Fiisi Pool kanakɗoh kaɓɗoh Timoote Rangsohaani Pool ɓaahee ŋ Israayel ci, ŋ cuuɓiŋ Benyaamin.[a] A nikee Farisen.[b] Ŋ finho Paantakot, wi Janguuni camb ɓaatuk, a ɓaahee ŋ ɓi tolfiɗee kosiɗ ci.[c] Waaye wa raakka mbeh, a cohha na Yeesu, a kossa[d] po a nikka Apootar sah. Teerndiŋ "Tum ciŋ Apootar ci" teeɓohiɗ pangkiŋ ɗe wi a nik Apootar ini kooɗoh ŋ saar 13. Wa miniɗ nik ne Pool hotiɗ Timoote ŋ ɗooƴ ɓaaɓaŋ ɗe yakka koc, wa a nik ŋ Listar na Derbe[e]. Tiikiŋ Timoote koc woyu ŋ ɗooƴ ɓaaɓaŋ Pool yakka kanakɗoh.[f] Weem raak ɗe kosiɗ te a nikee ndaam. Ini kooɗoh ndeem, Timoote ɓaahee ŋ ɓi hunee na Pool. Timoote meeɗeen ɓaaɓ in laayiɗ findi wi a wikee fiis ci Pool kaɓɗohee wala cum ɗah a nikiɗ Pool ŋ ɗisik.[g] Pool seede'iɗ Timoote seede moɗiɗ ŋ fiisi a kaɓɗoh ɓi Filippi.[h] Marka tiikiŋ Timoote ŋ Limiŋ tiik ci. "Fiisi Pool koc kaɓɗoh Timoote" wa fiisu ŋ finho "Tum ciŋ Apootar ci", mbaa raakiɗ in laayiɗ ci ɓo' inahɗi nga, waaye ɓoo inhiɗ ne wa raak Pool nikisɗi ŋ kaso te Timoote nikee ŋ Efes.[i] Wi Pool na fiise "Fiisi a kanakɗoh kaɓɗoh Timoote" wii, wa tel ɗe doknissuuɗ ŋ kasoonaŋ Rom, raak wa wooriɗ ne a hey atte'se ne a apu.[j] Ŋ kaɓɗohi a fiis Timoote wii, a ñaahiɗ ɗe ŋ in laayiɗ te a teeɓpa ɗe in ci a joy wortuk, a woosa ɗe ne a hayaat gaaw ne a hot ɗe bala a kaanan ɗah. Fiisi Pool kanakɗoh kaɓɗoh Timoote kaɗtiɗoh an : - Pool kañɗiɗ Timoote, te a corkiɗta Kooh ŋ ini kaɗ nga ɗe 1:1-5 - Pool ɓaatiɗ Timoote fit 1:6-18 - Pool ñaahiɗ Timoote ne a taambiɗ Kiristaani2:1-14 - Pool ñaahiɗ Timoote ne a tum panguk baahiɗ 2:15-26 - Findi ɓooɓi mandan ŋ jamanooci mirndohan 3:1-9 - Pool ñaahiɗ Timoote ne a taamb ŋ kot ciŋ ɗe 3:10-17 - Pool ñaahiɗ Timoote ne a taalndiɗ a yegɗohee Yegɗohiŋ Muci. 4:1-8 - Nakoh ci mirndoh na Askohi 4:9-22
1Kañɗohi 1-2 Mi yii kañiɗ ɗa, Timoote, mi yi Pool, ApootariŋKiristaani Yeesu. Ŋ tumuuɗ Apootar ŋ waaɗ-waaɗiŋ Kooh ne ŋ yegɗoh gapohiŋ kipes ki nik ŋ Kiristaani Yeesu. Mi yii fiis kaytii ne ŋ woo na ɗa Timoote, kuɓkiŋ ngo ŋ keeñkoh. Kooh yi Baabi baahohaat ɗa, a yirmaat ɗa, a on ɗa jam ; Kiristaani Yeesu Heɗ ɓoo baahohaat ɗa, a yirmaat ɗa, a on ɗa jam. Pool corkiɗiɗ Kooh sagu Timoote 3 Kooh, yi mi na ñaamke na hel daliɗ findi ɓooɓi rim mbo na caacuuciŋ ngo, mi na genee ɗe corkiɗ nga ɗa ; ŋ ɓekee tiikiŋ ɗa ŋ kiim ciŋ ngo wek na noh. 4 Mi yii naandsuk muhun caŋ ɗa, ŋ mariɗ ɗa hot lool, ne ŋ riif na sum. 5 Mi yii naandsuk kosi keeh-keehi nik nga ɗa. Koseem kockoh ŋ caac fu ɓitiɓ Loyiis na yaay ɗu Onis, te wa wooriɗ to ne weɗi nammba nik nga ɗa. Pool ñaahiɗ Timoote 6 Ineem weɗ tah mi yii naandis ɗa ne fu humbis ini Kooh tum nga ɗa findi jaal yongkaah, ini fu rahas wa ŋ deg ɗa yaah ciŋ ngo. 7 Kooh eɗɗi ɓoo fuuɗsi tuman ɓoo neek, waaye a eɗ ɓoo Fuuɗsi riifɗan ɓoo na hatil na waaɗoh na amb haf ɓoo. 8 Kon nak kina supuk seede ŋ ini kaɗ ŋ Heɗ ɓoo, te kinaa so supuk mi yi ambu saguuce. Waaye, ngaŋ hatiliŋ Kooh, ɓaaha na so miskiɗi sagu Yegɗohiŋ Muci.9 Wa cariɗa keeh-keeh, laam Kooh mucɗiɗ ɓoo te a ɓeeɗkiɗ ɓoo ne ɓoo nik ɓo' hooliɗ wuu ce. A tumɗi ineem sagu in ci ɓoo tum, waaye a tuma ŋ ini neɓ ɗe ne a baahoh ɓoo ; a baahohiɗ ɓoo ŋ niki ɓoo nik ŋ Kiristaani Yeesu, bala Adina nikan. 10 Baahoheem hotkiɗ kotii, wi Kiristaani Yeesu, Mucɗohi hay. A yi fol hatiliŋ kakaan, a taamboh ŋ Yegɗohiŋ Muci a eɗ ɓoo, a teeɓohha kipes ki kakaan miniɗɗi in.
