1 Ŋ Janguunaŋ Añcos, wa raakeen ɓi woosuuɗ na ɓi jangɗohoh. Ɓa nikee Barnabaas na Simeyong yi na ɓeeɗkohse Suusus, Lusiyus yi genee Sireen, Manahen yi koɗu yino na Herod goornoori, na Sool. 2 Wa raakka mbeh, ɓa ñaamkeeɗa Heɗi, ɓa oreeɗa, Fuuɗsi Hoolohngaani woosa ɓa ne : « Ɗiski wa nik, faɗɗaat to Barnabaas na Sool wuu pangki tah ho ɓeeɗuk ɓa. »

3 Ŋ ineem, wa ɓa ƴut or na kiim Kooh, ɓa degga ɓa yaah ciŋ ɓa, ɓa faɗta ɓa, ɓa cootta.

4 Wa Fuuɗsi Hoolohngaani woos Barnabaas na Sool, ɓa kaɗta kur kaŋ Selesi, ɓa aassa bato ndaam ne ɓa kaɗ Siipar, kur ŋ ɗooƴ cookmi. 5 Wa ɓa ree Salamin, ɓa yegɗoheeɗa woo kiŋ Kooh ngaŋ sinaagog caŋ Yawuut ca. Saaŋ Maarko hunee na ɓa ne a ɓaatɗoh ɓa. 6 Ɓa huussa Siipar jen, ɓa kaɗta po Pafos. Ŋ ndaam, ɓa cohha na luhusoh teeku Bar-Yeesu, a nikee Yawuut, a tumee haf ce woosuuɗ te a nikɗaa. 7 A ɓaahee ŋ ɓooɓa wilee goornoora na woyse Seersiyus Polus. Goornooreem nikee ɓo' ñaañiɗ, a nakohha ɓeeɗkiɗu Barnabaas na Sool, raak ɗe waaɗee kerah woo kiŋ Kooh.

8 Waaye luhusohi, yi nam teeku Elimaas (wa tokis ineem ŋ gerek) hiñoheeɗa ɓa, a jeemeeɗa hondoh goornoora kos. 9 Ŋ ineem, Sool yi na name woyu Pool, riiffa na Fuuɗsi Hoolohngaani, a marakka ɗe ŋ ɗooƴ has in maañiɗ, 10 a woosa ne : « Leyohi yakki, fu riif na liiɓohaaɗ moɗaaɗi, fu kuɓu Seytaani rek, fu sangiɗiŋ in nu baah ɗah ! Fu heyɗi faɗe nduuɗ waasiŋ Heɗ ɓoo yurhiɗi e ? 11 Weɗɗi, yaahiŋ Heɗi deggiɗ ɗa, fu hey fuule, fu hotissanɗi nohi ɓi neeh. »

Ŋ ɗiska ɗiska has ciŋ Elimaas ñuussa, a nikka ŋ ñuus tuɗ, a saaɓɗeeɗa ne a waak ɓoyi nookan ɗe. 12 Wa goornoora hot ina raak, a kossa ; ini a jangɗassee ŋ Heɗi aaseen ɗe lool.

13 Ŋ ineem Pool na huntoh caŋ ɗe aassa bato, ɓa pulohha Pafos, ɓa kaɗta Perge ŋ kur kaŋ Pamfili. Saaŋ Maarko faɗta ɓa ndaam, a dokukka Yerusalem. 14 Waaye ɓeɗ, ɓa kurkohha Perge, ɓa taalndiɗta po ɓa reesa Añcos-Pisidi. Ŋ mbehi na iɗsiɗkohse, ɓa aassa ŋ sinaagoga, ɓa ɓooffa. 15 Wa jangaŋ teerndiŋ waasiŋMusaa na woo ciŋ woosuuɗ ci ƴut, kilifaacaŋ sinaagoga nakohha ɓa woyɗu ne : « Ɓaah ci, ɗu raak ini ɗu woyan ɓooɓi ne ɗu ñaah ɓa ɗah, ɗu miniɗ woo. »

16 Wa ɓa woyu ineem, Pool kurukka, a raɗissa yaah a woosa ne : « Ɗu, Israayel ci na ɗu ɓi nup Kooh, sikɗukaat to ! 17 Koohiŋ cuuɓiŋ ɓoo Israayel taniɗ caac ciŋ ɓoo. A ɓaatta cuuɓi wa ɓa genohaah ŋ Misra. Ƴutta, na hatiliŋ yaahiŋ ɗe, a puliɗta ɓa nga.[a]

18 Wa ɓa nik ŋ kehƴa hulanga, a muñɗeeɗa ɓa ini ree kiis ndaŋkiyaah-nikiis (40).[b] 19 Ƴutta, a ɗummba cuuɓ yasna-kanak ŋ Kanaan, a eɗta cuuɓiŋ ɗe kur keem ne ɓa kooɗa.[c] 20 In ceem jen, a tumiɗ ca ŋ ɗooƴ kiis teemet-nikiis na kiis ndaŋkiyaah-yatuus (450). Ƴutta a eɗeeɗa caac ciŋ ɓoo ɓi kilifa[d] po wi woosuuɗi Samuwel[e] hay.

