Ⅱ తత్ర ఫైనీకియాదేశగామినమ్ పోతమేకం ప్రాప్య తమారుహ్య గతవన్తః|
Ⅲ కుప్రోపద్వీపం దృష్ట్వా తం సవ్యదిశి స్థాపయిత్వా సురియాదేశం గత్వా పోతస్థద్రవ్యాణ్యవరోహయితుం సోరనగరే లాగితవన్తః|
Ⅳ తత్ర శిష్యగణస్య సాక్షాత్కరణాయ వయం తత్ర సప్తదినాని స్థితవన్తః పశ్చాత్తే పవిత్రేణాత్మనా పౌలం వ్యాహరన్ త్వం యిరూశాలమ్నగరం మా గమః|
Ⅴ తతస్తేషు సప్తసు దినేషు యాపితేషు సత్సు వయం తస్మాత్ స్థానాత్ నిజవర్త్మనా గతవన్తః, తస్మాత్ తే సబాలవృద్ధవనితా అస్మాభిః సహ నగరస్య పరిసరపర్య్యన్తమ్ ఆగతాః పశ్చాద్వయం జలధితటే జానుపాతం ప్రార్థయామహి|
Ⅵ తతః పరస్పరం విసృష్టాః సన్తో వయం పోతం గతాస్తే తు స్వస్వగృహం ప్రత్యాగతవన్తః|
Ⅶ వయం సోరనగరాత్ నావా ప్రస్థాయ తలిమాయినగరమ్ ఉపాతిష్ఠామ తత్రాస్మాకం సముద్రీయమార్గస్యాన్తోఽభవత్ తత్ర భ్రాతృగణం నమస్కృత్య దినమేకం తైః సార్ద్ధమ్ ఉషతవన్తః|
Ⅷ పరే ఽహని పౌలస్తస్య సఙ్గినో వయఞ్చ ప్రతిష్ఠమానాః కైసరియానగరమ్ ఆగత్య సుసంవాదప్రచారకానాం సప్తజనానాం ఫిలిపనామ్న ఏకస్య గృహం ప్రవిశ్యావతిష్ఠామ|
Ⅸ తస్య చతస్రో దుహితరోఽనూఢా భవిష్యద్వాదిన్య ఆసన్|
Ⅹ తత్రాస్మాసు బహుదినాని ప్రోషితేషు యిహూదీయదేశాద్ ఆగత్యాగాబనామా భవిష్యద్వాదీ సముపస్థితవాన్|
Ⅺ సోస్మాకం సమీపమేత్య పౌలస్య కటిబన్ధనం గృహీత్వా నిజహస్తాపాదాన్ బద్ధ్వా భాషితవాన్ యస్యేదం కటిబన్ధనం తం యిహూదీయలోకా యిరూశాలమనగర ఇత్థం బద్ధ్వా భిన్నదేశీయానాం కరేషు సమర్పయిష్యన్తీతి వాక్యం పవిత్ర ఆత్మా కథయతి|
Ⅻ ఏతాదృశీం కథాం శ్రుత్వా వయం తన్నగరవాసినో భ్రాతరశ్చ యిరూశాలమం న యాతుం పౌలం వ్యనయామహి;
ⅩⅢ కిన్తు స ప్రత్యావాదీత్, యూయం కిం కురుథ? కిం క్రన్దనేన మమాన్తఃకరణం విదీర్ణం కరిష్యథ? ప్రభో ర్యీశో ర్నామ్నో నిమిత్తం యిరూశాలమి బద్ధో భవితుం కేవల తన్న ప్రాణాన్ దాతుమపి ససజ్జోస్మి|
ⅩⅣ తేనాస్మాకం కథాయామ్ అగృహీతాయామ్ ఈశ్వరస్య యథేచ్ఛా తథైవ భవత్విత్యుక్త్వా వయం నిరస్యామ|
ⅩⅤ పరేఽహని పాథేయద్రవ్యాణి గృహీత్వా యిరూశాలమం ప్రతి యాత్రామ్ అకుర్మ్మ|
