1 Nikiɗi woosa Musaa ne : 2 « Mbehi koc ŋ caɓni koc, fu hey yipe Genohaani, weɗ Ɗiipi-na-Cohohse. 3 Fu ɓay Wahndeeni ɗaak in ci na teeɓohe Ambtiɗohi, fu ɓeka ŋ ɗooƴi, fu ɗasiɗa na ridooni saɓsohaani. 4 Fu ɓay taaɓli, fu deg in ci na degse nga. Fu ɓay degohaaniŋ laampaaci, fu deg laampaaci ŋ ɗafuk wa. 5 Fu ɓay seeƴkohaani haɓɗohu urus, suusoha cuuraayi, fu dega ŋ fiki Wahndeeniŋ Ambtiɗohi ndo fu reyan ridooni saɓsohaani ɗah. Fu nam ɓek ridooniŋ aasohaaniŋ Genohaani.

6 Fu deg seeƴkohaani na dohohse hoosuuɗ ci ŋ aasohaaniŋ Genohaani, Ɗiipi-na-Cohohse. 7 Fu deg beñwaari na ɓoktukohse ŋ harmban ɗiipi na seeƴkohaani, fu tuma masuɓ. 8 Fu yip ɗingiŋ bayaali wil Genohaani jen, fu ɓek rido ŋ aasohaaniŋ wa.

9 Fu ɓay diwi na hoolɗohse hoolɗuuɗ ci wuu Kooh, fu yiif ŋ Genohaani na in ci nik ŋ ɗooƴi jen. Fu hoolɗohana ɗaa na tumohaaci hun naa jen, jaar wa nik in hooliɗ wuu so. 10 Fu nama yiif ŋ seeƴkohaani na dohohse hoosuuɗ ci na tumohaaci hun naa jen, fu hoolɗoha ɗaa, jaar seeƴkohaani nik in ye hoolan wuu so. 11 Fu nam yiif diwi ŋ ɗafuk beñwaari na ɓoktukohse na degohaaniŋ wa, fu hooliɗa wuu so.

12 Fu ɓay Aaruna na kuɓuuciŋ ɗe po ŋ aasohaaniŋ ɗiipi, fu ɓook ɓa na masmi. 13 Fu ɓekiɗ Aaruna kulɓaaci hoolɗuuɗ ci wuu so, fu yiif ɗe diwi, fu hoolɗoh ɗe ɗaa ne a pangkiɗee so findi seeƴkiɗoh. 14 Fu ɓeeɗuk kuɓuuciŋ ɗe ƴaar ci, ɓa reɓ, fu ɓekiɗ ɓa kulɓaaciŋ ɓa. 15 Fu yiif ɓa diwi findi baab ɓa, ɓa hool wuu so, ne ɓa pangkiɗee so findi seeƴkiɗoh. Ineem hey tahe po, ɓeɗ na ɓi rimkohan nga ɓa nikan seeƴkiɗoh po faw. »

16 Musaa haɓiɗta ina Nikiɗi nakee ɗe jok, a haɓiɗta ca jen. 17 A yippa Genohaani ŋ mbehi koc ŋ caɓni koc ŋ kiis ki kanakɗoh ŋ pulohaŋ ɓa Misra. 18 Musaa tufkiɗta Genohaani ; a ɓekka tufkohaaci, a tufkiɗta kaadar ci, a ɓekka laat ci, a yippa kumbin ci. 19 A degga ɗiipi ŋ ɗafuk Genohaani, a uloha ɗiipi baas findi Nikiɗi nakohee ɗe wa.

20 Musaa ɓayya atoh ciŋ Ambtiɗohi, a ɓekka ca ŋ Wahndeeni, a ɓekka ndooɗ ci na ɓayohsee wa, a ranngaa na kunohaaniŋ wa, ɗiski na romkohse. 21 A ɓekka Wahndeeni ŋ Genohaani, a ɓekka ridooni saɓsohaani ne wa ɗasiɗ Wahndeeni findi Nikiɗi nakohee ɗe wa.

22 A ɓekka taaɓli ŋ ɗooƴ Ɗiipi-na-Cohohse, ŋ ɓaki ñaahmi ne fu eɗ pulohaaɗ-noh finho, fu aasee ɗah, ndo fu reyan ridooni ɗah. 23 A degga mbuuruuci ŋ ɗafki, ŋ fiki Nikiɗi, findi Nikiɗi nakohee ɗe wa. 24 A ɓekka degohaaniŋ laampaaci ŋ ɗooƴ ɗiipi, wa yurhiɗkohha na taaɓli, ŋ ɓaki singi. 25 A degga laampaaci ŋ ɗafkiŋ wa, ŋ fiki Nikiɗi, findi Nikiɗi nakohee ɗe wa.

26 A ɓekka seeƴkohaani ursi ŋ ɗooƴ ɗiipi, ŋ sero ridooni saɓsohaani, ndo fu reyan nga ɗah. 27 A suussa cuuraay ŋ ɗafuk wa findi Nikiɗi nakohee ɗe wa. 28 A ɓekka ridooniŋ aasohaaniŋ Genohaani.

29 A degga seeƴkohaani na dohohse hoosuuɗ ci ŋ sero aasohaaniŋ Genohaani, weɗ Ɗiipi-na-Cohohse. A seeƴkohha ɗoopaat nga, a dohha ɗe po a hoommba, a nammba eɗoh ɓi pees findi Nikiɗi nakohee ɗe wa.

30 A degga beñwaari ŋ harmban ɗiipi na seeƴkohaani ; a tummbaa masuɓ ɓooksukoha. 31 Musaa na Aaruna na kuɓuuciŋ Aaruna ɓookka yaah ciŋ ɓa nga na kot ciŋ ɓa. 32 Ŋ ineem mbaɗna ɓa hee aase ŋ Ɗiipi-na-Cohohse wala ɓa reɓee seeƴkohaani ɗah, ɓa ɓook yaah na kot findi Nikiɗi nakoha Musaa.

33 A tufkiɗta ɗingiŋ bayaali, wa willa Genohaani na seeƴkohaani. A ɓekka ridooni ŋ aasohaaniŋ ɗingiŋ bayaali. Musaa reehɗoh pangki ɗaa.

34 Waɗ eel ɗuuku uloh Ɗiipi-na-Cohohse, yaki Nikiɗi yak riiffaa, weɗ wi Genohaani. 35 Ŋ ineem Musaa mineeɗi aas nga sagu eeliŋ ɗuukri ulee wa na riifi wa riifee na yaki Nikiɗi yak. 36 Ini kooɗoh ndii, ŋ ɗooƴ yongsiɗkohiŋ ɓa jen, Israayel ci meeɗ ɗof ne ɓa coot mbeh nu eeliŋ ɗuukri kuruk ŋ Genohaani, wa tiimba ɗah. 37 Waaye eeli ɗofɗi ɗah, ɓa na kaɗeeɗi po mbaɗna wa kurkan. 38 Israayel ci jen meeɗ hot nga, noh reesa ɗah, eeliŋ Nikiɗi nik ŋ ɗafuk Genohaani ; wek reesa ɗah, yongkaah gile. Wa nikohee ɗaa ŋ yongsiɗkohiŋ ɓa jen.

<- Pula 39