Fiisi Pool kanakɗoh kaɓɗoh ɓi Tessalonik
Rangsohaani
Pool ɓaahee ŋ Israayel ci, ŋ cuuɓiŋ Benyaamin.[a] A nikee Farisen.[b] Ŋ finho Paantakot, wi Janguuni camb ɓaatuk, a ɓaahee ŋ ɓi tolfiɗee kosiɗ ci.[c] Waaye wa raakka mbeh, a cohha na Yeesu, a kossa[d] po a nikka Apootar sah. Teerndiŋ "Tum ciŋ Apootar ci" teeɓohiɗ pangkiŋ ɗe wi a nik Apootar ini kooɗoh ŋ saar 13.
Kaɗaŋ Pool koc ŋ kur kaŋ Tessalonik,[e] wa nikee ŋ ɗooƴ ɓaaɓaŋ ɗe yakka kanakɗoh.[f] A yegɗohha Yegɗohiŋ Muci nga, te wa raakka ɓi kos, waaye a arra aañu ne a pul kur ka. Wa jaahiɗta ɗe lool, findi ɓooɓa han kos na hee moocohe. Weɗ tah, wa a nik ŋ Ateen,[g] a woossa Timoote ne a kaɗ marka findi ɓa nikoh.[h] Ƴutta, a yi Pool, a taalndiɗta Korenta. Timoote hunnda na Silweng a kaɗta marka ɓi Tessalonik, te a wiirukka na yegɗoh neɓiɗ.[i] Ɓa raakka Pool ŋ Korenta.[j] Weɗ Pool fiisoh ɓi Tessalonik kaɓɗohiŋ ɗe koc.
Wa mand haa ne Timoote dokkiɗ Tessalonik na fiisi Pool koc kaɓɗoh, a nikka nga ƴissuut. Ƴutta a pulohha Tessalonik a wiirukka na yegɗoh neɓiɗ. Pool sumissa ŋ kosaŋ ɓi Tessalonik[k] waaye a hotta ne wa baahiɗ ne a ñiiniɗ ɓi in.[l] Teemb ndeem, a fiissa ɓa kaɓɗohi kanakɗoh wii.
Fiisi Pool kanakɗoh kaɓɗoh ɓi Tessalonik kaɗtiɗoh an :
- Pool kañɗiɗ ɓi Tessalonik te a corkiɗiɗ Kooh nga ɓa 1:1-12
- Ñiinɗiŋ in ci kaɗ ngaŋ hayisiŋ Yeesu na hultiŋ kosiɗ ci kaan 2:1-12
- Ndeng ngaŋ kosi 2:13-17
- Pool nakiɗ ɓi Tessalonik kiimɗu Kooh 3:1-5
- Njirñiŋ panguk 3:6-15
- Askohi 3:16-17

Kañɗohi

1 Mi yii kañiɗ ɗu, ɗu ɓi Janguuniŋ Tessalonik. Mi, Pool, na Silweng na Timoote, ɓoo ɓii kañiɗ ɗu, ɗu ɓi nik ŋ Kooh Baabiŋ ɓoo, ɗu nikka ŋ Yeesu Kiristaa Heɗi. 2 Kooh Baabi na Yeesu Kiristaa Heɗi baahohaat ɗu, on ɗu jam.

Pool corkiɗiɗ ɓi Tessalonik

3 Ɓaah ci, ɓoo joyiɗ gen corkiɗee Kooh ŋ ini kaɗ nga ɗu, te wa waas ne ɓoo tuma. Kosiŋ ɗu wii ɓaatuk keeh-keeh, te ɗu jen, yaa nu nga ɗah, waaɗi a waaɗ morom ce na uupe uup ɓaatuk. 4 Ineem weɗ tah ɓoo na woye ɓi Janguuciŋ Kooh ne ɓoo neɓuuɗ nga ɗu, sagu muñi ɗu na muñe na kosi ɗu raak ŋ ɗooƴ tolfiɗ ci na miskiɗ ciŋ ɗu jen.

5 Miskiɗ ceem na teeɓohe ne findi Kooh na atte'ohe, wa ɗaa ; ca na onee ɗu ne ɗu yeyyoo Nguuriŋ ɗe, Nguuri tah ɗu muñee miskiɗ. 6 Wa in yurhiɗ ŋ has ciŋ ɗe ne a deg miskiɗ ɓi na degee ɗu miskiɗ, 7 te a iɗsiɗ ɗu, na ɓoo jen, ŋ miskiɗ ceem.

Ineem raakan ŋ mbehi Yeesu Heɗi teeɓohkan, a pulohan Eel ci, a hun na malaakaaciŋ ɗe, ca raakiɗ hatil keeh-keeh. 8 A hey haye ŋ ɗooƴ jaal yongkaah, a mbugal ɓi inahɗi Kooh te ɓa sannga taambiɗ Yegɗohiŋ Muci kaɗ ŋ Heɗ ɓoo Yeesu. 9 Mbugaliŋ ɓa nikan ne ɓa ɗumbu po faw, ɓa us Heɗi na yaki hatiliŋ ɗe yak. 10 A hey haye ŋ mbeheem ne hooliɗ ciŋ ɗe yakiɗ ɗe, te ɓi kos ɗe jen hey feyse ŋ yaki a yak. Te ɗu, ɗu hey ɓaahe nga, laam ɗu kosiɗ ini ɓoo seede ŋ fikiiɗu.

11 Ineem weɗ tah ɓoo na genee ɗu kiimiɗ Koohiŋ ɓoo, ne a on ɗu ɗu yeyyoo ɓeeɗki a ɓeeɗuk ɗu. Te na hatiliŋ ɗe, a on ɗu, ɗu mitiɗ in baahiɗ nu ɗu waaɗ tum ɗah, ɗu mitiɗ pangki ɗu na tume sagu kosi ɗu kos. 12 Ŋ ineem, ɗu hey teeɓohe findi tiikiŋ Heɗ ɓoo Yeesu yakoh, a nam ɗu yakiɗ ŋ niki ɗu nik nga ɗe ; wa nik baahohiŋ Yeesu Kiristaa, yi Koohiŋ ɓoo na Heɗ ɓoo[m].

2 Tessalonik 2 ->