ⅩⅥ తతః కైసరియానగరనివాసినః కతిపయాః శిష్యా అస్మాభిః సార్ద్ధమ్ ఇత్వా కృప్రీయేన మ్నాసన్నామ్నా యేన ప్రాచీనశిష్యేన సార్ద్ధమ్ అస్మాభి ర్వస్తవ్యం తస్య సమీపమ్ అస్మాన్ నీతవన్తః|
ⅩⅦ అస్మాసు యిరూశాలమ్యుపస్థితేషు తత్రస్థభ్రాతృగణోఽస్మాన్ ఆహ్లాదేన గృహీతవాన్|
ⅩⅧ పరస్మిన్ దివసే పౌలేఽస్మాభిః సహ యాకూబో గృహం ప్రవిష్టే లోకప్రాచీనాః సర్వ్వే తత్ర పరిషది సంస్థితాః|
ⅩⅨ అనన్తరం స తాన్ నత్వా స్వీయప్రచారణేన భిన్నదేశీయాన్ ప్రతీశ్వరో యాని కర్మ్మాణి సాధితవాన్ తదీయాం కథామ్ అనుక్రమాత్ కథితవాన్|
ⅩⅩ ఇతి శ్రుత్వా తే ప్రభుం ధన్యం ప్రోచ్య వాక్యమిదమ్ అభాషన్త, హే భ్రాత ర్యిహూదీయానాం మధ్యే బహుసహస్రాణి లోకా విశ్వాసిన ఆసతే కిన్తు తే సర్వ్వే వ్యవస్థామతాచారిణ ఏతత్ ప్రత్యక్షం పశ్యసి|
ⅩⅪ శిశూనాం త్వక్ఛేదనాద్యాచరణం ప్రతిషిధ్య త్వం భిన్నదేశనివాసినో యిహూదీయలోకాన్ మూసావాక్యమ్ అశ్రద్ధాతుమ్ ఉపదిశసీతి తైః శ్రుతమస్తి|
ⅩⅫ త్వమత్రాగతోసీతి వార్త్తాం సమాకర్ణ్య జననివహో మిలిత్వావశ్యమేవాగమిష్యతి; అతఏవ కిం కరణీయమ్? అత్ర వయం మన్త్రయిత్వా సముపాయం త్వాం వదామస్తం త్వమాచర|
ⅩⅩⅢ వ్రతం కర్త్తుం కృతసఙ్కల్పా యేఽస్మాంక చత్వారో మానవాః సన్తి
ⅩⅩⅣ తాన్ గృహీత్వా తైః సహితః స్వం శుచిం కురు తథా తేషాం శిరోముణ్డనే యో వ్యయో భవతి తం త్వం దేహి| తథా కృతే త్వదీయాచారే యా జనశ్రుతి ర్జాయతే సాలీకా కిన్తు త్వం విధిం పాలయన్ వ్యవస్థానుసారేణేవాచరసీతి తే భోత్సన్తే|
ⅩⅩⅤ భిన్నదేశీయానాం విశ్వాసిలోకానాం నికటే వయం పత్రం లిఖిత్వేత్థం స్థిరీకృతవన్తః, దేవప్రసాదభోజనం రక్తం గలపీడనమారితప్రాణిభోజనం వ్యభిచారశ్చైతేభ్యః స్వరక్షణవ్యతిరేకేణ తేషామన్యవిధిపాలనం కరణీయం న|
ⅩⅩⅥ తతః పౌలస్తాన్ మానుషానాదాయ పరస్మిన్ దివసే తైః సహ శుచి ర్భూత్వా మన్దిరం గత్వా శౌచకర్మ్మణో దినేషు సమ్పూర్ణేషు తేషామ్ ఏకైకార్థం నైవేద్యాద్యుత్సర్గో భవిష్యతీతి జ్ఞాపితవాన్|
ⅩⅩⅦ తేషు సప్తసు దినేషు సమాప్తకల్పేషు ఆశియాదేశనివాసినో యిహూదీయాస్తం మధ్యేమన్దిరం విలోక్య జననివహస్య మనఃసు కుప్రవృత్తిం జనయిత్వా తం ధృత్వా