11 Ne ŋ teeɓoh muceem, weɗ tah po Kooh tummba so yegɗohoh na Apootar na jangɗohoh. 12 Ineem weɗ tah po ŋ raakee miskiɗ woti. Waaye ŋ supukɗi nga, laam ŋ inhiɗ Yi ŋ kos te wa wooriɗ to ne a raakiɗ hatili a niiɗohan ini a dengkoh ho po ŋ mbehaŋ atteena. 13 Marka ŋ woo ci keeh ci fu kerhoh nga so. Fu tiindɗoh ca kosi na waaɗohiŋ ɓi nik ŋ Kiristaani Yeesu. 14 Taambkoha in ci baahiɗ ci Kooh dengkoh ɗa, taamboh ŋ Fuuɗsi Hoolohngaani nik nga ɓoo.
15 Fu inhiɗ ne ɓiŋ kur caŋ Asi jen faɗiɗ to, te Fijel na Hermojen ɓaah ŋ ɓooɓeem. 16 Onesifoor nak, Heɗi yirmaat ɓi kahan ce, a meeɗ to meeɗ ɓaatɗoh, te a supkeeɗi ceen ciŋ ngo. 17 Waaye kay, wa a ree Rom rek, a waakeeɗa so ɗisik nu ɗisik po a hotta so. 18 A miskaat Heɗi ŋ mbehaŋ atteena ! A fu uup inah pangki a panguk ŋ Efes jen.
2 Timoote 2 ->
9 Wa cariɗa keeh-keeh, laam Kooh mucɗiɗ ɓoo te a ɓeeɗkiɗ ɓoo ne ɓoo nik ɓo' hooliɗ wuu ce. A tumɗi ineem sagu in ci ɓoo tum, waaye a tuma ŋ ini neɓ ɗe ne a baahoh ɓoo ; a baahohiɗ ɓoo ŋ niki ɓoo nik ŋ Kiristaani Yeesu, bala Adina nikan. 10 Baahoheem hotkiɗ kotii, wi Kiristaani Yeesu, Mucɗohi hay. A yi fol hatiliŋ kakaan, a taamboh ŋ Yegɗohiŋ Muci a eɗ ɓoo, a teeɓohha kipes ki kakaan miniɗɗi in.
11 Ne ŋ teeɓoh muceem, weɗ tah po Kooh tummba so yegɗohoh na Apootar na jangɗohoh. 12 Ineem weɗ tah po ŋ raakee miskiɗ woti. Waaye ŋ supukɗi nga, laam ŋ inhiɗ Yi ŋ kos te wa wooriɗ to ne a raakiɗ hatili a niiɗohan ini a dengkoh ho po ŋ mbehaŋ atteena. 13 Marka ŋ woo ci keeh ci fu kerhoh nga so. Fu tiindɗoh ca kosi na waaɗohiŋ ɓi nik ŋ Kiristaani Yeesu. 14 Taambkoha in ci baahiɗ ci Kooh dengkoh ɗa, taamboh ŋ Fuuɗsi Hoolohngaani nik nga ɓoo.
15 Fu inhiɗ ne ɓiŋ kur caŋ Asi jen faɗiɗ to, te Fijel na Hermojen ɓaah ŋ ɓooɓeem. 16 Onesifoor nak, Heɗi yirmaat ɓi kahan ce, a meeɗ to meeɗ ɓaatɗoh, te a supkeeɗi ceen ciŋ ngo. 17 Waaye kay, wa a ree Rom rek, a waakeeɗa so ɗisik nu ɗisik po a hotta so. 18 A miskaat Heɗi ŋ mbehaŋ atteena ! A fu uup inah pangki a panguk ŋ Efes jen.
2 Timoote 2 ->