21 Ŋ jamanoonaŋ Samuwel, ɓa waaɗta waakɗu buur. Kooh eɗta ɓa Sawul kuɓkiŋ Kis yi ɓaah ŋ cuuɓiŋ Benyaamin.[f] A nikka buur kiis ndaŋkiyaah-nikiis (40). 22 Kooh ruhsiɗta ɗe, a eɗta ɓa Dawuuda findi buur. Kooh seede'iɗta ɗe inii : “ Ŋ hotiɗ ŋ Dawuuda kuɓkiŋ Yesay, ƴaari neɓ po ŋ keeñ, yi tuman ini ŋ waaɗ jen.[g] ”

23 Ŋ ineem, Kooh ɓayiɗta Israayel ci Mucɗoh ngaŋ ɓi rimkoh ŋ Dawuuda findi a gapohee wa,[h] te Mucɗoheem, e Yeesu. 24 Bala Yeesu hayan ɗah, Yahya woyeen na Israayel ci jen, a ɓeeɗukka ɓa ne ɓa ɓoƴsoh pesohaaɗ, te ɓa ɓoktu.[i]

25 Wi pangkiŋ Yahya na hee reehe, a meeɗ woo ne : “ Ɗu liiɓ ne ñam ɓa ? Ñam yi ɗu na seke haa ; waaye ɓoyeem, a yi hay ŋ finhooso te ŋ yeyyooɗi sah toksiɗ ɗe ñafaɗ ciŋ ɗe.[j] ”

26 Ɓaah ciŋ ngo, ɗu ɓi rimkoh ŋ Ibrahiima, na ɗu ɓi nup Kooh te ɗu nikka na ɓoo ndii, Kooh woosoh ɓoo woo kiŋ muci. 27 Ɓi Yerusalem na kilifaacaŋ ɓa, inheeɗi ya ɓa a yi nikee Yeesu, ɓa nameeɗi inah ini woo ciŋ woosuuɗ ci tokis, woo ci meeɗ jangu ŋ mbehi na iɗsiɗkohse nu ree. Te kat, ɓa tumeen po ini woosuuɗ ceem woyee raakka, wa ɓa na atte'ee Yeesu ne a apu. 28 Ɓa hoteeɗi ini joy ɗe tah atte'u kaan, waaye ɓa woosa Pilaat ne a apaat ɗe. 29 Wi ɓa mitiɗ in ci Fiis ci woyee nga ɗe jen, ɓa kooɗohha ɗe ŋ kurwaana, ɓa ɗaakka ɗe ŋ ruy-ruy.

30 Waaye Kooh hultiɗta ɗe. 31 Ngaŋ ɓi neeh laayiɗ, a teeɓkeeɗa ɓi ɓo', ɓa hoteeɗa ɗe jahran. Ɓooɓeem nikee ɓooɓa pulohee na ɗe Galile, kaɗta Yerusalem, te ɓooɓeem nikka ɓooɓi na seede'ee ɗe woti-woti ŋ fiki cuuɓi.

32 Te ɓoo hayiɗ ne ɓoo woo ɗu Yegɗohiŋ Muci : Ini Kooh gapee caac caŋ ɓoo, 33 a mitɗiɗ ineem wuu ɓoo ɓi set ciŋ ɓa, ŋ hultiɗi a hultiɗ Yeesu, findi wa fiisohu ŋ saari kanakɗoh ŋ Sabuur. Wa woo ne :

44 Wa mbeha na iɗsiɗkohse dokkis, ɓo' min woo ne kur ka jen ɓeɗ coh ne ɓa sikɗuk woo kiŋ Heɗ ɓoo. 45 Wa Yawuut ca hot mboolnda, ɓa siiseeɗa Pool na Barnabaas, ɓa taaseeɗa Pool, ɓa ɓaseeɗa ɗe. 46 Ŋ ndeem Pool na Barnabaas neƴƴohɗi nga, woosa ɓa ne : « E ɗu joy koc yegɗu woo kiŋ Kooh, waaye ŋ gantuki ɗu gantuka, ɗu atte haf ɗu ne ɗu yeyyooɗi raak kipes ki reehanɗi. Kon ɓoo ɓii yurah ŋ cuuɓ ci cinooci. 47 Laam weɗ ini Heɗi nak ɓoo, wi a woo ne : “ Ŋ tufkiɗiɗ ɗa ne fu nik siñaariŋ cuuɓ ci, fu ɓay muci po ɗisik nu ɗisik ŋ Adina.[o] ” »

48 Wa ɓooɓa nikɗi Yawuut kerah woo ceem, ɓa summba keeh-keeh, ɓa laasukka woo kiŋ Heɗi te ɓooɓa Kooh kooɗee ne ɓa rahas kipes ki reehanɗi jen kossa. 49 Woo kiŋ Heɗ ɓoo pasarkohha ŋ kur ca nikee ndaam jen. 50 Waaye Yawuut ca hiirra yakak caŋ kur-taaha, na ɓi ɓitiɓ ; yakak ceem na ɓitiɓ ceem tolfiɗeeɗa Pool na Barnabaas po ɓa puliɗta ɓa ŋ kur caam jen. Ɓitiɓ ceem meeɗ meeɗ ñaamuk Kooh, ɓa nikee ɓitiɓ raakiɗ tiik.

51 Ŋ ineem Pool na Barnabaas farsiɗta ɓa merhey miŋ kot ciŋ ɓa ndeem, kaɗta Ikoñum. 52 Waaye ini kaɗ ŋ taalubeeca, ɓa summba keeh-keeh, ɓa riiffa na Fuuɗsi Hoolohngaani.

<- Tum ciŋ Apootar ci 12Tum ciŋ Apootar ci 14 ->