1 Jesu geru na ñachugu kwian geru jwannga amage alin, Jesu gerudu:

—Cha gerule ba ulita ole, chui bdaglige Chube be cha kageni gerule nga ulita giti kwian Chugagwallale, chui ege kwian gweale be kle mo ta gbaba biale no cha chieni chuia manade ngwange, agwa kwian na mi kle biale dale cha ngwange, ama me nu Chube gerua cha giti gaba ulia. Chui ege be boi salengwli kwian ulita ole boidu muinga judige gdataboko ole kare, muinga e ulita jo jichra dbe mo skatemanalla onbrella manade ngwange jonkare gadale ngwange onbre e mo jwen chuiage. 2-4 Muinga judige gdataboko ulita jo jichra dbe kwian onbre gai ngwange jonkare onbre mo jwen chuiage, muinga judi e gdatiga me kin jichra gwadegagda du ngle, ama jichra alin du kin ole llagli, ama me kin na du jichra gwadegagda nakwaite, ama me chagedu ta giti, ama me tañachugu kwian onbre ñage chke sbali, ama kaire manadale sbali. Agwa muinga na gdatiga ama tachku jichra gwadegagda ñage bidege, malen ama kin du ngle tkale jichrage, ama chagedu biale ta giti. 5 Muinga gdataboko kle mo skatemanalla onbrella manade ngwange ene jichra ole jonkare, agwa onbre e me chku blikare, muinga ulita skwatigu manade gire ama ulita gbigachiu, ama gbedu. 6 Agwa nga jere bduke chku gire muinga gdataboko ulitage geru sugedu, ngautre: “¡Ba skatemanalla kwian onbrella chiu! ¡Joga kwian onbre e gai ngwange jonkare!” 7 Ngautre ene amage gire muinga judi ulita chku bduge, ama jichra dodadu ene ama ñage joge ten kwian onbre ngwange. 8 Agwa muinga judi gdatiga ta me ama gerudu muinga gdatiga ta molen ole: “Ba kin kete chage sidri cha jichralla alin, cha jichralla me gwadenga no, jichra ta jogekalinda.” 9 Agwa muinga gdatiga ta molen gerudu: “Cha me ñage kin kete bage, cha kete bage kin me ñage chege cha alin ngle. Ma no ba joge kin chbadakle ngwadi ba ñage kin gige llani.” 10 Gire muinga judi gdatiga ta me ama jo kin gige kin chbadakle ngwadi, ama me kle gire ama skatemanalla onbrella chku. Muinga judi gdatiga ta molen, ama alin allabi onbre e gau ngwange no, muinga gdatiga e jo chiga ule onbre ole mo jwen chuia ollade, gire ugaka jegle ama ulita nate. 11 Boidu ene gire muinga na gdatiga chku ugakadi gerule: “¡Ugaka dégenga, cha jogekalin chiga!” 12 Gire kwian onbre be mo jwen ama kledu chiga jaindunga muinga judi gdatiga e kalen: “Cha gerule ulia ulia ba ole, cha me ba uñe, malen ba me ñage chie chiga chui ollade ule cha ulita ole.” Kwian onbre be mo jwen gerudu ene muinga judi gdatiga ta me ole, gire muinga e ulita chegu goga sugekare.

13 Jesu geru ñachugu ene gire gerudu:

—Ene kaire ba ulita kledale ta giti cha chieni chuia manade ngwange muinga judi gdatiga ta molen kare. Ba ulitage me uñale cha be chieni chui mangirege malen ba kledale biale cha manade ngwange diali —Jesu gerudu ene ulita kwian geru jwannga amage ole.