ⅩⅩⅧ ప్రోచ్చైః ప్రావోచన్, హే ఇస్రాయేల్లోకాః సర్వ్వే సాహాయ్యం కురుత| యో మనుజ ఏతేషాం లోకానాం మూసావ్యవస్థాయా ఏతస్య స్థానస్యాపి విపరీతం సర్వ్వత్ర సర్వ్వాన్ శిక్షయతి స ఏషః; విశేషతః స భిన్నదేశీయలోకాన్ మన్దిరమ్ ఆనీయ పవిత్రస్థానమేతద్ అపవిత్రమకరోత్|
ⅩⅩⅨ పూర్వ్వం తే మధ్యేనగరమ్ ఇఫిషనగరీయం త్రఫిమం పౌలేన సహితం దృష్టవన్త ఏతస్మాత్ పౌలస్తం మన్దిరమధ్యమ్ ఆనయద్ ఇత్యన్వమిమత|
ⅩⅩⅩ అతఏవ సర్వ్వస్మిన్ నగరే కలహోత్పన్నత్వాత్ ధావన్తో లోకా ఆగత్య పౌలం ధృత్వా మన్దిరస్య బహిరాకృష్యానయన్ తత్క్షణాద్ ద్వారాణి సర్వ్వాణి చ రుద్ధాని|
ⅩⅩⅪ తేషు తం హన్తుముద్యతేेషు యిరూశాలమ్నగరే మహానుపద్రవో జాత ఇతి వార్త్తాయాం సహస్రసేనాపతేః కర్ణగోచరీభూతాయాం సత్యాం స తత్క్షణాత్ సైన్యాని సేనాపతిగణఞ్చ గృహీత్వా జవేనాగతవాన్|
ⅩⅩⅫ తతో లోకాః సేనాగణేన సహ సహస్రసేనాపతిమ్ ఆగచ్ఛన్తం దృష్ట్వా పౌలతాడనాతో న్యవర్త్తన్త|
ⅩⅩⅩⅢ స సహస్రసేనాపతిః సన్నిధావాగమ్య పౌలం ధృత్వా శృఙ్ఖలద్వయేన బద్ధమ్ ఆదిశ్య తాన్ పృష్టవాన్ ఏష కః? కిం కర్మ్మ చాయం కృతవాన్?
ⅩⅩⅩⅣ తతో జనసమూహస్య కశ్చిద్ ఏకప్రకారం కశ్చిద్ అన్యప్రకారం వాక్యమ్ అరౌత్ స తత్ర సత్యం జ్ఞాతుమ్ కలహకారణాద్ అశక్తః సన్ తం దుర్గం నేతుమ్ ఆజ్ఞాపయత్|
ⅩⅩⅩⅤ తేషు సోపానస్యోపరి ప్రాప్తేషు లోకానాం సాహసకారణాత్ సేనాగణః పౌలముత్తోల్య నీతవాన్|
ⅩⅩⅩⅥ తతః సర్వ్వే లోకాః పశ్చాద్గామినః సన్త ఏనం దురీకురుతేతి వాక్యమ్ ఉచ్చైరవదన్|
ⅩⅩⅩⅦ పౌలస్య దుర్గానయనసమయే స తస్మై సహస్రసేనాపతయే కథితవాన్, భవతః పురస్తాత్ కథాం కథయితుం కిమ్ అనుమన్యతే? స తమపృచ్ఛత్ త్వం కిం యూనానీయాం భాషాం జానాసి?
ⅩⅩⅩⅧ యో మిసరీయో జనః పూర్వ్వం విరోధం కృత్వా చత్వారి సహస్రాణి ఘాతకాన్ సఙ్గినః కృత్వా విపినం గతవాన్ త్వం కిం సఏవ న భవసి?
ⅩⅩⅩⅨ తదా పౌలోఽకథయత్ అహం కిలికియాదేశస్య తార్షనగరీయో యిహూదీయో, నాహం సామాన్యనగరీయో మానవః; అతఏవ వినయేఽహం లాకానాం సమక్షం కథాం కథయితుం మామనుజానీష్వ|
ⅩⅬ తేనానుజ్ఞాతః పౌలః సోపానోపరి తిష్ఠన్ హస్తేనేఙ్గితం కృతవాన్, తస్మాత్ సర్వ్వే సుస్థిరా అభవన్| తదా పౌల ఇబ్రీయభాషయా కథయితుమ్ ఆరభత,
<- Acts 20Acts 22 ->