1 Waaye wa raakeen ƴaar teeku Anañaas na ɓitiice Safiira. Raakka yohni ɓa toon. 2 Ƴaara ɗaakka ɓak ŋ kopora, ɓitiice nammba hun na ɗe ŋ ineem, ini tas ŋ kopora a ɓayyaa, a deggaa ŋ yaah ciŋ Apootar ci.

3 Piyeer woosa ɗe ne : « Anañaas, wa ye tah fu faɗta Seytaani a riiffa keeñiŋ ɗa ? Po fu leyee Fuuɗsi Hoolohngaani ŋ ɗasɗi fu ɗasiɗ ɓak ngaŋ kopori fu toonoh yohon fu. 4 Wi fu toonohɗaa, wa nikee wuu fu haa e ? Fu mineena sang toon, wala wi fu toona, kopori nikee wuu fu, fu mineen tum ini neɓ ɗa naa. Fu liiɓoh tum in mand an na ŋ keeñiŋ ɗa ? Fu lee ɓo' haa, fu lee Kooh ! »

5 Wa Anañaas kerah woo ceem, a keennda, a kaannda. Ɓooɓa kerhee naandsukiŋ wa jen neƴƴohha keeh-keeh. 6 Komaakca fiir ca hayya, ɓa muurra fiɗaafa, ɓa ɓayyaa ne ɓa uumb ɗe.

7 Wa degga ini ree wahtu kaahay ɓitiice aassa ; a inheeɗi ini raak. 8 Piyeer meekissa ɗe ne : « Woyaa so, ɗu toonoh kehƴi candoomii e ? » A loffa ne : « Ee, ɓoo toonoha ineem. » 9 Piyeer woosa ɗe ne : « Ɗu min kerhiɗoh na ne ɗu markisuk Fuuɗsiŋ Heɗ ɓoo ? Kot ci fu kerah ŋ yahndeeri, e ɓooɓi puloh uumba ƴaar fu ; ɓa hey ɗa name ɓay. »

10 Ŋ saasi saasi, a keennda ŋ kot ciŋ Piyeer, a kaannda. Komaakca fiir ca aassa, ɓa hotta ne a kaaniɗ, ɓa ɓayya ɗe, ɓa uummba ɗe ŋ sero ƴaar ce. 11 Ɓi Janguuna jen na ɓooɓa kerah ina raak jen neƴƴohha keeh-keeh.

12 Kooh taambohha ŋ Apootar ci, a tumeeɗa in feyohiɗ na keemaan laayiɗ, ɓooɓa jen hoteeɗa nga. Kosiɗ ca jen ŋ findi ɓa hend, ɓa meeɗ meeɗ coh ŋ bayaalaŋ Kahan Kooh, ŋ Perngaŋ-Suleymaan. 13 Ali ɓo' wiiriis kaañeeɗi kaɗ nga ɓa, waaye ɓooɓa jen woyee in baahiɗ nga ɓa. 14 Ɓooɓa kosee Heɗi uupeeɗa nga uup laay ƴaar na ɓitiɓ, ɓa ɓaatuusa ŋ mboolndaŋ kosiɗ ca.

15 E keemaan ceem tah kosaayiɗ ca sah pulɗasseeɗa ŋ kahan ca, ɓa degseeɗa ŋ mbeeddaaca, ngaŋ fiƴaang wala ŋ basang ne Piyeer taamb ɗah, findi wa min mand ɗah, raak ɓi saangniŋ ɗe laalan. 16 Ɓo' laayiɗ nameeɗa puloh kur ca wilee Yerusalem, ɓa ɓayeeɗa kosaayiɗ ca na ɓooɓa jiini ambe, ɓa jen ɓa wirɗasseeɗa.

17 Ŋ ineem, seeƴkiɗoha yakka[a] na ɓooɓa nikee na ɗe jen, ɓeɗ ɓa Sadusen ca, ɓa siissa Apootar ca, ɓa tufukka ŋ kot tum in ; 18 ɓa ammba Apootar ci ɓa taƴca ɓa ŋ kasoona. 19 Waaye ŋ weka, malaaka Heɗ ɓoo rangissa buntaacaŋ wa, a puliɗta ɓa, a woosa ɓa ne : 20 « Kaɗaat Kahan Kooh, ɗu woo ɓooɓa woo ciŋ kipes ki asi wii. » 21 Apootar ci kerhiɗta ɗe, na ɓaaɓa teel ɓa kaɗta Kahan Kooh ɓa jangɗoheeɗa.

