1 Kon, Kiristaani degseen miskiɗ ŋ faaniŋ ɗe. Mbaa ɗu nak, ganaaykohaat liiɓohaaɗeem, laam, ɓo' nu degu miskiɗ ŋ faaniŋ ɗe ɗah, a reehɗukohiɗ na bakaaɗ. 2 Ini a taskoh kipes ŋ kehƴi, a taambɗissuu kiñin kiŋ ɗe, waaye a pesee ŋ ini Kooh waaɗ.

3 Ee di', ɗeɓgaan, ɗu tumee ini neɓ kosaaɗiici. Ɗu meeɗ meeɗ cakaay, ɗu taambɗee kiñin ciŋ ɗu, ɗu laaree, ɗu mbuumbaayee na biiñ laayiɗ, ɗu ñaamkeeɗa kooh ci nikaaɗiici ñaamuk siɓaah. Ɗu maannja nga lool ; ɗiski wa nik, wa doyiɗ.

4 Kosaaɗiici feyuuɗ ŋ ini ɗu seeskisɗi hun na ɓa ŋ cakaayi miskiɗeem, ɓeɗi ɓas ɗu. 5 Waaye ɓa hey tahse Kooh yi ƴut ne a atte pesiɗ ci na kaaniɗ ci. 6 Ineem weɗ tah kaaniɗ ci woyuuɗ Yegɗohiŋ Muci, ne ɓa min pes ŋ fiki Kooh ŋ kipes ki hun na Fuuɗsi Hoolohngaani. Ɓa min pes, ali nik ne sah, ɓa hey atte'se findi ɓo' na atte'ohse, ngaŋ kipes ka ɓa raakee wa ɓa nikoh na faan caŋ ɓa.

7 Reehiŋ in ci jen reɓiɗ. Kon hunaat na sagoociŋ ɗu te ɗu yunuk ne ɗu min kiim Kooh. 8 Ini uup raak njiriñ weɗ [a]ne, ɗu waaɗtiɗoh keeh-keeh ŋ harmban ɗu, laam waaɗoh na tahe po bakaaɗ laayiɗ ulu. 9 Yaa nu nga ɗah dalɗaat morom ce baahiɗ ŋ kahan ce te wa hunuu na woo ƴin-ƴin.

10 Yaa nu nga ɗu ɗah raakiɗ ini Kooh baahoh ɗe, a taambkohaat morom ce naa. Ŋ ineem, ɗu hey nike taambkohoh baahiɗ ŋ in ci ɗalohiɗ ci Kooh baahoh ɗu. 11 Yaa nu Kooh on min woo ŋ tiikiŋ ɗe ɗah, a woyaat ini Kooh woo. Yaa nu Kooh on a taambkohee ɓo' ɗah, a taambkohaat ɗe na hatili Kooh eɗ ɗe. Ŋ ineem, Kooh yakɗu ŋ in ci jen, taamboh ŋ Yeesu Kiristaa, yi Heɗ kiyak na hatil, te wa genan gen po faw. Amiin !

12 Ɓaah ciŋ ngo ŋ keeñkoh, kinaat feyu ŋ yongkaahi ɗu nikoh ne wa markis ɗu, kinaata amboh in feyohiɗ. 13 Neɓsaat kay ŋ ɓaahi ɗu ɓaah ŋ miskiɗ ciŋ Kiristaani. Ŋ ineem, ɗu hey riife na sum keeh-keeh, ŋ mbehi yaki a yak teeɓohsan. 14 Ɗu ɓasu sagu tiikiŋ Kiristaani ɗah, ɗu neɓɗiɗ, laam Fuuɗsi yaki, Fuuɗsiŋ Kooh, a yii nga ɗu.

15 Ali ɓo' nga ɗu kinaat mbugalu sagu ne a ap ɓo', wala a rok rok, wala a tum in baahaaɗi wiiriis, wala a aas ŋ ini waas ce nikohɗi. 16 Waaye nik ne ɗu na mbugalse sagu ini ɗu nik Kerceen ɗah, kinaat raak kaci nga, yakɗaat Kooh ŋ mini ɗu min ɓay tiikeem[b].

17 Jamanooni reyiɗ, jamanooni atteeni camboh ŋ ɓi kahan Kooh. Wa kockoh nga ɓoo ɗah, kon ɓi sang kos Yegɗohiŋ Kooh ŋ ini kaɗ ŋ Muci, ɓa mirndohan na ? 18 Fiis ci woo ne : « Nik ne mucɗuukiŋ yurhiɗi yooɓɗi ɗah, moo, bakaaɗohi kaañ Kooh moocan nde ?[c] » 19 Mbaa, ɓi na raake miskiɗ, nik ne weɗ Kooh waaɗ ɗah, ɓa genaat tum in baahiɗ, te ɓa wik haf ɓa Kooh, a yi Ferohi, yi fu inah ne in nu a woo ɗah, a tuma.

<- 1 Piyeer 31 Piyeer 5 ->