1 Woo kii woo wooriɗ : Ɓo' nu na waaɗe nik yi adgohan ɓi Janguuni ɗah, a na waaɗe panguk moɗiɗ. 2 Tahha po ɓoyi adgohan ɓooɓi, a joyɗi raak woyɗaah moɗaaɗi ; a joy top ŋ ɓitiice, a min amb haf ce, a hendɗoh pesohaaɗiŋ ɗe, a nawu. A dalɗee ɓi na haye kahan ce moɗoɗ, a min jangɗoh. 3 A joyɗi nik laaroh, wala ɓo' waaɗiɗ hiñoh, waaye a joy nik ɓo' soosiɗ, waaɗiɗ jam ; a waaɗuu kopor lool.

4 A raak taambkoh moɗoɗ ŋ ɓi kahan ce, kuɓuuciŋ ɗe kerhiɗ ɗe, ɓa eɗ ɗe cir mitiɗ. 5 Laam ɓoyi minɗi taambkoh kahan ce moɗoɗ, minohan taambkoh Janguuniŋ Kooh na ?

6 A joyɗi nik ɓoyi na hane kos. Mbaa yaksiɗuk miniɗ ɗe amb te Kooh hey ɗe atte'e findi a atte'ohee Seytaani. 7 Te a joyiɗ nam raak seede moɗiɗ ŋ fiki ɓooɓi kosɗi ne ɓa raakuu woyɗaah ɗe, a keenuu ŋ kafind ciŋ Seytaani.

8 Ɓooɓi naman kooɗu ne ɓa taambkohee in ciŋ Janguuni, ɓa nikan ɓo' eɗuuɗ cir, ɓo'-keeh, ɓa joyɗi nik ɓo' yahkiɗ ŋ sangara te ɓa joyɗi waak kopor ŋ ini lahɗi waas. 9 Ɓa joyiɗ amb keeh ki teeɓohu ŋ waasi ɓoo kos. Ɓa amba na hel daliɗ. 10 Ɓa joy joy markisku paaɗ po ɓa raakɗi woyɗaah moɗaaɗi ɗah, ɓa han camb pangkeem.

11 Ɓitiɓ ciŋ ɓa[a] namiɗ joy eɗu cir, ɓa nikuu ɗooɓoh ɓo', ɓa min amb haf ɓa, ɓa car oolku ŋ in nu nik. 12 Ɓi kooɗu ne ɓa taambkohee in ciŋ Janguuni, yaa nu nga ɓa joy top ŋ ɓitiice, a raak taambkoh baahiɗ ŋ komaakciŋ ɗe na ɓi kahan ce.

13 Laam ɓi pangkan pangkeem baahiɗ, ɓa hey yakɗasse, te ɓa heyɗi neƴƴohe woo ɓooɓi ini kaɗ ŋ kosi ɓa kos Kiristaani Yeesu.

14 Ŋ liiɓiɗ ne ŋ hey ɗa hee marke ndii na maañaaɗi waaye ŋ fiisiɗ inii 15 ne hayiŋ ngo yiih ɗah, fu inah findi ɓi kahan Kooh joy pesoh, ɓi Janguuniŋ Koohi na pese. Janguuneem, wa kumbini na inhiɗohe keeh ki, wa fondamaani amb keeh ki.

16 Ali ɓo' minɗi taas ne, ini ɗasɗukiɗi ŋ kosi ɓoo kos te wa teeɓohuusa, wa in yakiɗ :