2 Korenta 9

Ŋ ini kaɗ ŋ nangɗohiŋ onohi

1 Ini kaɗ ŋ ɓaatɗohi na nangɗohse wuu kosiɗ ci, wa etohɗi ŋ fiisissee ne ŋ woo ɗu in nga. 2 Ŋ inhiɗ ne ɗu waaɗiɗ ɓa ɓaatɗoh lool, ŋ ndamkohiɗ ɗu ŋ fiki ɓi Maseduwaan, ŋ woo ɓa ne ɗu ɓi Akaay, ɗu ƴutiɗ ne ɗu eɗoh ɓaatɗoh yukma poyi. Te sawriŋ ɗu weem, yuniɗ ɓi laayiɗ. 3 Waaye ŋ woosiɗ ɓi Tit ne ndamkohi ŋ ndamkoh ɗu weem nikuu ŋ ɓarngi, te ɗu tum po wa nik findi ŋ woyoha.

4 Wa miniɗ nik ne raakiɗ ɓi Maseduwaan ɓi ɓendan ndo. Ɓoo sang ne ɓa raakuu ɗu ƴutiɗ ne ɗu eɗoh, mbaa oolki ŋ ooluk ɗu hey nike kaci nga ɓoo, ŋ woyisɗi ɗa ɗu. 5 Weɗ tah, ŋ hotta ne wa cariɗ ne ŋ tuuƴ ɓi Tit, ɓa adug ko, ɓa taambkoh ɓaatɗohi ɗu gapohee eɗoh. Ŋ ineem, wa hey ƴute bala ŋ hayan ɗah, wa nik ini ɗu onoh na keeñ soosiɗ.

6 Inhaat ne : Ɓoyi na soke ƴissuut, na nguɗe ƴissuut te yi na soke laayiɗ, na nguɗe laayiɗ. 7 Kon yaa nu nga eɗohaat ini a kooɗkee eɗoh ŋ keeñiŋ ɗe, inwaaso ambuu ɗe nga, keeñiŋ ɗe soos nga ; Kooh waaɗ ɓoyi na eɗohe te a sum nga. 8 Te Kooh miniɗ ɗu on in baahiɗ nu nik, ɗu genan raak in nu ɗu etoh ɗah, ɗu raak po ca gaacaac, ɗu min tum in baahiɗ nu nik. 9 Findi Fiis ci woyoha an :

« A na payse ñakiɗ ci laayiɗ,

baah kiŋ ɗe gen gen. » [a]

10 Kooh yi na eɗe sokohi tisoh, na kañam pesoha, a hey ɗu name eɗ tisoh, a ɓaata po baah kiŋ ɗu raak rim laayiɗ. 11 Ŋ ineem, ɗu hey nike heɗ raak-raak ŋ in ci jen, ɗu min onoh keeh-keeh, ɓo' laayiɗ corkiɗ Kooh ŋ in ci ɗu eɗan ɓoo ne ɓoo eɗ ɓa ca. 12 Laam eɗohiŋ ɓaatɗohii, wa topɗi rek ŋ ɓaatɗoh kosiɗ ci ŋ etoh ciŋ ɓa, waaye wa hey tahe po corkiɗi Kooh corkiɗassan uup nga laay.

13 Ini ɗu tuman weem, wa hey teeɓohe findi ɗu tokɗukoh, te ɓo' laayiɗ hey yakɗe Kooh ŋ teyɗuki ɗu teyɗuk taambiɗ Yegɗohiŋ Muci kaɗ ŋ Kiristaani. Ɓa hey ɗe name yakiɗ ŋ ini ɗu paysoh raak-raakiŋ ɗu na keeñ soosiɗ na ɓa na ɓooɓi jen. 14 Ɓa hey ɗu kiimɗe Kooh, sagu waaɗi ɓa waaɗ ɗu laam ɓa hotiɗ baahohi yakki Kooh baahoh ɗu keeh-keeh.

15 Kooh corkiɗaah ŋ onohiŋ ɗe raakɗi hend !

<- 2 Korenta 8 2 Korenta 10 ->