Fiisi Piyeer koc kaɓɗoh

Rangsohaani

Piyeer ɓaahee ŋ Apootar ciŋ Yeesu. Saaŋ na Saak na Piyeer ɓeɗ Apootar ci kaahay ci tiik ciŋ ɓa uup woyu ŋ teereeci nikiis ci na naandsuke kipes kiŋ Yeesu. Marka Piyeer ŋ Limiŋ tiik ci. Ŋ teerndiŋ "Tum ciŋ Apootar ci", tiikiŋ Piyeer namiɗ pul nga waas laayiɗ.[a]

Ŋ jamanoona Piyeer na fiise kaɓɗohii, a nikee ŋ "kur-taahi na woyse Babilon",[b] te wa miniɗ nik ne tiikeem waaɗee woo Rom. A nikee nga na Maarko yi fiis "Yegɗohiŋ Muci Maarko fiis".[c]

Piyeer fiisiɗ kaɓɗohii wuu kosiɗ ci nikee ŋ ini wil ŋ ɗiski Turki nik woti,[d] mbaa wa miniɗ nik ne Silweng yi woosu ne a wik kaɓɗohii,[e] a wiliɗ ɓak ceem jen naa.

Piyeer fiisiɗ kaɓɗohii ne a ñaah ɓa, ɓa ndengɗuk, ɓa ooluk Kooh te ɓa ris ɗe kerhiɗ.

Fiisi Piyeer koc kaɓɗoh kaɗtiɗoh an :

- Kañɗoh na yakiɗ Kooh 1:1-12

- Kipes hooliɗ wuu Kooh 1:13–2:3

- Kiristaani a yi atoh fi amb taɓahi 2:4-10

- Jangɗoh findi ɓo' joy pesoh 2:11–3:12

- Ndengɗuk ŋ ɗooƴ miskiɗ ci 3:13–4:19

- Findi yakak ci na kosiɗ ci jen joy mand 5:1-11

- Askohi 5:12-14

1 Mi yii kañiɗ ɗu, mi yi Piyeer, Apootariŋ Yeesu Kiristaa. Mi yii fiis ɗu kaytii, ɗu ɓi Kooh kooɗ te ɗu pesee findi hanhe, ŋ pasarkohi ɗu pasarkoh ŋ kur ciŋ Pontos na Galaat na Kapados na Asi na Bitini. 2 Kooh Baabi kooɗiɗ ɗu ŋ findi a inhohee in ci bala ca hayan ɗah, ŋ hoolɗi Fuuɗsi Hoolohngaani hooliɗ ɗu. A kooɗiɗ ɗu ne ɗu kerhiɗ Yeesu Kiristaa te ɗu lisu ñif miŋ ɗe. Baahohsaat, ɗu onu jam te wa ɓaatkee ɓaatuk !

3 Kooh yakɗaah, Koohiŋ Heɗ ɓoo Yeesu Kiristaa, a nammba nik Baabiŋ ɗe. Ŋ miski ɓoo misik ɗe keeh-keeh, a tumiɗ po ɓoo rimkissiɗ, a onnda ɓoo yaakaari na pese taamboh ŋ hultiŋ Yeesu Kiristaa. 4 In ci a gap ɓoo minɗi yahuk, ca soɓe'anɗi te moɗkiŋ ca minɗi coot, ɗu ɗaakɗuuɗ ca ŋ Eel ci. 5 Te ɗu sah, Kooh a yii niiɗ ɗu na hatiliŋ ɗe taamboh ŋ kosi ɗu kos ne ɗu raak muc. Muceem ƴutiɗ ne a teeɓoha ŋ jamanooni mirndoh.

