1 Ŋ ineem, Apootar ci na ɓaah ciŋ ɓoo kosiɗ ci nikee ŋ Yudee kerahha ne ɓi nikɗi Yawuut namiɗ teyɗuk woo kiŋ Kooh. 2 Wa Piyeer dokuk Yerusalem, Yawuut ca kosiɗ ca ngaseeɗa ɗe 3 an : « Wa ye tah fu aassa kahan nguɗkaaɗiici po fu ñameeɗa na ɓa ? » 4 Ŋ ineem Piyeer naandsukka ɓa ina raak jen, ambohhaa ŋ cambohaana kaɗeeɗa po ŋ reehɗohaana.

A woo ɓa ne : 5 « Ŋ nikee ŋ kur-taahaŋ Yope, ŋ kiimeeɗa Kooh nga. In hayɗohha so haa heeƴ : Ŋ hotta inaa haa piis yakak ambuuɗ ŋ koñ ciŋ wa nikiis ci. Wa ruhsoheeɗa Eel ci po wa reesa ŋ serooso. 6 Ŋ marakka baahiɗ ŋ ɗooƴi, ŋ hotta ɗoopaat ci na kot ci nikiis ci ŋ kehƴi na ci ŋ nduufi na faskoh ci na pundoh ci ŋ ɗafki.

7 Ŋ kerahha hooso woyiɗ to ne : “ Kurka Piyeer, apa fu ñam ! ” 8 Waaye ŋ loffa ne : “ Muk Heɗi, ŋ moosɗi ñamoh in araamiɗ wala in hoolaaɗi'iɗ. ” 9 Hoosoori puloh Eel ci kanakɗukissa woo an : “ Ini Kooh hooliɗ, fu, kinaa araamiɗ ! ” 10 Ɗaa, hoosoora woyeeɗa, ŋ lofeeɗa po wa nikka waas kaahay, ƴutta ina jen dokukka ŋ Eel ca.

11 Jaarra ɓo' kaahay reyeeɗa kahna ɓoo dalohe. Ɓa pulohee Seesare nikka haa ne ɓa woossee nga so. 12 Fuuɗsi Hoolohngaani woosa so ne ŋ hunaat na ɓa te ŋ kanaat liiɓsiɗoh nga. Ɓaah ciŋ ɓoo kosiɗ ci yasna-yinooci ɗu na hote ɓii, ɓennda so Seesare, ɓoo aassa kahan Koorney. 13 A woosa ɓoo ne, a hot malaaka tufkiɗ ŋ ɗooƴ kahan ce woosa ɗe inii : “ Woosa ɓo' Yope, a ɓeeɗkiɗ ɗa Simong yi na woyse Piyeer. 14 A hey ɗa woye woo ci mucɗan ɗa, fu na ɓi kahan fu jen. ”

15 Wi ŋ camb woo, Fuuɗsi Hoolohngaani ruhussa nga ɓa findi a ruhsohee nga ɓoo ŋ cambohaana. 16 Ŋ jaarra naandsuk woo kiŋ Heɗi wii : “ Yahya ɓoktohee na masuɓ waaye ɗu, ɗu ɓoktohsan Fuuɗsi Hoolohngaani. ” 17 Ini Kooh on ɓoo wi ɓoo kos Yeesu Kiristaa, Kooh oniɗ ɓa wa ɗah, a mi ɓa po ŋ nookohee na Kooh ? »

18 Wa ɓa kerah woo keem, ɓa raakisɗi woyaah, ɓa yakɗeeɗa Kooh an : « Wa keeh kat ne Kooh namiɗ on ɓi nikɗi Yawuut ne ɓa ɓoƴsoh kipes, ɓa raak kipes ki keeh-keehi. »

19 Ŋ finho kakaan kaŋ Ecen, kosiɗ ci cammba torhiɗu po ɓa pasarkohha ŋ Feniis na Siipar na Añcos. Ɓa topee na yegɗohiŋ woo kiŋ Kooh ŋ Yawuut ci dong.

20 Moona raakeen nga ɓa ɓi ɓo' Siipar na Sireen, ɓeem kaɗta Añcos nameeɗa woo ɓi nikɗi Yawuut Yegɗohiŋ Muci kaɗ ŋ Yeesu Heɗi. 21 Hatiliŋ Heɗi hunnda na ɓa, po ɓo' laayiɗ kossa, ɓoƴsohha pesohaaɗ, ɓa hayya ŋ Heɗi.

22 Ɓi Janguuniŋ Yerusalem kerahha ineem, ɓa woossa Barnabaas Añcos. 23 Wa a ree, a hotta findi Kooh baahohoh kosiɗ ca, a neɓuusa nga, a ñaahha ɓa jen ne ɓa risaat ndengɗuk keeh-keeh ŋ ñaakɗi ɓa na ñaakɗe Heɗi. 24 Barnabaas nikee ɓo' baahiɗ, riifiɗ na Fuuɗsi Hoolohngaani na kos. Ŋ ineem mboolo keeh-keeh lannga na Heɗi.

25 Ƴutta Barnabaas kaɗta waaka Sool ŋ Tarsa. 26 Wa a hot ɗe, a ɓayya ɗe Añcos. Ɓa tummba kiis mulnguus na ɓi Janguuna, ɓa jangiɗta mboolo keeh-keeh nga. Ŋ ndaam, ngaŋ Añcos, weɗ taalubeeci camboh ɓeeɗku "Kerceen".

27 Ŋ mbeh ceem, raakka woosuuɗ ci puloh Yerusalem, hayya Añcos. 28 Yino nga ɓa teeku Agabus, Fuuɗsi Hoolohngaani inhiɗta ɗe ne aɗ miskiɗ hey raake ŋ kehƴi jen, a kurukka, a woosaa. Wa raakangannga ŋ jamanoona Kolod nikohee buura yakkaŋ Rom. 29 Wa taalubeeca keraha, ɓa kerhiɗohha ne yaa nu nga ɗah, eɗoh ini a min eɗoh ne ca woosohu ɓaatɗohoha ɓaah caŋ ɓa kosiɗ ca nik ŋ Yudee. 30 Ɓa tummba ineem, ɓa degga onoh ca ŋ yaah Barnabaas na Sool, ɓeem kommba ca adgohoh caŋ Janguunaŋ Yudee.

<- Tum ciŋ Apootar ci 10Tum ciŋ Apootar ci 12 ->