1 Raakeen ƴaar ŋ Heber ca, ɓaah ŋ cuuɓiŋ Lewi, a tokka ɓitiɓ ŋ cuuɓeem ; 2 ɓitɓeem ammba rook, a raakka kuɓu ƴaar, a hotta ne kuɓka moɗiɗ, a ɗasiɗta ɗe ini ree caɓin kaahay. 3 Wa kaɗta po a minisɗi ɗe ɗasiɗ, a ɓayya pañe teɗohuuɗ paangfi na woyse hapeel[a], a reeffaa godirong na daakaande, ne masuɓ aasuu nga, a ɓekka kuɓka nga, a ɗaakkaa ŋ hapeel ca paar ŋ masmaŋ sereendaŋ kalaŋ Niil. 4 Taambɗoh kuɓka, ya ɓitɓa, cangtiɗukka, a markeeɗa ini raakan.

5 Wa degga ƴissuut, kuɓkiŋ Firawnaana ɓitɓa kaɗta ɓookka ŋ kala, huntoh caŋ ɗe ɓitiɓ ca tiindsukeeɗa ŋ sereendaŋ kala, a ƴokka pañe ŋ ɗooƴ paangiica, a woossa ñaamaŋ ɗe ɓitɓa wa, a ɓayyaa. 6 Kuɓkiŋ Firawnaana kunissaa, a hotta kuɓu ƴaar ŋ ɗooƴa fuɗeeɗa. Kuɓka misikka ɗe, a woosa ne : « A ɓaah ŋ kuɓuuciŋ Heber ci. »

7 Wa taambɗoh kuɓka hot ineem, a woosa ɗe ne : « Fu ɗaas so de', andi fu waaɗiɗ ne ŋ kaɗ ɗa waakɗa ŋ Heber ci ɓitɓi na hee ɗa ɗe ɓapɗiɗe e ? » 8 A woosa ɗe ne : « Ee, kaɗa. » A kaɗta, a hayya na yaayiŋ kuɓka. 9 Kuɓkiŋ Firawnaana woosa yeem ne : « Ɓayaa ɗe, fu ɓapɗiɗee so ɗe, ŋ hey ɗa wirnde. » Ɓitɓa ɓayya ɗe, a ɓapɗeeɗa ɗe.

10 Wa kuɓka omb, a wikka kuɓkiŋ Firawnaana ɗe, yeem tummba ɗe kuɓkiŋ ɗe ; a woosa ne : « Ini ŋ nihsoh ɗe ŋ masuɓ tahiɗ po ŋ teekan ɗe Musaa[b]. »

11 Wa Musaa nik yakak, a kaɗta marka ɓaah caŋ ɗe Heber ca ; a hotta pangka ɓa degu, na findi wa miskoh ! A nammba hot ƴaar ɓaah ŋ ɓi Misra laɓeeɗa ƴaar Heber laɓ miskiɗ. 12 Musaa marakka ndeem jen, a hotɗi ɓo', a laɓpa ƴaara genee Misra, a appa ɗe, a uummba fiɗaafiŋ ɗe ŋ merhey mi. 13 Kooh wiissa, a hayissa, a raakka Heber kanak hiñoheeɗa ; a woosa ƴaara tooñ ne : « Eh ! Wa ye tah fu laɓee ƴaari fu inah ne a ɗu ɓaah ? » 14 Waaye ƴaara loffa ɗe ne : « Ya ɓa tum ɗa kilifaaniŋ ɓoo na atte'ohiŋ ɓoo ? Fu waaɗ to nam ap findi fu apoh ƴaariŋ Misraaci e ? » Musaa inahha ne ina a tum inhuuɗ, a neƴƴohha. 15 Firawnaana kerahhaa, a waaɗta ɗe ap, waaye a saandohha kur kaŋ Majaan.

Wa Musaa ree Majaan, a ɓoof ŋ sero naac. 16 Waam seeƴkiɗohaŋ Majaan raakeen kuɓu cafaƴ yasna-kanak. Ɓa kaɗta naaca, ɓa neyya hongol ca, ne ɓa aniɗ pe' ca na mbaal caŋ baab ɓa. 17 Waaye ɓi niiɗoh hayya, aannja ɓa na ɗoopaat caŋ ɓa. Weɗi Musaa kurkoh, hirippa ɓa, a anɗiɗta ɓa ɗoopaat ca.

18 Wa komaakca ɓitiɓ ca haad, Rewyel[c] baab ɓa woosa ɓa ne : « Ca' ! Wa ye tah ɗu teella hay woti ? » 19 Ɓa loffa ɗe ne : « A ƴaar gen Misra a yi tos ɓoo ŋ niiɗoh ci, a yi neyiɗ ɓoo sah, a aniɗta ɓoo ɗoopaat ci. » 20 A woosa ɓa ne : « A nde ƴaara ? Wa ye tah ɗu faɗta ɗe ndaam ? Kaɗaat ɗu ɓeeɗkaa ɗe a ñam na ɓoo book ! »

21 Ŋ mirndaani Musaa teyɗukka nik ŋ kahan ƴaara, yeem onnda ɗe ɓitiɓ, kuɓkiŋ ɗe na woyse Sefora. 22 A raakka na ɗe kuɓu ƴaar, a woosa ne : « Ŋ genohaah ŋ kur jaambur. » Weɗ tah, a teekka kuɓka Geersom[d].

23 Musaa nikka ŋ Majaan in maañiɗ po buuraŋ Misra ŋ jamanoonaam kaannda. Israayel ca rissa ŋ ñaam kaŋ ɓa, ɓa iineeɗa, ɓa leehkeeɗa ; leehuk caŋ ɓa ne ɓa naafu, reesa ŋ Kooh. 24 Kooh kerahha ca, a naandsukka ambtiɗohiŋ ɗe na Ibrahiima na Isaahha na Yaŋhooɓa. 25 A marakka ŋ Israayel ca, a inahha ini ɓa nikoh.

<- Pula 1Pula 3 ->