6 Ineem weɗ tah ɗu riifiɗ na sum, ali nik ne sah ɓi neeh ceɗɗi, ɗu ɓii ŋ miskiɗ, a Kooh na markiskee ɗu, markiskohaaɗ nu nik. 7 Miskiɗ ceem na hee teeɓohe ne kosiŋ ɗu koceet, findi koceetiŋ ursi na markohse ngaŋ yongkaah. Te urus na geneeɗi, a kosiŋ ɗu uupa fuuf. Weɗ tah Yeesu Kiristaa teeɓohuk ɗah, Kooh hey ɗu ɗaape, a yakiɗ ɗu, a meeɓ ɗu. 8 Yeesu, ɗu hotɗi ɗe te moona ɗu waaɗiɗ ɗe. Ɗiski wa nik, ali nik ne ɗu hotɗi ɗe sah, ɗu kosiɗ ɗe, ɗu sumoh na sumoh, ɗu sumiɗ sumi nguɓ minɗi woo, ɗu sumiɗ po ɗu minisɗi sum. 9 Ɗu ɓii rahas ƴin ƴin muci kosiŋ ɗu mirndohan ɗu on.

10 Ini kaɗ ŋ muceem, woosuuɗ ci ɗeɓgaan markiɗa, markissaa baahiɗ wi ɓa yegɗohee baahohi Kooh baahohan ɗu. 11 Ɓa markiɗa ne ɓa inah ina wala jamanoona Fuuɗsiŋ Kiristaani nikee nga ɓa woyoh na ɓa. A woyee na ɓa ŋ in ci na haye, ini kaɗ miskiɗ ciŋ Kiristaani na yaki a yakan ŋ finho miskiɗ ceem. 12 Ɓa teeɓuuɗ ne wa nikee wuu ɓa ŋ haf ɓa haa, waaye wuu ɗu. Te ɗiski wa nik, in ceem, a Fuuɗsi Hoolohngaani woosohu Eel ci woo ɗu ca, taamboh ŋ ɓi yegɗohee muci. Malaakaaci sah waaɗiɗ ca marak keeh-keeh po inah.

13 Kon tokɗukaat, ɗu yun hel ciŋ ɗu. Oolkiŋ ɗu jen nikaat ŋ baahohi ɗu baahohsan mbeha Yeesu Kiristaa teeɓohkan. 14 Findi kuɓuuci kerhiɗ ɓi rim ɓa, kinaat taambiɗ waaɗ-waaɗ ci ɗu raakee wotɓa wa ɗu inahɗi Kiristaani ; 15 waaye hoolaat ŋ tumohaaɗ ciŋ ɗu jen findi Yi ɓeeɗuk ɗu hooloh, 16 wa fiisuuɗ ne : « Ɗu joy joy hool, laam, mi, ŋ hooliɗ. »[f]

17 Kooh, a yi na atte'e ɓooɓi jen, yaa nu nga ŋ tumohaaɗ ciŋ ɗe, te wa raakɗi talsoh. Te nik ne Kooh yeem, a yi ɗu na ɓeeɗke Baab ne ɗu kiimee ɗe ɗah, nupaat ɗe ŋ jamanooni ɗu nikoh hanhe ŋ kehƴi. 18 Ɗu inhiɗ ne ini tos ɗu ŋ pesohaaɗi raakaaɗi njirñi ɗu lamoh ŋ caac ciŋ ɗu, wa ini na reehe findi haalis wala urus haa. 19 Waaye ɗu tosohu ñif miŋ Kiristaani wi uupiɗ njiriñ fuuf, wa mand na ñif miŋ mbaali raakaaɗi sikka wala haawsuk.

20 Kooh inheen ɗe bala Adina fersan, te a teeɓohiɗ ɗe ŋ mirndaaniŋ jamanooni saguuɗu. 21 Ɗu, ɗu kosiɗ Kooh taamboh nga ɗe, Kooh yi hultiɗ ɗe, yakiɗta ɗe ne kosiŋ ɗu na yaakaariŋ ɗu gaƴuk ŋ Kooh.

22 Ɗu kerhiɗiɗ keeh ki po ɗu hoolɗiɗ haf ɗu ne ɗu waaɗoh waaɗohi hunɗi na naafeeha, ɗiski wa nik, waaɗtiɗohaat waaɗtiɗoh keeh-keeh na keeñ hooliɗ. 23 Laam ɗu rimkissiɗ, te ɗu rimukɗi ŋ ɓoyi na kaane, ɗu puloh ŋ tisohi na yahkeeɗi, woo kiŋ Kooh, wi na pese te wa genan gen. 24 Fiis ci woyiɗ ne :