1 Ɗu mineen ndo muñiɗ ƴissuut ŋ woo ɗu woo naandoha ɗah ! Waaye ɗu ɓii muñiɗ to sah ! 2 Ŋ waaɗ ɗu waaɗ po maa fiire'ee ɗu fiire miskiɗ, fiireeni puloh ŋ Kooh. Ŋ teyɗukiɗ ɗu ƴaar yino kut, yi nguɗ cakiim nga ɗu ; te ŋ waaɗiɗ ɗu ɗe eɗ, a yi Kiristaani, findi cafaƴ inhaaɗi ƴaar yi hool fec na wikohse. 3 Waaye, findi iiña ñaañohohee Aawa ŋ tumohaaɗ caŋ ɗe,[a] ŋ neƴƴohiɗ ne liiɓ ciŋ ɗu nduuɗu po ɗu faɗɗukohu ambi ɗu amb ndengiɗ ŋ Kiristaani te wa hunnda na hool.

4 Ɓo' hay nga ɗu, teeɓee ɗu Yeesu, teeɓ ɗalohiɗ na findi ɓoo woyoh ɗu ɗah, ɗu hey ɗe teyɗuke. Wala ɓo' hay, gap ɗu fuuɗis wiiriis ɗalohiɗ na Fuuɗsi Hoolohngaani ɗu rahas, wala a yegɗohee yegɗoh wiiriis ɗalohiɗ na Yegɗohiŋ Muci ɗu teyɗuk ɗah, ɗu hey teyɗuke ɓoyeem baahiɗ. 5 Ŋ ambiɗ ne apootar ciŋ ɗu yakak ci ɗu na woye ɓeem, ɓa uupiɗɗi so ali in. 6 Ali nik ne ŋ minɗi woo, ŋ nikɗi inhaaɗi in ciŋ Kooh ; te ɓoo teeɓohiɗa hooliɗ ŋ in ci jen.

7 Ŋ ruhsiɗ ruhsiɗ haf fo, ŋ meeɓpa ɗu, ŋ wirndiɗukɗi ɗu wi ŋ woyee ɗu Yegɗohiŋ Muci, wi puloh ŋ Kooh. Ini ŋ tum weem bakaaɗ e ? 8 Ŋ ɓay kopor ŋ ɓi Jangu wiiriis, ɓi teyɗuk ko ɓaatɗoh, ne ŋ panguk wuu ɗu. 9 Te wi ŋ nik ŋ ɗiskiŋ ɗu, ŋ ñakka in ɗah, mi na hayeeɗi ŋ ali ɓo' ŋ yaaɓɗee ɗe. Wa kaɗohee ɗaa po findi ɓaah ciŋ ɓoo pulohee Maseduwaan hayoh, ɓeɗ eɗ to ini ŋ etohe. Ŋ moosɗi yaaɓɗoh ali ɓo' nga ɗu, te wa moosanɗi nik. 10 Findi wa wooroh ne keeh ki puloh ŋ Kiristaani weɗi nga so, wa wooroh ɗaa ne ali ɓo' ŋ kur ciŋ Akaay minɗi so hondoh ndamuk ŋ ineem ! 11 Wa ye tah ŋ woosa ineem ? Ŋ waaɗɗi ɗu waaɗɗi e ? Kooh inhiɗ ne ŋ waaɗiɗ ɗu ! 12 Findi mi na tumohe, ŋ faɗanɗaa, laam raakiɗ ɓi na waake naafkoha, waaye ŋ onanɗi ɓa wa, po ɓa kee hendtiɗkoha na ɓoo ŋ yaksiɗki ɓa na yaksiɗke.

13 Ɓooɓeem, ɓa apootar leyoh, ɓa pangkoh ci na ñaañohohe, ɓa na kulɓa'kohe ne ɓa apootar ciŋ Kiristaani. 14 Wa nikɗi in feyohiɗ. Seytaani sah na kulɓa'kohe kulɓa'koh malaaka leer. 15 Kon wa feyohɗi ne pangkoh ciŋ ɗe namee kulɓa'koh pangkoh yurhiɗ. Waaye ŋ reehɗohaaniŋ ɓa, ɓa hey wirndasse baahaaɗiikiŋ panguk ciŋ ɓa jen.

