1 Wa raakka mbeh, Piyeer na Saaŋ kaɗta kiima Kooh ŋ Kahan Kooh. Wa nikee jamanooniŋ kiimi na tumse ŋ ɓak noh soos. 2 Waam raak ɓooɓa ɓayeeɗa ƴaar lafñiɗ nga, a rimuk rimuk na lafñiŋ ɗe. Mbeh nu nik, a na ɓayse ɓayu, a degu ŋ sero buntaana na woyse "Buntaani-Moɗohngaani" ne a min yalwaan ŋ ɓooɓi na aase ŋ Kahan Kooh.

3 Wi a hot Piyeer na Saaŋ heeɗa aase, a meekissa ɓa yalwaan. 4 Piyeer na Saaŋ jen iiƴeeɗa ɗe, Piyeer woosa ɗe ne : « Marka ɓoo ! » 5 A markeeɗa ɓa baahiɗ, a ammba ne a hey rahse in nga ɓa. 6 Piyeer woosa ɗe ne : « Ŋ raakɗi urus ŋ raakɗi haalis, waaye ini ŋ raak, ŋ hey ɗa wa one : Ŋ tiikiŋ Yeesu Kiristaa yiŋ Nasareet, kurka fu tiind ! » 7 A ammba ɗe ŋ yaah-ñaahum, a kurkiɗta ɗe, ŋ ɗiska ɗiska kot ciŋ ɗe nikka ndengiɗ tir.

8 A kurukka japit, a tufukka, a tiindeeɗa. A hunnda na ɓa, a aassa Kahan Kooh, a tiindeeɗa, a gongtiɗkeeɗa, a yakɗeeɗa Kooh. 9 Ɓooɓa jen hotta ɗe tiindeeɗa, a gidmeeɗa Kooh. 10 Ɓa inhissa ɗe ne a yi meeɗ ɓoof, a yalwaanee ŋ buntaana na woyse "moɗohngaani" ŋ Kahan Kooh, weɗ ɓa jaahɗoh, ɓa feyuusa ŋ ini raak.

11 Ƴaara lafñee nikka ŋoɗiɗ ŋ Piyeer na Saaŋ, ɓooɓa jen feyuusa, ɓa faɗsukka ɗiska ɓi Piyeer nikee ŋ ɗiska na woyse Perngaŋ-Suleymaan ngaŋ Kahan Kooh. 12 Wa Piyeer hot ineem, a woosa mboolnda ne : « Israayel ci, wa ye tah ɗu feyuusa ŋ inii, wa ye tah ɗu markee ɓoo ? Ɗu liiɓ ne wa hatiliŋ ɓoo, wala nupi ɓoo nup Kooh tah ƴaarii wir po a tiinde e ?

13 Koohiŋ Ibrahiima na Isaahha na Yaŋhooɓa, Koohiŋ caac ciŋ ɓoo, teeɓohiɗ yaki surgaaniŋ ɗe Yeesu yak. Te e ɗu eɗoh ɗe, ɗu taasukka ɗe ŋ fiki Pilaat yi tufkee ŋ kot faɗis ɗe. 14 Ɗu taaskiɗ Yi hool wuu Kooh te a yurahha, ɗu kiimmba Pilaat ne, ɗu faɗsiɗu apoh ɓo'.[a] 15 Ɗu apɗukiɗ Heɗ kipes ki, waaye Kooh hultiɗiɗ ɗe. Ɓoo nak, ɓoo miniɗ seede ineem.

16 Kosi ɓoo kos Yeesu, weɗ tah woo ki ɓoo woo ŋ tiikiŋ ɗe onnda ƴaari ɗu na hote yii te ɗu inahha ɗe, hatil po a minnda tufuk ndengiɗ. E tiikiŋ Yeesu, na kosi puloh nga ɗe, on ƴaari wir jameet findi ɗu hotoha an.

17 Ɗiski wa nik ndii ɓaah ciŋ ngo, ŋ inhiɗ ne ɗu tum Yeesu ineem ŋ inhaaɗi, ɗu na kilifaaciŋ ɗu. 18 Waaye Kooh raakiɗta ineem ne ini a woyee maañiɗ taamboh ŋ woo ciŋ woosuuɗ ci jen raak, ne Mucɗohi a gapohee joyiɗ raak miskiɗ.

19 Mbaa ɓoƴsohaat pesohaaɗ, ɗu wiiruk ŋ Kooh ne a moos bakaaɗ ciŋ ɗu. 20 Ŋ ineem, Heɗ ɓoo hey ɗu one ɓi jamano iɗsiɗkoha, a woosoh ɗu Mucɗohi a tanɗee ɗu maañiɗ, Yeesu. 21 Waaye ɗiski wa nik, Eel ci joyiɗ daliɗ Yeesu po jamanooni in ci jen doknohsan as, findi Kooh woyoha maañiɗ taamboh ŋ woo ciŋ woosuuɗ ciŋ ɗe hooliɗ ci.

22 Laam Musaa woyeen ne : “ Heɗi, Koohiŋ ɗu, hey ɗu woosohe Woosuuɗ findiiso, a pulohan cuuɓiŋ ɗu, sikɗukaat in ci a woyan ɗu jen. 23 Te ɓo' nu sikɗukɗi Woosuuɗeem ɗah, a hey pulɗasse ŋ cuuɓiŋ Kooh, a apu.[b] ” 24 Woosuuɗ ci woo jen, ina amboh ŋ Samuwel[c] po ɓi taamb nga ɗe, findi ɓa hend jen, namiɗ yegɗoh mbeh ci ɓoo na pese cii.

25 E ɗu lam woosuuɗ ceem, ambtiɗohi Kooh tufkiɗee na caac ciŋ ɗu, wa wuu ɗu wi a woyee Ibrahiima ne : “ Ŋ hey barke'ɗe cuuɓ ciŋ kehƴi jen taamboh ŋ ɓi na hee rimkohe nga ɗa. ” 26 Kooh koc woos surgaaniŋ ɗe nga ɗu, a woosiɗ ɗe ne a barke'iɗ ɗu, a tum po yaa nu nga ɗu ɗah eɗ finho tumohaaɗ ciŋ ɗe moɗaaɗiici. »

<- Tum ciŋ Apootar ci 2Tum ciŋ Apootar ci 4 ->