaaɗiɗ, a mi na ɓooɓiŋ ngo tooñ, Nikiɗi a yi nik ŋ keeh. 28 Kiimaat ɗe, ɓoo kaaniɗ na toɓiŋ atoh ciŋ galacaaci yakki na indngi, ŋ hey ɗu faɗe ɗu coot, ŋ ambissanɗi ɗu. » 29 Musaa loffa ɗe ne : « Ŋ pul kur ki ɗah, ŋ hey raɗse yaah ciŋ ngo ŋ Nikiɗi, ŋ kiim ɗe, indngi na toɓiŋ galacaaci tufuk po fu inah ne Nikiɗi a yi raak kehƴi. 30 Waaye, ŋ inhiɗ ne fu na dag ciŋ ɗa, ɗu nupɗi Nikiɗi Kooh paaɗ. »

31 Raak guuraah caŋ ɓa, lorsoona ɓiɗseeɗa, leeŋ'a*9:31 leeŋ: wa na guurse ne wa teɗohu kulɓa. poseeɗa, tahha po toɓa yahrohha ca. 32 Waaye heet caŋ beleeca kanak ca yahrukoheeɗi sagu mirndoha ca na mirndohe. 33 Musaa kurkohha ŋ ɗiskaŋ Firawna, a pulla kur-taaha, a raɗissa yaah ciŋ ɗe ŋ Nikiɗi, toɓa na indnga na toɓaŋ galacaaca toppa ndaam.

34 Wa Firawna hot ne toɓaŋ galacaaca hun na indnga seekiɗ, a taalndiɗta a bakaaɗeeɗa. A ndengiɗta keeñiŋ ɗe, dag caŋ ɗe nammba tum ɗaa. 35 Findi Nikiɗi woyohee, wa taambohha ŋ Musaa, keeñiŋ Firawna nikka ndengiɗ, a faɗɗi Israayel ca ne ɓa coot.

<- Pula 8Pula 10 ->