1 Ɓoo inhiɗ ne ɗiip ci ɓoo genoh ŋ kehƴi cii, maanaam faan ciŋ ɓoo ndii, kaɗ po ca yahuk ɗah, ɓoo raakiɗ taɓah ŋ Eel ci, maanaam faan as. E Kooh haɓiɗ ca, ca genohaaci genan gen, ci yaah ɓo' haɓiɗɗi. 2 Ɓoo ɓii iineeɗa ŋ ɗiip ci, ɓoo waaɗta lool degsoh ɓekkaah ciŋ ɓoo as ci, maanaam taɓah ciŋ ɓoo puloh ŋ Eel ci. 3 Ee, wa wooriɗ to ne ɓoo hey ca ɓekɗasse, ɓoo telsanɗi raakaaɗi faan. 4 Ee, jamanooni ɓoo nik ŋ ɗiip cii jen iinee sagu ɓituk, nikɗi haa ne ɓoo waaɗ woluk faan ciŋ ɓoo, waaye ɓoo waaɗ degsohɗu na faan as ne kipes ki keeh-keehi on do'ɗok wi kaanan. 5 Ineem, weɗ ini Kooh ŋ haf ce kooɗkiɗ ɓoo. A yi eɗ ɓoo Fuuɗsi Hoolohngaani, ineem nikka firnde ne in ci a gap ɓoo jen, ɓoo hey ca rahse.

6 Kon ɓoo gen kaañiɗ. Waaye ɓoo inhiɗ ne feeh ɓoo ɓii gennda ŋ faan cii ɗah, ɓoo genan usiɗ Heɗi. 7 Laam ɓoo na kaɗohe kos waaye ini ɓoo na hote haa. 8 Mbaa ɗah, ɓoo kaañiɗ, te ini ngisohiɗ ɓoo weɗ ne ɓoo faɗ faan cii, ɓoo haad ŋ Heɗi.

9 Ineem weɗ tah ɓoo ndengɗukee ne a neɓu nga ɓoo ŋ ɗisik nu ɓoo nik ɗah, ali ɓoo ris ŋ faan cii wala ɓoo faɗ ca, haad nga ɗe sah. 10 Laam ɓoo jen joyiɗ tufuk ŋ fiki Kiristaani ne a attee ɓoo, yaa nu nga wirndu in ci a tumee na faaniŋ ɗe, baahiɗ na baahaaɗi jen.

11 Inhi ɓoo inah ini nik ŋ nup Heɗi, tahiɗ po ɓoo na waaɗe teeɓ ɓooɓi po ɓa inah keeh ki ; Kooh inhiɗ ɓoo baahiɗ, te ŋ namiɗ liiɓ ne ŋ ɗooƴ keeñ ciŋ ɗu, ɗu namiɗ ɓoo inah. 12 Ɓoo hayɗi ne ɓoo na woyee ɗu ne e ɓoo min pangki ; ɓoo na onee ɗu, ɗu min ndamkoh ɓoo. Ŋ ineem ɗu hey mine lof ɓi na ndamkohe ini na hotse te ɓa na ndamkoheeɗi ini nik ŋ ɗooƴ keeñ. 13 Ɓoo ambu naandiɗ ɗah, wa wuu Kooh ; ɓoo ambu ñaañiɗ ɗah, wa wuu ɗu.

14 Waaɗi Kiristaani waaɗ ɓoo, ɓoo minɗi ɓoof naa, ɓoo hotiɗ ne : Ɓo' yino kaan wuu ɓooɓi jen ɗah, kon ɓooɓi jen kaaniɗ ; 15 te a kaan wuu ɓooɓi jen, ne pesoh ci pesissuu wuu haf ɓa, waaye wuu Yi kaan, hulitta wuu ɓa. 16 Weɗ tah ɗiski wa nik, ɓoo markohisɗi ali ɓo' findi ɓooɓi na markohe ; ali nik ne sah wotɓa ɓoo markohee Kiristaani findi ɓooɓi markohee ɗe, woti ɓoo markohisɗi ɗe ɗaa.

17 Ɓo' nikka ŋ Kiristaani ɗah, a na nike feruuɗ as. In ca maañiɗ ca cootiɗ, in ci jen as kotii. 18 Te ineem jen puloh ŋ Kooh, yi taamboh ŋ Kiristaani, kerhiɗohiɗta ɓoo na haf ce, te a eɗta ɓoo pangki ne ɓoo teeɓee ɓooɓi findi ɓa kerhiɗohan na ɗe. 19 Weɗ ne Kooh nikee ŋ Kiristaani kerhiɗohɗeeɗa ɓi Adina na haf ce, te a marakɗi ɗal ciŋ ɓooɓi. A eɗ ɓoo woo kiŋ kerhiɗohi ne ɓoo yegɗoha.

20 Ɓoo nikiɗ Kiristaani ; wa mand haa a Kooh na ñaahee ɗu taamboh nga ɓoo : Ɓoo kiim ɗu wa kiim ŋ tiikiŋ Kiristaani : Teyɗukaat kerhiɗohɗu na Kooh ! 21 Yi moosɗi bakaaɗoh, deguuɗ bakaaɗiŋ ɓoo. Ineem raakiɗ ne, ŋ niki ɓoo nik nga ɗe, ɓoo onu kiyurah ŋ fiki Kooh.

<- 2 Korenta 42 Korenta 6 ->