14 Jesu geru ñachugu dare kwian geru jwannga ulita alin, Jesu gerudu:

—Cha gerule ba ole, chui bdaglige Chube be cha kageni gerule nga ulita giti kwian Chugagwallale, chui e ngwange ba kledale biale, kwian ulita bai agedu cha takalin kare nga dba ai giti, kwian e alin cha be age no chui ege ama agedu no ñanale. Cha be chieni salengwli kwian chugagwalla jo nga batege chiuni kare. Kwian chugagwalla e bebi joge gire ama kwian lle boanga mau alin gdamai kadu mo gitigu gire igi ketu ama ulitage, ene kwian lle boanga e ulita ñage igi e gbe jrien ma ngle mo chugagwalla alin. 15 Kwian lle boanga gdaitege chugagwalla igi ketu ngle ngle cinco mil, lle boanga na gdaitege chugagwalla igi ketu ma bedrekanga ngeruge dos mil, lle boanga na gdaitege chugagwalla igi ketu un mil alin allabi ma sidri. Chugagwalla me igi ketu salengwli lle boanga gdamai ulitage, chugagwallage uñadu kwian lle boanga ama alin ta mine. Chugagwalla jo nga na batege. 16 Kwian lle boanga gdaite igi gau cinco mil mo chugagwallage, kwian lle boanga e lle gweale gigu igi e giti gire lle chbadu, kledu age ene gire igi jriendunga ama ole bitaboke tangle ma ngle, bdagli igi chku ulita ama ole ngle ngle diez mil. 17 Kaire agwe kwian lle boanga na gdaite igi gau dos mil mo chugagwalla alin, ama agedu kaire agwe, igi jriendunga ama ole bitaboke tangle ma ngle, ene ama igi litu ole ngle cuatro mil. 18 Agwa kwian lle boanga gdaite igi ma sidri igi un mil gau mo chugagwallage, kwian lle boanga e dbi bagu gire ne ngwadi ama igi e ulita ogo chugagwalla alin, ama ole igi me ñadu jriennga, igi chegu salengwli igi ketre batre amage kare.

19 ’Chui jo sbali gire kwian lle boanga chugagwalla chkuni ama kwian maidige, chugagwalla kwian lle boanga e kadu mo gitigu geru trage ama ole igi giti ama igi gbu jriennga mangire. 20 Kwian lle boanga igi ketrege ngle cinco mil, ama jo tienda ngeru chugagwalladige, ama gerudu: “Ba igi ketu cinco mil chage, cha igi na gau e batre cinco mil, igi ngle ngle ulita diez mil kle ai ba alin cha chugagwalla.” 21 Kwian lle boanga gerudu ene gire chugagwalla gerudu ama ole: “Ba kwian lle boanga no ulia, ba mo ta gbu lle boi no cha alin, ba agedu no no. Cha igi ketu bage, igi e ole ba lle bo no cha alin, ba igi na gau ngle cha alin. Ba lle bo no cha alin igi e ole, malen nege cha be lle ma kweri kete bage boadale cha alin. Nga suga no chadi ba lle bo no cha alin giti, bai cha ole chui ollade nga suga no ole.” Chugagwalla gerudu ene kwian lle boanga ngeru ole. 22 Kaire agwe kwian lle boanga gdaitege igi dos mil ketaba, ama jo tienda chugagwalladi, gerudu chugagwalla ole: “Ba igi ketu chage dos mil, cha igi na gau e batre dos mil, igi ulita cuatro mil kle ai ba alin cha chugagwalla.” 23 Kwian lle boanga gerudu ene gire chugagwalla gerudu ama ole: “Kaire agwe ba kwian lle boanga no ulia, ba mo ta gbu lle boi no cha alin, ba agedu no no. Cha igi ketu bage, igi e ole ba lle bo no cha alin, ba igi na gau ngle cha alin. Ba lle bo no cha alin igi e giti, malen nege cha be lle na ma kweri kete bage boadale cha alin. Nga suga no chadi ba lle bo no cha alin giti, bai cha ole chui ollade nga suga no ole.” Chugagwalla gerudu ene kwian lle boanga e ole.

