Fiisi Pool kaɓɗoh ɓi Kolos Rangsohaani Pool ɓaahee ŋ Israayel ci, ŋ cuuɓiŋ Benyaamin.[a] A nikee Farisen.[b] Ŋ finho Paantakot, wi Janguuni camb ɓaatuk, a ɓaahee ŋ ɓi tolfiɗee kosiɗ ci.[c] Waaye wa raakka mbeh, a cohha na Yeesu, a kossa[d] po a nikka Apootar sah. Teerndiŋ "Tum ciŋ Apootar ci" teeɓohiɗ pangkiŋ ɗe wi a nik Apootar ini kooɗoh ŋ saar 13. Pool moosɗi nikoh ŋ Kolos, e Epafras, a yi yegɗoh Yegɗohiŋ Muci ndaam.[e] Pool fiisiɗ ɓi Kolos kaɓɗohii sagu kosiŋ ɓa a kerah. Wa miniɗ nik ne Tisikos na Onesim, ɓi wik fiisi Pool kaɓɗoh wii,[f] ɓeɗ nam wik fiisi Pool kaɓɗoh Filemoon.[g] Nik ne wa ɗaa ɗah, a Epafras ŋ haf ce, a yi naandsuk Pool ini kaɗ ŋ kosiŋ ɓa, laam a nikee na ɗe ŋ kasoona.[h] Yakki Kiristaani yak, ŋ niki a nik yino na Kooh, weɗ ƴohiŋ teerndii. Fiisi Pool kaɓɗoh ɓi Kolos kaɗtiɗoh an : - Pool kañɗiɗ ɓi Kolos a kiimiɗta ɓa Kooh 1:1-11 - Ya ɓa a yi Kiristaani ? 1:12-23a - Pangkiŋ Pool wuu kosiɗ ci 1:23b–2:5 - Kipes ki Kiristaani onoh 2:6–3:4 - Findi ɓo' joy pesoh na Kiristaani 3:5–4:6 - Askohi 4:7-18
1Kañɗohi 1-2 Mi yii kañiɗ ɗu, ɗu ɓi ɓo'-Kooh ci nik ŋ Kolos te ɗu nikka ɓaah ciŋ ɓoo cariɗ oolku ŋ niki ɗu nik ŋ Kiristaani. Mi yi Pool, Apootariŋ Kiristaani Yeesu ŋ ini Kooh waaɗ, mi na Timoote yi ɓaah na ɓoo, ɓoo ɓii kañiɗ ɗu. Kooh Baabiŋ ɓoo baahohaat ɗu, a on ɗu jam ! Pool kiimɗiɗ ɓi Kolos Kooh 3 Ɓoo na gene corkiɗ Kooh, Baabiŋ Heɗ ɓoo Yeesu Kiristaa, ne ɓoo kiimɗeesa ɗu Kooh ɗah. 4 Ɓoo kerhiɗ kosi ɗu kos Kiristaani Yeesu na waaɗi ɗu waaɗ ɓo'-Kooh ci jen, 5 sagu oolki ɗu ooluk ne ɗu hey rahse ini Kooh ɗaakiɗ ɗu ŋ Eel ci. Oolkeem, ɗu raaka wi ɗu kerah woo kiŋ keeh ki, wi Yegɗohiŋ Muci. 6 Yegɗohiŋ Muceem reyiɗ nga ɗu, findi wa reyoh ŋ adinaani jen. Weɗi rim in baahiɗ, weɗi kaɗ fiki, wa nam nikoh ɗaa nga ɗu, wa camboh wa ɗu kerah te ɗu inahha keeh-keeh baahohi Kooh baahoh ɗu. 7 Jangɗoh ceem, ɗu rahsoh ca ŋ Epafras, nawleeso yi ŋ keeñkoh, yi nam nik ñaamiŋ Heɗi, findi ɓoo ; a na pangkiɗe Kiristaani wuu ɗu te a cariɗ oolku. 8 A yi woo ɓoo waaɗohi Fuuɗsi Hoolohngaani tum nga ɗu.9 Ineem weɗ tah, ina ɓoo kerhoh in ceem nga ɗu poyi, ɓoo gen ɗu kiimiɗ Kooh. Ɓoo na kiimee ɗe ne a on ɗu liiɓohaaɗ moɗiɗ keeh-keeh na inhisoh, taamboh ŋ Fuuɗsi Hoolohngaani, ne ɗu riif na inah ini a waaɗ. 10 Ŋ ineem ɗu hey mine pes pesi teeɓoh ne ɗu ɓaah ŋ Heɗi te ɗu neɓ ɗe ŋ in nu in. Ɗu tumee in baahiɗ nu nik te in ci ɗu tum rim in, te ɗu ɓaat inah Kooh. 11-12 Te Kooh hey ɗu ɓaate hatil ŋ in nu in taamboh ŋ hatiliŋ yaki a yak ne ɗu min muñ in ci jen wa hun na muñ seke.