Seeƴkiɗoha yakka raakka coh na ɓooɓa na hune na ɗe, ɓa ɓeeɗukka saangnaŋ yakak caŋ Israayel jen, ɓa woossa ɓi ɓo' ne ɓa kaɗ ɓaya Apootar ca ŋ kasoona. 22 Dag ca kaɗta kasoona waaye ɓa raakɗi ɓa nga. Ɓa dokukka, ɓa woosa ina ɓa ɓayoh nga an : 23 « Ɓoo raak kasoona ranguuɗ ndengiɗ te niiɗoh ca nikee nga ŋ fiki yahndeera, waaye wi ɓoo rangis, ɓoo hotɗi ali ɓo' nga ɓa ŋ ɗooƴa. »

24 Wa kilifaanaŋ dag ca niiɗee Kahan Kooh kerah woo keem, a yi na kilifaacaŋ seeƴkiɗoh ca, ɓa feyuusa, ɓa liiɓeeɗa ini rahas Apootar ci na findi wa mirndohan. 25 Ŋ ineem ƴaar hayya woosa ɓa ne : « Ƴaaɓi ɗu taƴee ŋ kasoona, ɓa ɗaa ŋ Kahan Kooh na jangɗe ɓooɓa. » 26 Weɗ kilifaanaŋ dag ca hunoh na ɓi dag, ɓa kaɗta, ɓa ɓayya ɓa ɓay moɗoɗ, ɓa kaañeeɗi ɓa tum in, sagu neƴƴoh ne mboolnda tap ɓa atoh.

27 Wa ɓa ɓay ɓa, ɓa tufkiɗta ɓa ŋ fiki saangnaŋ yakak ca, seeƴkiɗoha yakka woosa ɓa ne : 28 « Ɓoo sangoheeɗi ɗu keeh-keeh ne kinaat jangɗohis ŋ tiikiŋ ƴaareem e ? Weɗɗi, ɗu riifɗiɗ Yerusalem jen na jangɗohiŋ ɗu, ɓaatta nga, ɗu waaɗ ɓoo raan kakaan kiŋ ƴaareem ! »

29 Piyeer na Apootar ci ɓinooɓi loffa ne : « Kerhiɗ Kooh weɗ ngisoh kerhiɗ ɓooɓi. 30 Koohiŋ caac ciŋ ɓoo hultiɗiɗ Yeesu yi ɗu ap ŋ daaƴi ɗu daaƴ ɗe ŋ kurwaa. 31 Kooh meeɓiɗ ɗe, po ŋ ñaahmiŋ ɗe, a tummba ɗe adgohoh na Mucɗoh ne a on Israayel ci ɓa ɓoƴsoh pesohaaɗ, ɓa ɗaasu bakaaɗ ciŋ ɓa. 32 Ɓoo nak, ɓoo seede ngaŋ in ceem, ɓoo na Fuuɗsi Hoolohngaani Kooh eɗ ɓi kerhiɗ ɗe. »

33 Woo ceem ayrukiɗta ɓooɓaŋ saangna po ɓa heeɗa pooke, ɓa waaɗta ap Apootar ci. 34 Waaye Farisen nikeen ngaŋ saangnaŋ yakak ca, a teeku Gamaliyel, a nikee jangɗohoh ŋ waasiŋMusaa, ɓooɓa jen eɗeen ɗe cir. A kurukka, a nakohha ne Apootar ci pulɗu ƴissuut.

35 Ƴutta a woosa ɓooɓa ne : « Ɓaah ci, ɗu ɓi Israayel ci, wortukaat ini ɗu na hee tume ƴaaɓii. 36 Maañaaɗi ƴaar teeku Tedaas hayiɗ, a tummba haf ce ɓo' yakak, ɓooɓi ñaakɗee ɗe nikee ŋ ɓak teemet-nikiis (400). Waaye wi a apu, ɓi ñaakɗee ɗe jen pasarkohha, ɓo' kerhisɗi ɓa. 37 Wa a coot, Yudaa yi genee Galile nammba hay, wa nikee ŋ jamanoona ɓooɓiŋ kur ki kindse. A nammba nook ɓo' laayiɗ, ɓa ñaakiɗta ɗe. Wi a kaan, ɓooɓi ñaakɗee ɗe jen pasarkohha.

38 Ɗiski wa nik, ñam na woyee ɗu ne : Kinaat rahsoh tus na ƴaaɓii, faɗaat ɓa ɓa coot. Nik ne ini tah ɓa kuruk na ini ɓa na tume puloh ŋ ɓo' ɗah, wa hey yahrukohe. 39 Waaye nik ne wa puloh ŋ Kooh ɗah, ɗu minanɗaa yahroh. Wa miniɗ ɗu ɓek sah, hiñoh na Kooh. Wortukaat ineem ! »

Atte'oh ca jen hunnda na ɗe. 40 Ɓa ɓeeɗukka Apootar ci, ɓa laɓɗukka ɓa. Ɓa woosa ɓa ne ɓa kinaat woyis ŋ tiikiŋ Yeesu ; ƴutta ɓa faɗta ɓa ne ɓa coot.

41 Apootar ci pulohha saangna, ɓa nikka sumoh na sumoh, ŋ ini Kooh attee ɓa ne ɓa yeyyoo'iɗ ƴissuutɗu sagu tiikiŋ Yeesu. 42 Kooh-nu-wiis, ɓa meeɗta kaɗ Kahan Kooh na kahan ca cinooca, ɓa taalndiɗta, ɓa jangɗoheeɗa, ɓa woyeeɗa Yegɗohiŋ Muci, ŋ ini kaɗ ŋ Yeesu, Mucɗohi Gapohse.

<- Tum ciŋ Apootar ci 4Tum ciŋ Apootar ci 6 ->