24 ’Kwian lle boanga gdaitege igi un mil ketaba, ama jo tienda chugagwalladi gire gerudu: “Cha chugagwalla, chage uñale ba kibale ba kle kwian gbe lle boi mno ba alin bigire ba kle lle ulita jwen ama ngeru mau alin. 25 Ba kwian ene malen cha ta kendunga badi, cha tañachugu cha lle boi igi e giti igi e jogenga gire ba skochie chadige igi gdale, malen cha igi e ulita ogo dbiske, cha me igi na litu ole ba alin, nege cha igi amaña keteni bage.” 26-27 Gire chugagwalla jaindunga lle boanga e kalen: “Ba kwian lle boanga me no kaire ba kwian kianle tanre. Ba tañachugu chadi cha kle kwian gbe lle boi mno gire cha kle lle ulita jwen ama ngeru mau alin, e uñale bage ene ¿mineade ba me jo igi oge kwian kle igi oge ngwadi? Ene llani kwian na ñadu lle boi igi e giti, cha chieni gire ama igi na kete chage ma ngle cha igia kledu llani ñanale.” Chugagwalla gerudu ene kwian lle boanga me no ole. 28 Kwian na kledu ule ne ngwadi chugagwalla ole, kwian e ulita ama ole chugagwalla gerudu kwian lle boanga me no giti: “Cha igi ketu un mil amage ba igi e jwennga ama ngeru kete kwian lle boangage bai igi molen ma ngle diez mil. 29-30 Kwian ai lle boanga me no kianle tanre ba ama mlie siere cháge goga nga jereske, ne ngwadi ama be olire tanre ama be boi daga ngwale tanre ama agedu me no giti. Cha gerule ba ole, kwian bai lle boi no cha alin cha takalin kare, cha be lle na kete amage boadale cha alin, cha be age no no ama alin lle boi no cha alin ñanale. Agwa kwian bai me lle boi no cha alin cha takalin kare, kwian ene mi ñage lle boi cha alin dare.” Chugagwalla gerudu ene lle boanga ama alin giti.

Jesu geru ñachugu ene kwian geru jwannga alin, ene ñage suge trate ama ulitage ama mo ta gbadale ulia lle boi no Chube alin Jesu chieni chuia manade ngwange.

31 Jesu gerudu dare kwian geru jwannga amage ulita ole:

—Chube nu cha kagaba nga dba ai giti kwian kare, ama be cha kageni nabitaite kira kweri molen kwian ulita Chugagwallale. Cha chieni chuiage lle boanga Chube alin nga ngaña giti ngle be chie ule cha ole mo litaba chadi tangle, chui ege cha be gerule kwian ulita giti nga ulitage kwian bai Chube gerua gau ulia kwian bai me Chube gerua gau ulia. 32-33 Kwian ulita nga ulitamu dbabe cha gwa giti gire cha be kwian ta no gbe sugekare cha be kwian ta me no jige sugekare salengwli kwian bda mananga kle bda oveja gbe sugekare chivoge kare. Cha be kwian ta no Chube gerua gaba ulia gbe ko taingwli ngnagu, kwian ta me no me Chube gerua gaba ulia cha be ama gbe ko jole ngnagu. 34 Cha kwian ulita Chugagwalla be gerule kwian cha ko taingwli ngnagu ole: “Bai cha ole ba mangire batre Chube gerua gau ulia, cha Ñenua Chube no no ba ole ama age no ba alin diali. Nege nga no lle no kle dodaba ba alin nga ngaña giti Chube kle ngwadi, Chube nga ulita lle ulita dodadu unsuialin gwangerutabi gire ama nga dodadubi ama kle ngwadi ba mangire batre ngwange. 35 Ulia ba ulita agedu tanre no cha alin ai kare: Cha bli ole, ba bligda ketu chage. Cha siechiu, ba chi ketu chage jadale. Cha chagedu basale ba kledu toi ngwadi, ba me cha uñu agwa ba cha gau ngwange no, ba nga ketu chage gbengwa. 36 Cha me ñometra ole, ba ñometra ketu chage. Cha ogadu, ba diali cha manadu. Cha tkere skage, diali ba jo tienda chadi. Ba diali cha chudabo ene, malen nege ba ñage chege toi cha ole.” Chui bdaglige cha be gerule ene kwian ulita ole bai mo ta gbu age no. 37 Cha be gerule ene gire kwian ene ulita be geru kade chage: “Cha Chugagwalla, ¿ngaminegire cha gwagedu badi bli ole, gire cha lle ketu bage gutadale? ¿Ngaminegire cha gwagedu badi sie ole, gire cha chi ketu bage jadale? 38 ¿Ngaminegire ba chagedu basale cha kledu toi ngwadi, gire cha nga ketu bage gbengwa? ¿Ngaminegire ba me ñometra ole, gire cha ñometra ketu bage? 39 ¿Ngaminegire cha gwagedu badi oga, gire cha ba manadu? ¿Ngaminegire ba tkere skage, gire cha jo tienda badi?” 40 Kwian be geru kade ene chage, gire cha be jainnga: “Cha gerule ulia ba ulita ole, kwian tanre cha gerua gaba ulia me lle molen, ba kwian ene manadu no, ba lle ketu amage, ba ama chudabo, e salengwli ba cha agali chudabo kare.”

