1 Jesu gerudu ene Pedro ole gire Jesu gerudu dare kwian geru jwannga gdataboko giti gdaite ole:

—Ba ulita me chegedale tañachuge tanre be boi giti, ba me ta dbadale kennga, ba me ta dbadale olire, ba mo ta gbadale Chube gai ma no, kaire ba mo ta gbadale cha gai ma no diali. 2-3 Nga ngaña giti cha Ñenua ngwadi nga tanre kle toingwa, cha be jogeni nga e gbe biale ulita ba ulita alin ba ngwange, nga e me cha me gerule ba ole cha jogeni nga e gbe biale ba ulita alin. Cha kle gerule ulia ba ulita ole, nga e be kle biale ulita gire cha be chieni ba ulita jwen dbe ule toi cha be kle ngwadi ule cha ole. 4 Uñale ba ulitage cha be joge baini, kaire uñale ba ulitage ba ñage joge mine cha be joge ngwadi.

5 Jesu gerudu ene kwian geru jwannga ulita ole gire Tomás gerudu Jesu ole:

—Cha Chugagwalla, me uñale ni cha gdaitege ba be joge baini, ¿mine be chke uñale cha ulitage ba be joge jon mine giti ene cha ulita ñage joge chke kaire ba be kle ngwadi?

6 Jesu jaindunga:

—Cha agali jonkare kwian ulita alin, cha giti alin allabi kwian ñage joge chke cha Ñenua ngwadi, cha giti geru ulia cha Ñenua giti chke uñale kwiange, kaire cha giti kwian ñage toi diali chui tangle cha Ñenua ole. 7 Sugedu trate ba ulitage cha chema ulia, ene ba cha Ñenua uñe kaire, nege gwangergu cha be boi giti ba ulita gwage ba be cha Ñenua uñe ulia, ba kle gwage amadi cha giti.

8 Felipe gerudu Jesu ole:

—Cha Chugagwalla, ba mo Ñenua kaite cha ulitage, cha ulita ta gwagekalin amadi, cha ulita be gwage ba Ñenuadi gire be suge ulia ulia cha ulitage ba alin allabi giti cha ñage joge chke ba Ñenua ngwadi.

9 Jesu gerudu Felipe ole:

—Felipe, sbali cha kle chage ba ole cha kle ba ulitaske, ¿gire ba bebi cha uñe ulia cha chema? Kwian bai kle gwage chadi me kle gwage chadi alin, kle gwage cha Ñenuadi kaire. ¿Mineade ba kle geru kade cha mo Ñenua kaitadale bage? 10 ¿Ba me cha gai ulia cha kle cha Ñenua ole cha Ñenua kle cha ole, cha gdabonate gdaitre alin? Ulita cha kle gerule ba ole cha me kle gerule gballa mo tale, cha Ñenua kle cha ole diali, ama kle cha ta gbe gerule kle cha ta gbe age ulita ama takalin kare. 11 Ba me cha gai ulia cha kle gerule kare ba ole gire ba ulita cha gadale ulia cha lle daga ngwale no dodadu giti, cha lle daga ngwale no tanre dodadu cha Ñenua Chube kiralla giti ba ulita gwa giti, e giti ba ulita cha gadale ulia, sugedale trate ulia ba ulitage cha kle cha Ñenua ole cha Ñenua kle cha ole, cha gdabonate gdaitre alin. 12 Cha gerule ulia ulia ba ulita ole, kwian ulita bai kaire cha gai ulia cha kle gerule kare be lle daga ngwale no dodade cha Ñenua kiralla giti kwian gwa giti cha kle age kare. Cha be jogeni cha Ñenua ngwadi gire kwian ene be chege kwian na tanre ta gbe cha gai Chube Kirollale. 13 Lle ulita bai kaire ba ulita kade cha Ñenuage cha giti, cha be age ba alin ba gerule kare cha ole, ene cha giti kwian be gwage cha Ñenua Chube kiralladi, be gerule no cha Ñenua giti. 14 Ba lle bai kaire kade cha Ñenuage cha giti, cha be age no ba alin ba lle kade kare cha giti cha Ñenuage.