Kuɓki, ñaamaariŋ Kooh yi minɗi hotu Corkiɗaat Kooh Baabi na sum, ŋ ini a on ɗu po ɗu minnda rahas ɓak ŋ ini a ɗaak ŋ siñaariŋ ɗe wuu ɓooɓiŋ ɗe. 13 A pulɗiɗ ɓoo ŋ hatiliŋ ñuusi, a ɓayya ɓoo ŋ Nguuriŋ Kuɓki a keeñkoh. 14 Kuɓkeem, a yi pulɗoh ɓoo ŋ baahaaɗi, a ɗaassa ɓoo bakaaɗ ciŋ ɓoo. 15 Kuɓkeem, a yi ñaamaariŋ Kooh yi minɗi hotu, a yi Saawi nik ŋ ɗafuk feruuɗi jen. 16 Laam in ci nik ŋ Eel ci na kehƴi jen, feruuɗ taamboh nga ɗe, ci min hotu, ci minɗi hotu, heɗ hatil ci raak nguur wala tiik, min-min wala kikilifa. Ca jen ca feruuɗ taamboh nga ɗe, te ca feru wuu ce. 17 A yi nik bala in nu in, te in ci jen ambsukohiɗ yino taamboh nga ɗe ; 18 A yi hafiŋ faani, maanaam Janguuni. A yi cambohaaniŋ wa te a yi koc hulit ŋ kaaniɗ ci ne, ŋ in ci jen a nik Yi ɗeɓ. 19 Laam Kooh waaɗa waaɗ, a gennda findi a hend jen, ŋ Kuɓkiŋ ɗe, 20 te, a taamboh nga ɗe, a kerhiɗohiɗta in ci jen na ɗe, in ci nik ngaŋ kehƴi na in ci nik ngaŋ Eel ci, te weɗ a tum wa a tumee jam taamboh ŋ ñif mi a aam ŋ kurwaaniŋ ɗe. 21 Ini kaɗ nga ɗu, ɗu nikee hanhe, ɗu raakeeɗi ɓak ŋ Kooh, ɗu nikee sangiɗ ciŋ ɗe ŋ liiɓohaaɗ ciŋ ɗu na tumohaaɗ ciŋ ɗu baahaaɗiici, 22 waaye ɗiski wa nik, a kerhiɗohɗiɗ ɗu na haf ce taamboh ŋ kakaan kiŋ Kuɓkiŋ ɗe, yi kaan ŋ faaniŋ ɗe, ne ɗu tufuk ŋ fikiice hooliɗ, raakaaɗi sikka, raakaaɗi woyɗaah. 23 Waaye ɗu joyiɗ ris ndengiɗ ŋ kosi ɗu kos te ɗu faɗuu ali in wa usiɗ ɗu ŋ oolki ɗu raak ŋ in ci na haye sagu Yegɗohiŋ Muci ɗu kerah. Yegɗoheem, feruuɗ ci ŋ ooɓ eel ci jen woyuuɗa. Pangkiŋ Pool wuu kosiɗ ci Yegɗohiŋ Muceem, weɗ mi na pangkiɗe, mi yi Pool. 24 Te ɗiski wa nik, ŋ sumiɗ ŋ miskiɗ ciŋ ngo wuu ɗu. Mi yii teyɗuk tolfiɗu wuu ɗu, findi Kiristaani hee wa tumohe ne a nikeen ndii, a yi ŋ haf ce ɗah. Kon mi yii tolfiɗu wuu faaniŋ ɗe, wi Janguuni. 25 Mi na pangkiɗe Janguuni, weɗ pangki Kooh dengkoh ho wuu ɗu, ne ŋ yegɗoh woo kiŋ ɗe ŋ findi wa hend jen, 26 Woo keem wa ɗasɗohsee ɗasɗohu ŋ jamanooci na gomal ci coot jen, waaye wa teeɓohuuɗ kotii ŋ ɓooɓiŋ ɗe. 27 Kooh waaɗee ɓoo inhiɗ yaki ini ɗasɗuuɗeem yak na raak-raaki nik nga wuu ɓi nikɗi Yawuut. Ini ɗasɗuuɗeem weɗ ne : Kiristaani yii nga ɗu, ɗu oolkiɗ yaki in ci na haye yak !28 A yi ɓoo na yegɗohe, ɓoo ñaahee ɓo' nu nik te ɓoo jangɗee ɓo' nu nik na liiɓohaaɗ moɗiɗ nu ɓoo raak ɗah, ne ɓoo min ɓay ɓo' nu nik ŋ fiki Kooh a nik ɓo' mitiɗ ŋ Kiristaani. 29 Ineem weɗ tah ho pangkee panguk miskiɗ, ŋ hiñohohee hatiliŋ Kiristaani, wi na pangke nga so.
Ɓi Kolos 2 ->
9 Ineem weɗ tah, ina ɓoo kerhoh in ceem nga ɗu poyi, ɓoo gen ɗu kiimiɗ Kooh. Ɓoo na kiimee ɗe ne a on ɗu liiɓohaaɗ moɗiɗ keeh-keeh na inhisoh, taamboh ŋ Fuuɗsi Hoolohngaani, ne ɗu riif na inah ini a waaɗ. 10 Ŋ ineem ɗu hey mine pes pesi teeɓoh ne ɗu ɓaah ŋ Heɗi te ɗu neɓ ɗe ŋ in nu in. Ɗu tumee in baahiɗ nu nik te in ci ɗu tum rim in, te ɗu ɓaat inah Kooh. 11-12 Te Kooh hey ɗu ɓaate hatil ŋ in nu in taamboh ŋ hatiliŋ yaki a yak ne ɗu min muñ in ci jen wa hun na muñ seke.
28 A yi ɓoo na yegɗohe, ɓoo ñaahee ɓo' nu nik te ɓoo jangɗee ɓo' nu nik na liiɓohaaɗ moɗiɗ nu ɓoo raak ɗah, ne ɓoo min ɓay ɓo' nu nik ŋ fiki Kooh a nik ɓo' mitiɗ ŋ Kiristaani. 29 Ineem weɗ tah ho pangkee panguk miskiɗ, ŋ hiñohohee hatiliŋ Kiristaani, wi na pangke nga so.
Ɓi Kolos 2 ->