1 E suiale gwangerugu kwian tanre Chube gerua Jesu giti gau ulia gire kwian Jesu gerua ganga chku ma ngle. Kwian israelita gerunga kwira griego gerudu me no kwian israelita gerunga kwira hebreodi kwian gerunga hebreo me kle muinga gerunga griego chegeba oli ñengulage chudaboi no muinga gerunga hebreo chudaboakle kare chui gdale no igi giti kaire lle na tanre giti. 2 Kledu boi ene kwian Jesu gerua gangaske malen kwian Jesu gerua ketanga gdataboko giti gdaboke mo litu ule kwian na Jesu gerua ganga ulita ole, kwian Jesu gerua ketanga gerudu:
—Me no cha gdataboko giti gdaboke ulita Chube gerua Jesu giti kete kwiange chuge ngwadi gire chege lle na boi, lle girabate alin daba Chubenu ole. 3 Malen noare ba daba Chubenu ulita daba na gweale kle baske ba gadale gdaguke, kwian bai gakle dage, kwian ta ole kaire kwian bai Chube Oña kle ama ta gbe age Chube takalin kare, kwian ene kare ba gadale gdaguke. Cha Jesu gerua ketanga ulita daba ene kote cha lle girabate jige, ama be lle girabate ba daba Chubenu ulita ole, ama be ba daba Chubenu chudaboi lle ulita giti toigda. 4 Ene cha ulita gdataboko giti gdaboke be mo ta gbe kwian tke tangle geru Jesu gitige alin allabi, kaire cha ulita be mo ta gbe gerule Chube ole lle ulita giti kaire ba ulita giti diali ngerugu.
5 Kwian Jesu gerua ketanga gerudu ene gire kwian ulita Chubenu kledu mo litabale mo ta gbu salengwli kwian Jesu gerua ketanga gerudu kare, kwian Chubenu onbre Chubenu ai kare gau gdaguke: Esteban (ama mo ta gbe diali no Chube ole, diali Chube Oña kle ama gbe age Chube takalin kare), Felipe, Prócoro, Nicanor, Timón, Parmenas, Nicolás (ama una Antioquíamu, ama me kwian israelita agwa ama mo blitu age kwian israelita suia kare, ama kwian israelita suia gau mo alin). 6 Kwian kle mo litaba ulita daba gdaguke e gau du kaitadale kwian Jesu gerua ketangage. Gire kwian Jesu gerua ketanga ko gbu daba gdaguke e chuga giti gerudu Chube ole ama ulita giti: “Chube, nege gwangerugu ba onbre ai ulita gdaguke gbe daba chudaboangale ba kiralla giti lle girabatangale daba me lle molen ole. Ba ama kira gbe age ulita ba takalin kare Chube. Ene nobi.”
7 Chube gerua Jesu giti chagedu dare kwian ngleske, kwian ngle Jesu gerua gau ulia una Jerusalénge. Kaire kwian israelita gerunga Chube ole daba alin ngle mo ta gbu ulia Chube ole Jesu gerua gai ulia.
Kwian israelita chugagwalla ulita kaire kwian na tanre skochie Estebandi Esteban kle gerule Jesu giti gdale
8 Chube agedu no Esteban alin, Chube kiralla giti Esteban lle daga ngwale no tanre dodadu kwian ulita gwa giti. 9 E suiale kwian gweale mo ta gbu kira bate kwian Jesu gerua ganga ulita ole. Kwian israelita tanre lle boanga mo chugagwalla alin kwian skage kare, chugagwalla nu ama skajwanbanga ama ulita kle mo lite u mo litangwa Chube gerua jwanngwage, kwian e ulita kira batu Esteban ole Jesu gerua gdale. Kwian skajwanbanga e ulita ule kwian gweale una Cirenemu kaire kwian gweale una Alejandríamu kwian na gweale nga kweri Ciliciamu kaire kwian nga na kweri Asiamu, kwian e ulita kledu gerule ta skochie tanre Esteban ole Esteban kle gerule giti. 10 Kwian e ulita ta skochiu tanre Estebandi Esteban kle gerule giti agwa Chube Oña Esteban gbu gerule tanre trate ta ole kwian ulita gwa giti, malen ama me ñadu age Esteban ole ama takalin kare Esteban tke skage. 11 Kwian e me kirachku Estebandi tke skage, malen ama ulita daba na gau igi kete daba ege, ene daba e igi gau ñage geru jinade Estebandi, gerule Esteban nu geruba daba e ologe me no Moisés chadalla dollale kaire Chube dollale. 12 Geru jinadre ngwale ene Estebandi giti, kwian ulita mo ta gbu skochie Estebandi, kwian tañachugu Esteban gerudu ene ulia Moisés chadalla dollale kaire Chube dollale. Gire kwian israelita chugagwalla juma kaire kwian daba tkanga tangle Moisés chadalla giti, kwian e ulita Esteban tku mo kaskwada Esteban gau Esteban du kwian israelita chugagwalla kweri ulita gwa giti Esteban gbale jiske. 13 Kaire ma giti dare kwian daba tkanga tangle Moisés chadalla giti kaire kwian israelita chugagwalla juma kwian na gau gerule ngwale Esteban dollale, kwian e gerudu:
—Onbre e kada Esteban kle gerule me no diali u gerungwa Chube ole dollale kaire Moisés chadalla dollale.
14 Kwian gerunga ngwale e gerudu dare Esteban dollale:
—Cha Esteban keruchugu gerule Jesu una Nazaremu giti Jesu be u gerungwa Chube ole skiendba kaire Jesu be Moisés nu Chube gerua degaba unsuialin blite, ene che me agedale geru e kle gerule kare.
15 Kwian israelita chugagwalla ulita kaire kwian na ngle kledu toiba dba kwian gerunga ngwale keruchuge gerule Estebandi, gire kwian e ulita gwagedu Estebandi Esteban gwa chegu chrachietranga lle boanga Chube alin nga ngaña giti gwa kare.
