1 Ɓoo kaɗaat ŋ ini ɗu woo ŋ kayti ɗu fiisee so, ŋ ini kaɗ ŋ ƴaar, andi sang hun na ɓitiɓ baahiɗ nga ɗe. 2 Mbalayi laayiɗi tahiɗ po ini ngisoh weɗ ne ƴaar nu nga hunaat na ɓitiice te ɓitiɓ nu nga hun na ƴaar ce. 3 Ƴaari tumaat na ɓitiice ini a joy tum na ɗe ; ɓitɓi nam tum ɗaa na ƴaar ce. 4 A ɓitiɓ raak faaniŋ ɗe haa, a ƴaar ce raaka ; a ƴaari nam raak faaniŋ ɗe haa, a ɓitiice raaka.

5 Ali ɓo' kinaat sangoh morom ce haf ce, hanaa ɗu kerhiɗoh ŋ ineem ɓi neeh ɗah, ne ɗu uup min kiim Kooh. Waaye wa ƴut ɗah, dokkaat ɗu ɓaahee fiƴaang, bala Seytaani kafndan ɗu sagu minaaɗi amb haf ɗu. 6 Hunaaɗiikiŋ ɗu ɓi neeh weem, wa nakoh haa, waaye ɗu waaɗa ɗah, ɗu miniɗa tum.

7 Keeh-keeh, nikeen ne ɓooɓi jen mand na so ɗah, wa heen ndo neɓe ; waaye yaa nu nga na ini Kooh on ɗe, yii onu wii, yen onu wen.

8 Ɓitiifu wala ƴaar fu kaan ɗah, wa baahiɗ ne fu tas raakaaɗi, findiiso. 9 Waaye ɓooɓeem, ɓa minɗi amb haf ɓa ɗah, ƴaar ci tokissaat, ɓitiɓ ci raakis ƴaar ; raak ƴaar mbaa ɓitiɓ weɗ ngisoh maɗ hee ɗa ape.

10 Ɗu ɓi tok na ɓi toku, inii weɗ maa hee ɗu woye, a ñam sah haa, waaye a Heɗi woya : Ali ɓitiɓ kinaat saɓsukoh na ƴaar ce. 11 A saɓsukoh ɗah, a risaat raakaaɗi ƴaar wala book a dokkohaat na ƴaar ce. Ali ƴaar kinaat nam fañ ɓitiice.[a]

12 Ini maa hee woye ŋ ini kaɗ ŋ ɓi tas, a Heɗi woya haa, a ñam woya : Ƴaar kosiɗ raak ɓitiɓ kosaaɗi, te ɓitɓeem teyɗuk gen na ɗe ɗah, a kinaat ɗe fañ ; 13 ɓitiɓ kosiɗ raak ƴaar kosaaɗi, te yeem teyɗuk gen na ɗe ɗah, a kinaat saɓsukoh na ɗe. 14 Ŋ ineem, ƴaari kosaaɗiini hoolɗuuɗ sagu ini a raak ɓitiɓ kosiɗ, te ɓitɓi kosaaɗiini hoolɗuuɗ sagu ini a raak ƴaar kosiɗ. Wa nikoheeɗi ɗaa ɗah, kuɓuuciŋ ɓa hee nikee kuɓu hoolaaɗi te moona ɓa hooliɗ wuu Kooh. 15 Waaye kosaaɗiini waaɗ saɓsukoh ɗah, a saɓsukohaat ; wa nikoh ɗaa ɗah, kosiɗi, a nik ƴaar a nik ɓitiɓ, in ambisɗi ɗe. Kooh ɓeeɗuk ɗu ne ɗu pes ngaŋ jam. 16 Fu yi ɓitɓi kos, yaa inah, wa miniɗ nik ne fu hey tahe ƴaar fu muc ! Wala fu yi ƴaari kos, yaa inah, wa miniɗ nik ne fu hey tahe ɓitiifu muc !

17 Ini ŋ nakoh ŋ Janguuci jen, weɗ ne yaa nu nga ɗah risaat ŋ ini Kooh on ɗe ne a nika, wi a ɓeeɗuk ɗe ne a kos.

18 Nik ne wi Kooh na ɓeeɗke ɓoyi, wa raak ɗe nguɗkiɗ ɗah, a kanaat nihis mandargaaniŋ nguɗkiŋ ɗe ; nik ne wa raak ɗe nguɗukɗi ɗah, a kinaat nguɗuk. 19 Nguɗuk na nguɗkaaɗi jen in haa ; ini raak etoh kay weɗ taambiɗ nakoh ciŋ Kooh. 20 Yaa nu nga risaat findi a nikee wa Kooh ɓeeɗuk ɗe ne a kos.