15 Jesu gerudu dare kwian geru jwannga amage ulita ole:

—Ba no cha ole ulia ene ba be cha gerua gbe gdadi ba be age ulita cha gerule kare. 16 Ba age ene gire cha be Chudaboanga na kade cha Ñenuage kagadale ba ulita alin cha tanege, gire cha Ñenua Chube be mo Oña kage, Chube Oña diali no, ama be kle diali ba ulita ole ba chudaboi, 17 ama giti geru ulia Chube giti be suge trate bage. Kwian me Chubenu mi ñage Chube Oña gai ngwange mo tale, me suge amage Chube Oña mine, kwian ene me Chubenu. Ba ulita Chubenu, Chube Oña be kle ba ulita tale be ba ulita ta gbe diali. 18 Cha mi ba jige gballa kwian oli kare, cha be chieni cha be kleni ba ulita ole. 19 Chui chege kodi cha ngeru kwian me chanu mi ñage gwage chadi dare nga dba ai giti, agwa ba ulita chanu, bage be suge mo tale cha kle ba ole, cha toi diali chui tangle, kaire cha giti ba be toi diali chui tangle. 20 Cha Ñenua be mo Oña kage ba alin chuiallage, chui ege be suge trate ba ulitage cha kle cha Ñenua ole, ba ulita kle cha ole, cha kle ba ulita ole. 21 Kwian bai kaire age ulita cha gerule kare cha gerua gai dage, kwian ene ulia no cha ole, kwian no cha ole cha Ñenua be no kwian ene ole, kaire cha be no kwian ene ole, cha be kwian ene ta gbe suge cha kle ama ole.

22 Jesu gerudu ene gire Judas geru kadu Jesuge (Judas e me Judas-Iscariote), Judas geru kadu:

—Cha Chugagwalla, ¿mineade ba be cha ulita banu alin ta gbe suge ba kle cha ole, agwa kwian na me banu ba mi ama ta gbe?

23 Jesu jaindunga:

—Kwian bai kaire no cha ole be cha gerua gbe gdadi be age ulita cha gerule kare, cha Ñenua be no kwian ene ole, cha Ñenua ule cha ole be chieni toi kwian ene tale diali. 24 Agwa kwian bai kaire me no cha ole, kwian ene me cha gerua gbe gdadi me age cha gerule kare, mi suge kwian enege cha Ñenua takalin age no ama alin. Ba ulita kle cha keruchuge gerule cha me kle gerule gballa mo ta giti, cha Ñenua cha kagu nga dba ai giti, ama kle cha gbe gerule. 25 Cha kle gerule ene ulita ba ulita chanu ole nege cha kle aini ba ulita ole ule gire, cha bebi jogeni cha Ñenua ngwadi. 26 Cha be jogeni cha Ñenua ngwadi gire cha Ñenua be mo Oña ba Chudaboanga kage cha giti ba ulita alin, ama be ba tke tangle ulita be ba ta gbe tachke ulita cha gerudu giti ba ole. 27 Cha be jogeni cha Ñenua ngwadi gire cha be ba ulita ta jige suga no, cha ba ta gbe suga no me salengwli kwian kle ta dbe suga no sugeti alin lle gweale giti, cha ta suga no kete, e chege diali ba tale. Malen ba me chegedale tañachuge tanre be boi giti, ba me ta dbadale olire, ba me ta dbadale kennga. 28 Ba ulita cha keruchugu gerule cha be jogeni cha Ñenua ngwadi, bigwa cha be chieni cha be kleni ba ulita ole. Cha Ñenua ma kweri chage, noare cha be jogeni ama ngwadi, ulia ba no cha ole ene ba ta dbadale suga no cha be jogeni cha Ñenua ngwadi giti. 29 Cha gerule ene ba ole ngeru bebi boi cha kle gerule kare, be boi ene cha kle gerule kare gire be suge bage kle boi ulita cha gerudu kare, e giti ba ulita be cha gai ulia ma no dare. 30 Cha me ñage chege gerule tanre dare ba ulita ole, kwian me chanu ulita chugagwalla Satanás kle kwian amanu ta gbe biale chie age me no cha ole. Satanás me ma kweri chage, cha me mo chuge ngwadi amage ama me ñage age cha ole, 31 agwa cha be ama chuge ngwadi age cha ole, ene kwian ulita me chanuge be chke uñale ulia cha no cha Ñenua ole cha kle age cha Ñenua takalin kare. ¡Chkede gdate ulita, che jogedale siere aini!

<- JUAN 13JUAN 15 ->