41 ’Cha kwian Chugagwalla be gerule no ene kwian ulita ole bai mo ta gbu age no kle cha ko taingwli ngnagu ole, gire cha be gerule kwian ulita ole bai mo ta gbu age me no kle cha ko jole ngnagu ole: “Joga siere chage, ba jiske kweri Chube gwa giti, ji kle ngle ba giti ba agedu me no gdale, joga nga dbigu giti, ne ngwadi jita me kle jogekeda dale, nga e kle dodaba biale ji chugangwa dolla chugagwalla Satanás alin kaire Satanás chudaboangalla ulita alin. ¡Joga nga ege kaire! 42 Ba agedu me no cha alin ai kare: Ba gwagedu chadi bli ole, ba me bligda ketu chage gutadale. Ba gwagedu chadi sie ole, ba me chi ketu chage jadale. 43 Cha jo chage basale ba kledu toi ngwadi, ba me cha gau ngwange no, ba me cha chudabo ba me nga ketu chage gbengwa. Ñometra me chegu cha ole, ba me ñometra ketu chage. Cha ogadu, ba me cha manadu. Cha kledu skage, ba me jo tienda chadi. Ba me cha chudabo, malen ba be boi daga ngwale ji chuge tanre.” 44 Chui bdaglige cha be gerule ene kwian ulita ole bai mo ta gbu age me no cha ole, gire ama be geru kade chage: “Cha Chugagwalla, ¿ngaminegire cha gwagedu badi bli ole, gire cha me bligda ketu bage gutadale? ¿Ngaminegire cha gwagedu badi sie ole, gire cha me chi ketu bage jadale? ¿Ngaminegire ba chagedu basale cha kledu toi ngwadi, gire cha me nga ketu bage gbengwa? ¿Ngaminegire ñometra me chegu ba ole, gire cha me ñometra ketu bage? ¿Ngaminegire ba ogadu, gire cha me ba manadu? ¿Ngaminegire ba tkere skage, gire cha me jo tienda badi?” 45 Kwian be geru kade ene chage gire cha be jainnga ama kalen: “Ulia ulia cha gerule ba ulita ole, ba me kwian cha gerua gaba chudabo lle me ama ole gire, ba me lle ketu amage e salengwli ba me cha agali chudabo kare. Ba me kwian ene chudabo, ene kaire ba me cha chudabo.” Cha be jainnga ene kwian mo ta gbu age me no kalen. 46 Cha be kwian mo ta gbanga age me no kage boi daga ngwale tanre nga dbigu giti chui diali chui tangle. Agwa kwian mo ta gbanga ulia cha ole age no cha takalin kare, kwian ene be joge toi nga ngaña giti cha ole kaire cha Ñenua Chube ole diali chui tangle —Jesu gerudu ene ulita kwian geru jwannga amage ole.

<- MATEO 24MATEO 26 ->