21 Kooh ɓeeɗuk ɗa, raak ɗa ñaam ɗah, ineem kinaat ɗa misik ; waaye fu raak ini fu min tum po fu raak haf fu ɗah, tondka ŋ ineem. 22 Ɓoyi nikee ñaam a ɓeeɗkuusa ne a kos Heɗi, a raakiɗ haf ce, a wuu Heɗi kotii ; wa nam mand ɗaa, ɓoyi raakee haf ce te Heɗi ɓeeɗukka ɗe, ɓoyeem a ñaamiŋ Kiristaani. 23 Ɗu romuuɗ po candoomiŋ ɗu eɗohuuɗ ; kon kinaat waak heɗ wiiriis. 24 Ɓaah ciŋ ngo, yaa nu nga ɗu ɗah risaat ŋ ini a nikohee wa Kooh ɓeeɗuk ɗe.

25 Ini kaɗ ŋ cafaƴ ci, ŋ rahasɗi nakoh puloh ŋ Heɗi ; waaye maa hee woye ini ŋ liiɓ nga findi ɓoyi oolku sagu yirmi Heɗi yirim mbo. 26 Sagu miskiɗ ci woti-woti ŋ liiɓ ne ini ngisoh weɗ ne yaa nu nga ris ŋ ini a nikoh. 27 Fu nguɗiɗ cakiim e ? Kina jeem pul nga. Fu raakɗi ɓitiɓ e ? Kina waak ɓitiɓ. 28 Waaye fu tok ɗah, wa bakaaɗ haa. Te kuɓki cafƴi toku ɗah, a bakaaɗɗi. Waaye inhaat ne ɓooɓi nik ŋ sey hey raake miskiɗ ŋ Adina, te miskiɗ ceem ceɗ ŋ waaɗɗi ne ca rahas ɗu.

29 Ɓaah ciŋ ngo, inii weɗ ŋ waaɗ woo : Ini tas ŋ jamanooni laayisɗi ; ini amboh woti, ɓi raak ɓitiɓ mandaat na ɓi raakɗi ɓitiɓ, 30 ɓi na fuɗe mandaat na ɓi fuɗɗi, sumiɗ ci mandaat na sumaaɗiici, ɓi na rome mandaat na ɓi raakɗi romoha. 31 Ŋ rohƴiɗ, ɓi na njirñiɗkohe in ciŋ Adina mandaat haa ne ɓa njirñiɗkohɗi ca, laam, adinaani, findi wa na tiindohe an, wa ɗii ŋ kot sooƴ. 32 Waaɗ-waaɗiŋ ngo, weɗ ne ɗu raakuu ali liiɓsiɗoh Adina.

Kosiɗi raakɗi ɓitiɓ, na taambkohe in ciŋ Heɗi, na findi a joy tum po Heɗi neɓu nga ɗe. 33 Waaye yi tok ɓitiɓ na taambkohe in ciŋ Adina, na findi a joy tum po ɓitiice neɓu nga ɗe, 34 ŋ ineem a na inheeɗi ini a tuman na wi a faɗan.

Wa mand ɗaa ŋ ɓitɓi raakɗi ƴaar, na kuɓki cafƴi tokuuɗi, ɓa na taambkohe in ciŋ Heɗi, faan ciŋ ɓa na liiɓ ciŋ ɓa wuu Kooh. Yi raak ƴaar na name taambkoh in ciŋ Adina, na findi a joy tum po ƴaar ce neɓu nga ɗe. 35 Ŋ woo in cii wuu jamiŋ ɗu, ŋ wooɗi ca ne ŋ waaɗ ɗu jatang. Ŋ waaɗ rek ne ɗu raak kipes moɗiɗ te ɗu ŋoɗ ŋ pangkiŋ Heɗi dong.

36 Waaye ŋ ini kaɗ ŋ kuɓki ƴaari nguɗ cakiim, kaɗ po a liiɓ ne a minɗi amb haf ce, te wa miniɗ ɓek kaci ŋ harmban ce na kuɓki cafƴi a nguɗ cakiim nga ɗe te a hot ne a joy ɗe joy tok ɗah, a tumaat ini a waaɗ : Ɓa kilookohaat, ŋ ndeem a bakaaɗɗi. 37 Waaye kuɓki ƴaari tokɗuk ndengiɗ ŋ keeñiŋ ɗe ne a tokanɗi ɓitiɓ, a min amb haf ce ɗah, te nikɗi haa ne a ɓo' ɓek ɗe nga, waaye a yi waaɗ ne a heyɗi ɗe toke, ŋ ineem a tum in baahiɗ. 38 Ŋ ndeem, yi tok tum in baahiɗ, te yi faɗ, a nam tum in baahiɗ, weɗ ngisoh.

39 Ɓitɓi raak ƴaar, feeh ƴaar ce yii pes ɗah, a ris ŋ niyiŋ ƴaar ce ; ƴaari kaan ɗah, a miniɗ kilookoh na ƴaari neɓ ɗe, waaye a nikaat ƴaari kos Heɗi. 40 Waaye ŋ liiɓ ne a ris findi a mand, raakaaɗi ƴaar, weɗ uupan baah nga ɗe ; te ŋ ineem ŋ namiɗ liiɓ ne ŋ rahsiɗ Fuuɗsiŋ Kooh !

<- 1 Korenta 61 Korenta 8 ->