1 Ini kaɗ nga ɗu, ɗu nikee kaaniɗ sagu ɗal ciŋ ɗu na bakaaɗ ciŋ ɗu. 2 Ɗu taambɗee pesohaaɗiŋ adinaanii, ɗu taambɗee Seytaani yi adgoh feruuɗ ci baahaaɗiici raak hatil ŋ harmban kehƴi na Eel ci, a yi na tumɗukohe ɓi sang Kooh. 3 Ɓoo jen, ɓoo ɓaahee ŋ ɓi sang Kooh, ɓoo pesohee taambiɗ kiñin ciŋ ɓoo ɗeɓgaan, ɓoo meeɗ tum ini faan ciŋ ɓoo na liiɓ ciŋ ɓoo waaɗ, te findi ɓoo nikohee, ɓoo sekɗohsee ayrukiŋ Kooh findi ɓinooɓi.

4 Waaye Kooh laayiɗ yirmoh, te waaɗi keeh-keehi a waaɗ ɓoo, tahiɗ po, 5 ali ɓoo nikee kaaniɗ sagu ɗal ci sah, a ambsohiɗ ɓoo na Kiristaani, a onnda ɓoo kipes ; inhaat ne a baahoh tah ɗu mucɗu. 6 Ŋ niki ɓoo nik ŋ Kiristaani Yeesu, a hultiɗiɗ ɓoo na Kiristaani, a ɓoofiɗta ɓoo na ɗe ŋ Eel ci. 7 Ineem na teeɓohe baahohiŋ ɗe laayohngaani ŋ jamanooci na haye, taamboh ŋ baahi a baah nga ɓoo ŋ ini Kiristaani Yeesu tum.

8 A baahoh tah ɗu mucɗu, taamboh ŋ kos. Ineem pulohɗi nga ɗu, wa onohiŋ Kooh ; 9 tumohaaɗ ci tahɗi, ne ali ɓo' yaksiɗkuu nga. 10 Laam ɓoo haɓɗuuɗ ciŋ Kooh, a feris ɓoo ŋ Kiristaani Yeesu, ne ɓoo tum in ci baahiɗ ci a kooɗkiɗ ɓoo po ƴutta, ne ɓoo pesoh ca.

11 Ɗu nikeeɗi Yawuut ngaŋ ñif. Ɓi na woye haf ɓa nguɗkiɗ ci te ɓa nguɗuk ŋ faan - e yaah ɓo' nguɗ ɓa - ɓa woyeeɗa ɗu nguɗkaaɗiici. Ŋ ineem, naandsukaat inii : 12 Ɗu raakeeɗi Kiristaani ŋ jamanoonaam, ɗu ɓaaheeɗi ŋ cuuɓiŋ Israayel na ambtiɗoh ciŋ Kooh na ɓa, na gapohi ca puloh. Ɗu nikee ŋ Adina, ɗu raakeeɗi yaakaar, ɗu raakeeɗi Kooh. 13 Waaye kotii, ŋ niki ɗu nik ŋ Kiristaani Yeesu, ɗu ɓi use, ɗu reɓiɗ, taamboh ŋ ñif miŋ ɗe.

14 Laam a Kiristaani ŋ haf ce jamiŋ ɓoo, a yi ambsoh Yawuut na nikaaɗi Yawuut, a tummba ɓa yino ; wa a eɗoh faaniŋ ɗe, a sannja ɗingi saɓsohee ɓa, maanaam sangtiɗoh. 15 A ɓarngiɗta nakoh ciŋ waasiŋMusaa na tumaah ciŋ wa, ne a tum Yawuut na nikaaɗi Yawuut yino, a feris ɓa ɓo' as ŋ niki ɓa nik nga ɗe ; a tufkiɗoh jam ɗaa. 16 Ini a waaɗee tum, weɗ ne kanak ci nik yino, a tummba po ɓa kerhiɗohha na Kooh, te taamboh ŋ kurwaani, a appa sangtiɗohi nikee ŋ harmban ɓa. 17 A hayya woye yegɗoh baahiɗ, jam wuu ɗu, ɗu ɓi use, na jam wuu ɓi reɓe[a]. 18 Taamboh nga ɗe, ɓoo miniɗ reɓ Baabi, ɓii na ɓum ngaŋ Fuuɗis yino, Fuuɗsi Hoolohngaani.

19 Ŋ ineem, ɗu nikisɗi hanhe wala ɓooɓi genohaah ; waaye ɗu gentoh ciŋ ɓo'-Kooh ci, ɗu ɓaah ŋ ɓi gen na Kooh kotii. 20 Ɗu taɓahu ŋ fondamaani, maanaam Apootar ci na woosuuɗ ci, te Kiristaani Yeesu ŋ haf ce nikka atoh fi amb taɓahi. 21 A yi amb taɓahi jen, po ɓak ci jen taɓahsee moɗoɗ, wa ɓaatee yak po wa nik kahan Kooh, hoolɗuuɗ taamboh ŋ Heɗi. 22 Ŋ niki ɗu nik nga ɗe, ɗu na name taɓahu ne ɗu hun na kosiɗ ci jen, ɗu nik genoha, wi Kooh genohan taamboh ŋ Fuuɗsi Hoolohngaani.

<- Ɓi Efes 1Ɓi Efes 3 ->