16 Ŋ woyisa, ali ɓo' kinaat to amboh findi naandiɗ - wala teyɗukaat naandohaaciŋ ngo, po ŋ nam min tipuk ƴissuut ! 17 Ini mi na hee woye wii, ŋ wooɗi wa findi Heɗi na woyohe, wa ɓaah ŋ naandohaaciŋ ngo, wa tipuk rek. 18 Laam raakiɗ laayiɗ ɓi na tipke ŋ in ciŋ Adina, mi na hee name tipuk findiiɓa. 19 Ɗu ɓi ñaañiɗ ci, ŋ hotiɗ ne ɗu teyɗukiɗ te ɗu neɓuuɗ ŋ ɓooɓi naandiɗ ci ! 20 Ɗu teyɗukiɗ ne ɓa ñaamɗukohee ɗu, ɓa ɓayee in ciŋ ɗu jen, ɓa njirñiɗkohee ɗu, ɓa yaksiɗkee ŋ ɗafuk ɗu, ɓa tipee ɗu paɗ ! 21 A', mi deey, ŋ meeɗɗi tumoh ɗaa. Ŋ supkiɗa woo, waaye wa keeh ne ɓoo tasiɗ kaañ.

Moona in nu ɓo' kaañ ɗah, ŋ kaañiɗa - ee, mi na woye naandohaaciŋ ngo nak ! 22 Ɓa na woye ne ɓa Heber e ? Ŋ nam nik Heber. Ɓa ɓaah ŋ Israayel e ? Ŋ nam ɓaah ŋ Israayel. Ɓa set ciŋ Ibrahiima e ? Ŋ nam nik setiŋ ɗe. 23 Ɓa pangkoh ciŋ Kiristaani e ? - Faɗa ŋ woo naandoha - ñam uup ɓa wa nik. Nik panguk miskiɗ ɗah, ñam uupiɗ ɓa nga ; nik taƴ ŋ kaso ɗah, ñam uupiɗ ɓa nga ; nik laɓu ɗah, e laɓ ci ŋ laɓu uup laay fuuf ! Waas laayiɗ, ŋ hotee ŋ kakaan ki an.

24 Ini ree waas yatuus, Yawuut ci laɓiɗ to leraw ciŋ ɓa ndaŋkiyaah-kaahay na yasna-nikiis (39)[b] ciŋ ɓa, 25 ɓi Rom laɓiɗ to na ndooɗ ciŋ ɓa waas kaahay, ŋ moosiɗ tapsohu atoh ne ŋ apu, waas kaahay bato diigiɗ na so ŋ cookmi, ŋ tumiɗ noh yino na wek yino ŋ ɗooƴ masmiŋ cookmi. 26 Ŋ ɓaaɓ ciŋ ngo laayiɗ ci, ŋ cohiɗ na in wooraaɗi laayiɗ : nupɗiŋ kal ci, na nguɗndukohoh ci, cum ɗah ɓaah ciŋ ngo Yawuut ci waaɗ to tum miskiɗ, wala ɓi nikɗi Yawuut sah, cum ɗah ŋ coh na in wooraaɗi ŋ kur ci, na nduufi, na cookmi, cum ɗah sah e ɓi na woye ne ɓa ɓaah na ɗa kos na ɓekee ɗa wa. 27 Cum ɗah ŋ pangkee ɗiska panguk uup miskoh ; ŋ raak neeh laayiɗ neehaaɗi, cum ɗah ŋ aɗuk, cum ɗah ŋ sifaɗuk, waas laayiɗ ŋ raak mbeh mulnguus ñamaaɗi ; soosi hee so ape, cum ɗah ŋ ñak ɓekkaah.

28 Laayiɗ tasiɗ, waaye ca tahɗi so woo, ɗal wi na range hafiŋ ngo Kooh-nu-wiis, liiɓsiɗohi ŋ ini kaɗ ŋ Janguuci jen ! 29 Ŋ hotta ɓoyi ndengɗi ŋ kosiŋ ɗe ɗah, wa goyiɗ to. Ɓo' bakaaɗɗukoh morom ce ɗah, wa aay yo keeñ ! 30 Nik ne ŋ joy joy tipuk ɗah, ŋ tipkohan raakaaɗiikiŋ ngo hatil. 31 Kooh, yi nik Koohiŋ Yeesu Kiristaa Heɗi, a nammba nik Baabiŋ ɗe te a ƴeekaah po faw, a inhiɗ ne ŋ leyɗi. 32 Wa ŋ nik ŋ Damas, goornoora nikiɗee buur Aretaas nga nakoheen niiɗu buntaacaŋ miira wil kur-taaha jen ne a amb mbo, 33 waaye ŋ ɓeku ŋ pañe, ŋ taambɗuusa ŋ palaŋteeraŋ miira, ŋ yooruusa huntiɗkohiɗ naa, ŋ fussa ɗe.

<- 2 Korenta 102 Korenta 12 ->