1 Ŋ jamanoonaam, Yetoro seeƴkiɗohaŋ kur kaŋ Majaan, payum Musaa ƴaar, kerahha in ci Kooh haɓɗiɗ Musaa jen, na Israayel wi cuuɓiŋ ɗe, ne Nikiɗi pulɗohiɗ ɓa Misra.

2 Sefora ɓiti Musaa nikee ŋ kahan baab ɓa Yetoro, raak a Musaa tuuƴee ɗe ne a nikohaah nga, 3 na kuɓuuciŋ ɗe ƴaar ci kanak ci. Musaa teekee saawa Geersom[a] laam a woyee ne : « Ŋ genohaah ŋ kur jaambur. » 4 Ƴina teekuusa Eliyeser (Koohiŋ ngo ɓaatɗohoh) laam, Musaa woyee ne : « Koohiŋ baab ɓoo, yi hirpohiŋ ngo, mucɗiɗ to ŋ yaah ciŋ Firawna. »

5 Yetoro hunnda na ɓiti Musaa na kuɓuuciŋ Musaa kanak ci ; ɓa kaɗta po ɓa reesa kehƴa hulanga Israayel ca dalohee ŋ sero tangooraŋ Kooh. 6 Yetoro woosohha ŋ Musaa ne a woysaat ne, a yaa hay, a yi na Sefora na kuɓuuciŋ ɗe kanak ci. 7 Musaa pulla, kaɗta coha na ɓa.

Wa a ree a ƴekiɗta payum ce Yetoro, a morgiɗukka ɗe, ɓa kañɗohha po ƴutta ɓa aassa ŋ ɗiipa. 8 Musaa naandsukka ɗe jen findi Nikiɗi tumoh na Firawna na ɓi Misra sagu Israayel, na miskiɗ ci ɓa raak ŋ waasi te Nikiɗi pulɗohha ɓa nga ca. 9 Yetoro summba ŋ in ci baahiɗ ci jen, ca Nikiɗi haɓɗiɗ Israayel ca wi a pulɗoh ɓa ŋ yaah ciŋ ɓi Misra. 10 A woosa ne : « Nikiɗi yakɗaah, a yi pulɗoh ɗu ŋ yaah ca Firawna na ɓi Misra degee ɗu. 11 Ŋ teyɗukiɗ kotii ne Nikiɗi a yi uup in ci ambu ne ca kooh jen ; a teeɓohiɗa wi Israayel ci na aƴaarkohse. » 12 Yetoro ɓayya ɓi ɗoopaat, a eɗohha ca seeƴkaah wuu Kooh, yino hoomɗaah, na ɓi wiiriis hoosaah. Aaruna na yakak caŋ Israayel jen hayya, ɓa ɓaahha na ɗe kañam kaŋ seeƴka ŋ fiki Nikiɗi.

13 Wa Kooh wiis na ɓaaɓa, Musaa ɓooffa ne a atte leer caŋ ɓooɓa. Ɓa hooɓukka tufuk ŋ fikiice na ɓaaɓa po na niina. 14 Yetoro payum ce hotta ŋ in ca a na haɓɗiɗe cuuɓa, na findi ca laayoh, a woosa ɗe ne : « Fu na haɓɗe ye wii, wa ye tah fu atte'ee kiik fu ? Mboolndi tufuk na ɓaaɓi po na niini, ɓa sekee nga ɗa ! » 15 Musaa loffa ɗe ne : « Mboolndi na haye nga so ne ɓa inah ini Kooh woo, 16 ɓa raakka ini ɓa leer ɗah, ɓa hay nga so, ŋ attee ɓa, ŋ teeɓ ɓa ne ɓa inah in ci Kooh sangoh na ci a nakoh. »

17 Payum ce Yetoro woosa ɗe ne : « Findi fu na tumohe, wa ɗaa haa. 18 Fu hey yaaɓɗe haf fu, fu yaaɓiɗ ɓooɓi na haye nga ɗa ; inii, wa ɓit ɓit, fu minɗaa tum kiik fu. 19 Ɗiski wa nik, sikɗuk ko ŋ ɓaatɗoh ɗa ƴissuut, te Kooh hunaat na ɗa nga : Fu, nika ŋ harmban cuuɓi na Kooh fu ɓayee leer ci nga ɗe. 20 Fu teeɓee ɓa ɗiski ɓa joy top, fu teeɓee ɓa nakoh ciŋ Kooh. Fu teeɓ ɓa waasiŋ ɗe, na ini ɓa joy haɓiɗ.

21 Waaye waaka nga ɓa ɓi ɓo' mitiɗ, nupiɗ Kooh, yurhiɗ, ɓi fu inah ne ɓa waaɗɗi in lewaaɗi ; fu tufkiɗ ɓa, raak ɓi na hee adgohe junni (1000) ɓo', raak ɓi adgohan ɓo' teemet (100), ɓum ɓo' ndaŋkiyaah-yatuus (50), ɓinooɓi ɓo' ndaŋkiyaah. 22 Ɓeem hay ɗah, ɓa atte'ee Kooh-nu-wiis leer ci ƴin-ƴin ciŋ mboolndi, ɓa wikee ɗa ci uupiɗ etoh. Ineem hey ɗa eɗfiɗɗe pangkiŋ ɗa, fu ɓaahana ɓaah na ɓa. 23 Fu haɓiɗa, te Kooh teeɓ ɗa waasi ɗah, fu heyɗi yaaɓɗe haf fu te ɓooɓii jen hey mine haad moɗoɗ. »

24 Musaa taambiɗta woo kaŋ payum ce jok, 25 a tannda ɓi ƴaar mitiɗ ŋ Israayel, a tufkiɗta ɓa, ɓum adgohha ɓo' junni (1000), ɓum ɓo' teemet (100), ɓum ɓo' ndaŋkiyaah-yatuus (50), ɓum ɓo' ndaŋkiyaah. 26 Ɓa atte'eeɗa leer ca ƴin-ƴin caŋ mboolnda Kooh-nu-wiis, ɓa ɓayeeɗa in ca miskiɗ ca ŋ Musaa ne a attee ca. 27 Musaa askohha na Yetoro payum ce, yeem dokukka kur ɓa.

<- Pula 17Pula 19 ->